Matayo 9 - KITABU KITAKATIFU

Yeso yahonyia mundu wafogoya

¹ Yeso yanina mu liato, ni yambuka inyanza naduuka mu lidaala lilie.

² Hene yaho, vamuleetera umundu waali ni yaafogoya, naagoni ku kidali chiche. Lwa Yeso yalora lisuuvira lia vaali nalio, yavolera umundu wafogoya oyo, “Lema mwoyo, mwana wange! Usamihiywi uvwoni vuvwo.”

³ Maku, avalala ku avigizi vi Lilaga vataanga kovolerana, “Umundu uyu anyegaa Nyasaye!”

⁴ Navuzwa Yeso yamanya zing'anagani ziavo, navoora, “Kigira ki muganaganaa uvudamanu kuli ndio mumioyo jinyu?

⁵ Iliveeye iliangu ligali ni liliha: okovoola, ‘Usamihiywi uvwoni vuvwo’ anoho okovoola, ‘Singira, ogeende?’

⁶ Navuzwa nyenya muduuki kumanya ndi Umwana wa Adamu aveeye ni zinguru kusamiiha avandu uvwoni mu kivala.” Kunangwa yavolera mundu uwafogoya, “Singira ugingi kidali chicho, uzie yengo!”

⁷ Kunangwa mundu uwaali ni yaafogoya yasingira, nazia yengo.

⁸ Lwi kiduma kenene cha avandu valora yaga, vagenya, nivatia ligali; ni vaakuminya Nyasaye uwahaana ku avandu zinguru kuli yizi.

Yeso yalanga Matayo amulonde

⁹ Yeso yatura ahene yaho; kandi lwa yaali navitaa, yalora mundu mulala ulangwa Matayo ni yikaye ha vasololeraa uvusuru. Yeso yamuvolera, “Nonda.” Nonoho Matayo yasingira naamulonda.

¹⁰ Lwa Yeso yaali nalizaa chukulia munyumba ya Matayo, avasololi vuvusuuru avanyingi na avoni vaza ni viikara harara naye na aviigi veve.

¹¹ Lwa Vafarisayo valora ndio, vavoolera aviigi veve, “Kigira ki Mwigizi winyu alizaa harara na avasololi vuvusuuru kandi avoni?”

¹² Navuzwa lwa Yeso yaavahulira, yavoola, “Avenyaa umwahi wi zinyasi ni yavo avaveeye avalwaye; sivali avaveeye avalamu mba.

¹³ Muzie kwiga kivuni cha amakuva yaga: ‘Nyenya zimbavasi, si nyenya visiuviliru mba.’ Sindaaza kulanga avandu avalungi, navuzwa avoni.”

Amateeva kigira lihonga lilia

¹⁴ Kunangwa, aviigi va Yohana Mubatizi vazia ku Yeso, ni vamuteeva, “Kigira ki vafarisayo kandi kunyi kohoongaa lilia haali kanyingi, navuzwa aviigi vovo sivahoongaa lilia mba?”

¹⁵ Yeso yavativulira, “Avageni valangiywi mu lisavo lie keserero, vanyara kovelera lwa osereeywi aveeye harara navo? Awa! Navuzwa lidiku liladuuka lwa oyo oseleraa umwiha alitulizwa kuvo, ulwene yilwo nilwo lwa valihonga lilia.

¹⁶ “Mundu siyanaviraa kilavi chinguvu imbia kunguvu ingulu yeyo nayo ilatanduka vudamanu ligali.

¹⁷ Kandi mundu siazukaa iwaini imbia mu imuuya yi kesero kikulu mba. Nakora ndio imuuya ilatanduka na iwaini ilasunduka hasi, na imuuya iloneka. Navuzwa mundu naazuka iwaini imbia mu imuuya yie kesero kihia, na viombi sivilondeka mba.”

