Matayo 3 - KITABU KITAKATIFU

Lilwaza lia Yohana Mubatizi

¹ Mu madiku yago Yohana Mubatizi yaza, natanga kwilwaza mwigendanyama lie Vuyuda navoora,

² “Mwiganiri, kigira Uvwami vwu mwigulu voveeye ahimbi.”

³ Yohana uyu niyie wu muporofeti Isaya yamoloma amakuva geege na avoora, “Umwoyo gwu Mundu guhanzukaa mwigendanyama: ‘Mulombe inzira yu Mwami, mulungikizi mihanda jije.’ ”

⁴ Yohana yiviika inguvu yanavwa ku uvwoya vwi ing'amia, nayeevoha musibi gwe kesero mu kekenge chiche. Viukulia vivie viali zisigi nu uvwuki vwu mu mulitu.

⁵ Kunangwa vandu vazia kuye kutura Jerusalemi, kutura mu kivala choosi chi Ivuyuda ni zimbega ziosi iziali ahimbi nu mugera gwa Jorodani.

⁶ Viyama uvwoni vwavo, naye navabatiza mu mugera gwa Jorodani.

⁷ Navuzwa lwa Yohana yalora Vafarisayo na Vasadukayo vanyingi ni vazaa kuye avabatizi, yavavolera, “Munyi avana vi zinzoka! Nivwaha uwaamugerihiza mwiruki vutima vwa Nyasaye vuzaa?

⁸ Gamudukira mukore ivikolwa vimanyia ndi mumali kwiganira.

⁹ Mutiganaganyia aveene kovora, ‘Kunyi koveeye na guuga wiitu Aburahamu!’ Muvooleraa agiligali, Nyasaye anyala kolombera Aburahamu avana kutura ku magina yaga.

¹⁰ Kali kalunu imbaazi iviikiywi mu vitinya vie misaala. Musaala gwosi ugutaama makuyu amalahi gulatemagwa, ma goteevwe mu muliru.

¹¹ Inzi mubatizaa mu mazi kumanyia ndi mumali kwiganira. Navuzwa uyu uzaa inyima wange aveeye ni zinguru kuvita inzi. Inzi sindukana kali ku mugingira vilato vivie mba. Uyu alamubatiza mu Roho Mutakatifu kandi mu muliru.

¹² Aveeye ne kesesero chiche mumukono gwigwe. Kandi alalaviza oloze lwilwe ligali, nuvuswage alateera mu kedeera, navuzwa umukuzi alagusaamba nu muliru gutasimikaa.”

Libatizwa lia Yeso

¹³ Maku ing'inga yeyo Yeso yaza natura Galilaya naduuka ku mugera gwa Jorodani, nazia ku Yohana amubatizi.

¹⁴ Navuzwa Yohana yaageriza kumugaya navoora, “Kigira ki uzaa ku inzi ngubatizi lwa ivi wenyekaa umbatizi?”

¹⁵ Navuzwa Yeso yamutivulira, “Leka gave ndio kalunu kigira ni vulahi kuduukizi uvulungi vwosi vwa Nyasaye yenya.” Hene yaho Yohana yaavugilira.

¹⁶ Lwa Yeso yaali niyakabatizwa, yatura mu mazi vwangu. Henza iligulu liakunuka, Roho wa Nyasaye yika kuli ilikuulu, ni yaza kuye.

¹⁷ Kandi henza, umwoyo gwatura mu ligulu ni govoora, “Uyu nu Umwana wange muyanze wandayanza.”