Mika 2 - KITABU KITAKATIFU

Keheri cha yavo avadambizaa vadaka

¹ O, vayaayi, kivi keve kuyavo avasavira kokora uvudamanu; kandi avalohizaa kokora uvudamanu mu vidali viavo! Lwa vuchezaa, nonoho lwa vaveeye nuvwiyangu, vakora uvudamanu vwavalohizi kokora.

² Lwa vakayirwa imilimi, vajivugula; lwa vakayirwa zinyumba vazivugula; vadambiza umundu na avinyumba yeye, nu kuvugura miandu jije.

³ Kunangwa Yahova avoora, “Saaviraa koleta kivi ku munyi, na simulakahononoke kucho mba. Muzizaa kunyooleka munyi vene mu vudinyu, maku simulagenda ni liegingira kandi mba kigira ilava ing'inga yi kivi.

⁴ Lwi ing'inga yene yiyi iduuka, avandu valatumikira makuva ginyu kuli kelolero chi kivi, na valimba ulwimbu yilu lwu kukuza mwoyo. Kigira vindu viamwavitiramu: Kumali kudivizwa ligali! Yahova umali kuvugura milimi jietu, kandi ujigavuliyi yavo avakuhila muvuhambe.”

⁵ Kulwayago, lwa ing'inga iduuka kivala chietu ukwiranyirwa avandu va Yahova, sihalavaho ni kidieli ku mulala ku munyi mba.

⁶ Avandu vanzilwaziraa nivavoora, “Utakwilwazira mba. Utilwazaa amakuva yago goosi mba. Nyasaye siazizaa kukuviika muzisoni mba.

⁷ Muganaganaa vandu va Isiraeli valamwa? Muganaganaa Yahova umali koleka uvwikuziri vwivwe? Muganaganaa anyala kokora vindu kuli yivi? Omolome novohooma ku yavo avakolaa uvulungi?”

⁸ Yahova ativulaa, “Munyi mwingiliraa vandu vange kuli avasigu. Avasaza viranaa kutura mu vulwani, nivaganaganaa vaveeye mu mirembe yengo, navuzwa uwene yeyo, mulindiliraa kuvanyaga amakooti gaavo.

⁹ Mukungaa avakali va avandu vange vatuli mu zingo ziavo ziavayaanzaa. Mumali kunyaga avana vaavo uvugasu vwange mihiga ni mihiga.

¹⁰ Muturi yaaha na muzie; hano sihaveeyeho ni likingwa kandi mba. Uvwoni vwinyu vumali kwononyia havundu hano nu kuhadiviza.

¹¹ “Niiva mundu umugadi yaza nokovoora, ‘Inzi ndaporofetera munyi ndi iwaini na malwa galidoloka, uyu niyie muporofeti wa avandu yava vayaanza.’

¹² “Navuzwa ndamuvungiza harara ligali, avandu vosi va Isiraeli avatigara. Ndamuvungiza harara kuli amagondi gilanaa mu kego. Kuli chayo chizuuyi amagondi, kivala chienyu kilava kandi na vandu vanyingi.”

¹³ Nyasaye alavigulira inzira, nukuvimilira vatuli mu lihaminywa. Valavunaga nu kuvitira mu virivwa vie lidaala linene kandi vazie novovoholore. Mwami wavo, Yahova Wuvunyali alavimilira.