Umukana wu munene kandi umukali wadira kunguvu ya Yeso

¹⁸ Lwa Yeso yaali nakevoola amakuva yaga kuvo; munene mulala Muyuda yaza kuye, nasigama imbiri weve navoora, “Mukaana wange yakakuza ulwene yilu. Nuyanza hamba uviiki mukono gugwo kuye, naye alasimuguka.”

¹⁹ Kunangwa Yeso yasingira harara na aviigi veve, naamulonda.

²⁰ Hene yaho mukali mulala uwaali niyalwala vulwaye vwu kutaza masahi ku mihiga komi na giviri, yalonda Yeso inyima, na yadira ku lukigiti lwinguvu yeeye.

²¹ Yakola ndio kigira yaganagana mu mwoyo gwigwe ndi, “Nindiira vuzwa kunguvu yeeye, ndahonywa.”

²² Maku, Yeso yikivuka naamulora, namuvolera, “Mukaana wange, lema mwoyo! Lisuuvira liilio limali kukohonyia.” Mukali oyo yahona ing'inga yene yeyo.

²³ Lwa Yeso yingira munyumba yu munene uyu yalora avakubi vi visiliva, kandi kiduma cha vandu ichakolaa liyoga ni vasioma.

²⁴ Yavavolera, “Tuli ichova! Mukaana uyu siakuzi mba, nitali agonaa.” Navo vaamuseka nivamukolera kehenyahenye.

²⁵ Lwi kiduma cha vandu chatulizwa ichova, Yeso yingira mu, nagumira umukono gwu mukaana oyo, naye yasingira.

²⁶ Amakuva yago galanda mu kivala yicho choosi.

Yeso yahonyia avavoku vaviri

²⁷ Lwa Yeso yatura ahene yaho, avavoku vaviri vaamulonda ni valira vudinyu, ni vavoola, “Umwana wa Daudi, okovere zimbavasi!”

²⁸ Lwa Yeso yingira munyumba, avavoku vaviri yavo vazia kuye naye yavateva, “Musuuviraa inzi nyara kumuhonyia?” Navo vaamutivulira, “Yee Mwami.”

²⁹ Ahene yaho Yeso yadira ku zimoni ziavo, navoora, “Gakolwi ku munyi kuli musuuviyi.”

³⁰ Zimoni ziavo ziakunulwa. Yeso yaviganihiza vudinyu navavoolera, “Mutavoolera mundu kali mulala likuva yili.”

³¹ Navuzwa vaatura nivalandiza makuva ga Yeso mu kivala yicho choosi.

Yeso yahonyiaa idimbidi

³² Lwa avandu vaali nivazizaa, vandu valala valetera Yeso mundu mulala uwaali idimbidi uwaali ni lidemoni.

³³ Ahene yaho, lwi lidemoni liali ni liakakungwa kutura mu umundu waali idimbidi oyo yaatanga komoloma. Avandu vagenya ni vavoola, “Amakuva kuli yaga gakiri kwekoleka ku mu Isiraeli.”

³⁴ Navuzwa Avafarisayo vavoola, “Akunga amademoni ni zinguru ziu munene wa mademoni.”

Yeso averereraa avandu kigira avakoli vimiyinzi vagehi

³⁵ Yeso yavodong'ana mu madaala goosi kandi mu tudaala; hiyigiza mu masinagogi gaavo niyilwaza Ivangeri yu Vwami vwa Nyasaye, nahonyia zinguzu ziosi kandi uvulwaye vwi zing'ano ziosi.

³⁶ Kunangwa, lwa yalora viduma via avandu yaavavererera, kigira vaali ni vadambaa kandi ni vasalana kuli amagondi gataveeye nu mwayi.

³⁷ Ahene yaho Yeso yavolera aviigi veve, “Ligesa ni linene, navuzwa avagesi vagehi.

³⁸ Kulwayago musaale Mwami mwene wi ligesa ahili avagesi mu mulimi gwigwe.”