Matayo 7 - KITABU KITAKATIFU

Kukalagira avandu vandi

¹ “Mutakalagira avandu vandi mba, gase na munyi mulakalagirwa na Nyasaye.

² Kuli mukalagiraa avandi, munyi kandi mulakalagirwa ndio; nekegero cha mugereranga mu avandi, nicho cha Nyasaye alimugerera mu.

³ Kigira ki olola lusasu loveeye mumoni ya amwavo woovo, navuzwa siuganagana ku kuluku loveeye mumoni mumwo?

⁴ Anoho, unyala kovoolera ndi amwavo woovo, ‘Amiitu, leeta ngutulizi lusasu mumoni mumwo,’ lwa ivi mwene oveeye nu luku mumoni mumwo?

⁵ Mugadi ivi! Tuliza kutanga luku loveeye mumoni mumwo mwene; kunangwa olole vulahi kuli utuliza lusasu loveeye mumoni ya amwavo woovo.

⁶ “Mutaha izimbwa vindu vitakatifu, gase zilagirung'ana ma zimutanduli; anoho mutasigisira zinguruvi iziluulu zienyu, gase zilaziduvagira hasi.

Usaale, wenye, wigulihizi

⁷ “Musaale, na mulahevwa, mwenye, na mulanyola; mwigulihizi, na mu ligulirwa kiliango.

⁸ Kigira ku vosi usaala, ahevwa; na uwenyaa, anyoora; na uwigulihizaa, yigulirwa.

⁹ Anoho ivwaha ku munyi, wu umwana weve amusavaa uvuchima, amuhezaa iligina?

¹⁰ Anoho, naamusava isuzi alamuha enzoka?

¹¹ Niiva munyi, kali ni muveeye avadamanu, mumanyi kuhaana ku avana vinyu ivindu vilahi, Baba winyu oveeye mwigulu sialakira kuhaana ivindu vilahi ligali ku yavo vosi avateevaa kutura kuye!

¹² “Kulwa yaga, mukolere avandi viosi via mwenya yavo vamukolere. Yili nilio livoora lie Lilaga lia Musa na amigizu ga avaporofeti.

Kiliango keng'erere

¹³ “Mwingiri mu kiliango keveeye keng'erere. Kigira inzira izizaa hukudiviza eveeye imambararu, na kiliango chayo keveeye kigalamu; na avavitiraa mucho vaveeye avanyingi.

¹⁴ Navuzwa inzira izizaa mu livamwoyo eveeye eng'erere, na kiliango chayo keveeye keng'erere; na avandu vakekeeke vuzwa avagenyoolaa.

Musaala gumanyikanaa ku makuyu gagwo

¹⁵ “ Mugerihi ku avaporofeti vo vovehi. Valaza ku munyi niviviiki zinguvu zia magondi, navuzwa mu mioyo jaavo vaveeye visalang'ongo vilulu.

¹⁶ Mulavamanya ku vikolwa viavo. Avandu vanyara kwagula amazabibu ku misaala ja mafa, anoho vaagura makuyu ku matagalu? Awa!

¹⁷ Kunangwa, musaala gwosi mulahi gwamaa makuyu malahi; navuzwa musaala mudamanu gwamaa makuyu madamanu.

¹⁸ Musaala mulahi sigunyala kwama makuyu madamanu mba, kandi musaala mudamanu sigunyala kwama makuyu malahi mba.

¹⁹ Ku misaala josi, ugutama makuyu malahi gulatemagwa nokoteevwa mu muliru.

²⁰ Kunangwa mulavamanya ku vikolwa viavo.

Si mumanyi mba

²¹ “Si vaveeye vosi avamboleraa, ‘Mwami, Mwami,’ avalingira mu Vwami vwu mwigulu; navuzwa ni yavo avakolaa uvulariri vwa Baba wange oveeye mwigulu veng'ine.

²² Avanyingi valakambolere ku Lidiku lie likalaga yilio, ‘Mwami, Mwami! Sikwaporofeta ku lieta liilio, kandi sikwatuliza mademoni nokokola vilolekizu vinyingi mu lieta liilio!’

²³ Ahene yaho ndakavavolere, ‘Si mumanyi kali hakuzu, tuli imbiri wange, munyi avakolaa vudamanu!’

Avumbaki vaviri

²⁴ “Kulwayago, mundu woosi uhuliraa amakuva gange, naagakora, aveeye kuli mundu mugeri, uwumbaka inyumba yeeye ku lwanda.

²⁵ Imbura yakuba, imigera jizura, imbuza enene nihuza ni zinguru ku inyumba yeyo. Navuzwa si yagwa mba, kigira yaali niyumbakwa ku lwanda.

²⁶ “Navuzwa mundu ku vosi uhuliraa amakuva gange, kandi navula kugakola, aveeye kuli mundu musiru, uwumbakaa inyumba yeeye ku muyeke.

²⁷ Imbura yakuba, imigera nijizura imbuza enene nihuza, kandi nihuza ni zinguru ku inyumba yeyo, nayo yagwa, kandi liigwa liayo liali nu mufuumu munene ligali!”

Uvunyali vwa Yeso

²⁸ Lwa Yeso, yamala kovora amakuva yaga, Kiduma chagenya ligali ku amigizu geege.

²⁹ Kigira siyigiza kuli avigizi vi Lilaga mba, navuzwa yaavigiza kuli umundu oveeye nu vunyali.