Mika 1 - KITABU KITAKATIFU

¹ Ing'inga ya Jozamu, Ahazi kandi Hezekia vaali avami vi Ivuyuda, Yahova yaaha Mika makuva yaga, uwatulaa mu lidaala lia Moreshezi. Yahova yaamuvulira ivindu yivi viosi ku madaala manene ga Samaria na Jerusalemi.

Lisiomera Samaria na Jerusalemi

² Muhuliri yaga munyi zihiiri ziosi; hulirizi ku amakuva yaga, vosi avamenyi ku lirova! Yahova Wuvunyali alava mulolekizi ku vindu vidamanu via mwakora. Muhuliri! Yahova amolomaa kutura mu litembeli lilie Litakatifu.

³ Yahova yaazaa kutura hatakatifu hehe; aliika hasi na alagenda ku zindongozi zie vigulu.

⁴ Vigulu vilayinguka isi weve kuli ihura eveeye mu muliru; vilasundulwa hasi musi mumavona kuli amazi gasundulwa kutura ku kiguru.

⁵ Yaga goosi galakoleka kigira avandu va Isiraeli vamala kokora uvwoni nu kwibaala imbiri wa Nyasaye. Ivwaha unyala kudulwa kigira libaala lia avandu va Isiraeli? Ni Samaria, lidaala linene liene! Ivwaha ololekiywi kuva wi vifananyi viu vunyasaye mu Ivuyuda? Ni Jerusalemi lidaala linene liene!

⁶ Kunangwa, Yahova avoora, “Ndakora lidaala linene lia Samaria kitumi cha mang'anye mu kivala, havundu hukusimika mizabibu. Ndasundura vijonjo via magina vie lidaala linene hasi mu livona, na ndadiviza imise ji lidaala linene lia Samaria.

⁷ Vifananyi vialio viosi vilahi vilashonoranywa mu vidonye, vindu viosi viahanwa ku malaya gi litembeli viladivizwa nu muliru, ni vifananyi vialio viosi vilalekwa kuva kuli kitumi. Samaria lidaala linene lianyora vindu yivi kigira vulahi vwalio, na kalunu avasigu va lio valavugula vifananyi nu kuzia kokoraa uvulaya mu litembeli havundu handi.”

⁸ Maku Mika yavoola, “Kigira yaga ndalira nu kusioma. Kumanyia liverera liange, ndagenda ku virenge viere kandi chahonyo. Ndaasama kuli kivwi, na ndaasioma kuli lihudu.

⁹ Zingwago zia vandu vi lidaala linene lia Samaria sizilahona mba, kandi kivala cha vandu vi Ivuyuda keveeye ahimbi konyoora maduywa kuli ge lidaala linene lia Samaria; lidivizwa liduuki ku virivwa vie lidaala linene lia Jerusalemi liene, wa vandu vange vamenyi.”

Avasigu vaduuki Jerusalemi

¹⁰ Mutavoolera avasigu vitu mu Gazi kigira liguutwa lietu mba; mutaleka valore lirira lienyu mba. Avandu va Bezi Leafara, mugalagale mu luguchi kumanyia vodedekere vwinyu!

¹¹ Munyi avandu va Shafira, muzie mubuhambe ni chahonyo kandi zisoni. Yavo avamenyi mu zaanani mutagerizi kutura mu lidaala lienyu mba. Lwamuhulira vandu va Bezezeli nivasiioma, mulamanya ndi sihaveeyeho nuhukwirukira mba.

¹² Avandu va Marozi valinda nu vuha konyoora livoholorwa, kigira Yahova umali koleta lidiviza ahimbi ni lidaala linene lia Jerusalemi.

¹³ Munyi avamenyi mu Lakishi, mbohe zibarasi ku magare gu vulwani. Mwavugula miima giu uvwoni vwa ikivala cha Isiraeli na ndio mwalomba lidaala linene lia Jerusalemi kokora uvwoni.

¹⁴ Na kalunu, avandu vi kivala chi Ivuyuda, musivulane ni lidaala lia Moreshezi Gazi. Avami vi kivala cha Isiraeli sivalanyora likonywa kutura ku lidaala lia Akizibu mba.

¹⁵ Avandu va Maresha, Yahova alamuhaana ku musigu, uzizaa kugumira lidaala lienyu. Aviimiliri va Isiraeli valazia kwivisa mu luhangaywa ha Adulamu.

¹⁶ Avandu vi Ivuyuda, muvege amasu ginyu mulisioma kigira vana va mwayaanza. Mwelombe iviole aveene. Kuli indizu, kigira avana vinyu valavugulwa kutura ku munye nukuhirwa mu lihaminywa.