Matayo 8 - KITABU KITAKATIFU

Yeso atakasaa mugere

¹ Lwa Yeso yasulunguta kutura mu kiguru, ividuma vinene viamulonda.

² Maku umugere mulala yaza na musigamira, navoora, “Mwami, nuyanza unyala kombonyia!”

³ Yeso yanyira mukono gwigwe, namudiira, navoora, “Nyenya! Ohone.” Nonoho umundu oyo yahonywa vogere vwivwe.

⁴ Ma Yeso ya muvooleraa, “Utavoolera umundu kali mulala, navuzwa uzie, wimanyie ku musaalisi, uhaane ivihaanwa via Musa yalaga keve ekelolero ku vandu ndi umali kohonywa.”

Yeso yahonyia mutumikiri wu munene wa avasikari Varumi

⁵ Lwa Yeso yaali ni yingiraa mu lidaala lia Kaperinaumi, munene wa avasikari mia, Murumi, yazia kuye naamusaala, navoora,

⁶ “Mwami, mutumikiri wange nu mulwaye wafogoya; agoni munyumba, na azunangwa ligali.”

⁷ Yeso yamuvolera, “Ndaaza, kandi ndamuhonyia.”

⁸ Munene wa avasikari oyo yamuvolera, “Mwami, sindukana ivi wingiri munyumba yange mba. Navuzwa vola ilikuva vuzwa, na mutumikiri wange alahona.

⁹ Inzi kandi mbeeye umundu mukekeeke hasi ha malago ga vanene vandi avambiti, mbeeye na avasikari mia hasi ha malago gange. Nimbolera uyu, ‘Zia!’ Ma azia; nu wundi, ‘Hamba!’ Ma yaza; nu mutumikiri wange, ‘Kola kindu yiki!’ Maakora.”

¹⁰ Lwa Yeso yahulira yaga, yaagenya ligali navolera avandu vaali ni vamulonda, “Agiligali muvooleraa, ngikiri konyoolaku umundu woosi mu Isiraeli oveeye ni lisuuvira kuli yili.

¹¹ Na muvooleraa, avandu vanyingi valaza kutura Ivugwi ni madioli, kandi valikala mu lilia harara na Aburahamu, Isaka na Yakobo mu Vwami vwu mwigulu.

¹² Navuzwa avaadukana vave mu Vwami yivwo valateevwa ichova mu kisundi. Wa valilira ni vadedeiza amiinu gaavo.”

¹³ Ma Yeso yavolera munene wa avasikari Murumi, “Zia, gakolwi ku ivi kuli usuuviyi.” Nu mutumikiri weve yahona ing'inga yene yeyo.

Yeso yahonyia avandu vanyingi

¹⁴ Yeso yaduuka munyumba ya Petero, yanyoora, navizara Petero naagoni, nalwalaa uluhuuza.

¹⁵ Yeso yadira mukono gwigwe; nu uluhuuza lwatula kuye, navuuka naamutumikira.

¹⁶ Lwa gwaduuka mugolova, vamuleetera avandu vanyingi ava mademoni gaali ni gaagumira. Naye kulivoola likuva vuzwa, yaagakunga. Na yahonyia vosi avaari avalwaye.

¹⁷ Yakola ndio gaduuki kuduukizwa agu muporofeti Isaya yavoola, “Mwene yavugula ovodekeranu vwitu, kandi yaginga uvulwaye vwitu.”

Avandu avenyaa kolonda Yeso

¹⁸ Lwa Yeso yalora ividuma via vandu ivinene ni vimukumberizi, yavolera aviigi veve vaambuki engereka wi inyanza.

¹⁹ Mulala ku avigizi vi Lilaga yaza kuye, namuvolera, “Mwigizi, inzi ndakolonda hoosi aha uva nuzia.”

²⁰ Yeso yamutivulira, “Vivwi viveeye ni zimbangaywa, na amanyonyi gaveeye ni zinyumba ziago, navuzwa Umwana wa Adamu siaveeye na ahokososera mba.”

²¹ Mulala ku aviigi veve yamuvolera, “Mwami, ombe munwa, ndange kuzia kuyavira baba wange.”

²² Yeso yamuvolera, “Nonda. Leka avakuzu vayaviri avakuzu vaavo aveene.”

Yeso yakiring'anyia viguvuli

²³ Lwa Yeso yanina mu liato, aviigi veve vaamulonda.

²⁴ Maku, imbuza enene yahuuza munyanza, kuduuka iliato nilitanga kwiyina. Yeso yaali naagonaa.

²⁵ Aviigi vazia kuye nivamuvukiza nivavoora, “Mwami okohonyie, kudivaa!”

²⁶ Yeso yavateva, “Kigira ki munyi muveeye ni lisuuvira likekeeke?” Kunangwa, yasingira naagondokera imbuza ni nyanza, ma gwaali umulengera umunene.

²⁷ Avandu vagenya, nivavoora, “Ni mundu wa lugano ki uyu? Kali imbuza ninyanza vimuhulira!”

Yeso yahonyia avandu vaviri avaari na mademoni

²⁸ Lwa Yeso yaduuka mu kivala cha Vagadareni, ku lwangereka lundi lwinyanza, avandu vaviri ava mademoni gaali ni gagumira vaagana naye nivatura mu mulimi gwi vilindwa. Avandu yavo vaali avu kutihiza ligali, kali siyaali ho mundu waluvilira kuvita kunzira yeyo mba.

²⁹ Navo vatanga kuhanzuka nivavoora, “Koveeye ndi nivi, O, Mwana wa Nyasaye? Uzi hano kukudambiza ing'inga nikikiri kuduuka?”

³⁰ Ahimbi ahene yaho, chaliho ichayo kenene chi zinguruvi zinyingi niziaya.

³¹ Amademoni yago gamugoonya ni gavoora, “Niiva ulakukunga okohe munwa kuzie kwingira mu ichayo chi zinguruvi zira.”

³² Yeso yagavoolera, “Zii!” Kandi gaturaa mu vandu yavo, ni gaazia kwingira mu ichayo chi zinguruvi. Ichayo choosi chi zinguruvi chasulunguta zimbiru ni zigwa munyanza, ma choosi nikikuzira mu mazi.

³³ Avayi vi zinguruvi yizio viruka nivazia mu lidaala linene, nivavoora amakuva goosi ni vindu viekoleka ku vandu ava mademoni gaali ni gaagumira.

³⁴ Kunangwa avandu vosi vu mu lidaala yilio vaatura, nivazia kwaganira Yeso; kandi ulwa vamulola vamugoonya ligali atuli mu kivala chavo.