Matayo 4 - KITABU KITAKATIFU

Ligerizwa lia Yeso

¹ Kunangwa Roho yimilira Yeso kuzia mwigendanyama aduuki kogerizwa na Setani.

² Naye yaahonga lilia amadiku arubaini mbasu nu vudiku. Lwinyima, yaali ninzara.

³ Maku, Setani yaza kuye, namuvolera, “Ivi nuuva noveeye Umwana wa Nyasaye, laga amagina yaga gagwi uvuchima.”

⁴ Navuzwa Yeso yativura, “Gang'odwa mu Mang'oda Matakatifu, ‘Mundu sianyala kuva mwoyo kigira uvuchima vwenyine, navuzwa na makuva goosi agatulaa mu munwa gwa Nyasaye.’ ”

⁵ Maku Setani yamuhira mu lidaala litakatifu lia Jerusalemi, naamusingiriza ku kesegese chi Litembeli,

⁶ namuvolera, “Ivi nuuva noveeye Umwana wa Nyasaye, tuma hasi, kigira gang'odwa ndi, ‘Nyasaye alalaga zingelosi veve ku ivi, valakuginga mu makono gaavo, gase ulikigitala kelenge chicho ku ligina.’ ”

⁷ Yeso yamuvolera, “Kandi gang'odwa, ‘Utageriza Mwami, Nyasaye woovo mba.’ ”

⁸ Setani yamuhira ku kiguru kitambi ligali naamumanyia uvwami vwosi vwi lirova harara nu vukumi vwali.

⁹ Na yamuvolera, “Vindu yivi viosi ndakuha, niiva ulagwa hasi ma usigamiri.”

¹⁰ Ku Yeso yamuvolera, “Tula ku inzi, Setani! Kigira gang'odwa, ‘Ulasigamira Mwami Nyasaye woovo kandi ulamutumikira oyo yenyine!’ ”

¹¹ Ma Setani yamuleka, kandi henza, zingelosi vaza nivamutumikira.

Yeso yaatanga miyinzi jije mu Galilaya

¹² Lwa Yeso yahulira Yohana umali kugumirwa nukuviikwa mu vuhambe, yirana Galilaya.

¹³ Lwa yatura Nazareti, yazia komenya Kaperinaumi, lidaala liali ku lujinga lwinyanza ya Galilaya, mu zinzako zie vivala via Zabuloni na Nafutali.

¹⁴ Na ndio gaduuki kuduukizwa agu muporofeti Isaya yavoola,

¹⁵ “Kivala cha Zabuloni ni kivala cha Nafutali, kunzira yukuduuka kunyanza, engereka wa Jorodani, Galilaya, kivala cha avandu vi zihiiri!

¹⁶ Avandu vaali nivamenya mu kisundi valoli uvulavu vonene. Kandi yavo avaamenyaa mu kivala chi chiriri chi likuza, uvulavu vong'ereng'ani kuvo!”

¹⁷ Kutura ing'inga yeyo, Yeso yaatanga kwilwaza navoora, “Mwiganiri, kigira Uvwami vwu mwigulu voveeye ahimbi!”

Yeso alaangaa avaluvi vane

¹⁸ Lwa Yeso yaali nagenda ku lujinga lwinyanza ya Galilaya, yalora avaluvi vaviri avamwavo, Simoni ulangwa Petero na Andereya amwavo weve, nivaluvaa ni miluvu munyanza.

¹⁹ Yavavolera, “Hambi munonde, ninzi nda mukora avaluvi va vandu.”

²⁰ Nonoho valeka imiluvu jaavo nivamulonda.

²¹ Lwa yisunda hambiri hakekeke, yalora avamwavo vandi vaviri; Yakobo na Yohana, avana va Zebedayo. Vaali ni vaveeye mu liato harara na Zebedayo, baba wavo, ni vanava miluvu jaavo. Yeso yavalanga.

²² Nonoho valekera baba wavo iliato ni valonda Yeso.

Yeso yigiza, yilwaza kandi nahonyia avalwaye

²³ Yeso yavodong'ana hoosi mu Galilaya, ni yigizaa mu masinagogi gaavo, kandi yilwaza Ivangeri yu Vwami vwa Nyasaye. Yahonyia zing'ano ziosi zie zinguzu no vulwaye kandi ovodekeranu vwosi vwa avandu.

²⁴ Kunangwa, ulusuma lwa Yeso lwalanda mu Siria mwosi. Avalwaye vosi avaari ni zinguzu zie zing'ano ziosi nu vusaliri lugano, avaari na mademoni nindulumi kandi avaalema vaahirwa kuye, naye yavahonyia vosi.

²⁵ Viduma vinene via avandu vaatura Galilaya, Dekapolisi, Jerusalemi, Ivuyuda, kandi engereka wa Jorodani vamulonda.