Matayo 28 - KITABU KITAKATIFU

Lisimuguka lia Yeso

¹ Inyima wi Lisabato nivuchezaa ku lidiku lia Jumapili, Maria Magadalena na Maria wundi, vazia kohenza ha kilindwa.

² Nonoho, liali ho ilidegera linene lie kivala; engelosi wu Mwami yika kutura mwigulu, nagomagominya iligina, ma niyikara ku.

³ Ligondo lilie lialoleka kuli oloheni, kandi izinguvu zizie ziali izindavu kuli ilikonza.

⁴ Avalindi vi kilindwa vaadegera nuvuti ovonene nivagwa kuli avandu vakuzi.

⁵ Engelosi yavolera avakali yavo, “Mutatia mba! Manyi ndi mwenya Yeso wavambwa.

⁶ Siaveeye hano mba; yaakusimugukizwa kuli yavoola. Hambi mulole ha yagonaa.

⁷ Kalunu, muzie vwangu muvoolere aviigi veve, ‘Usimugukiziywi kutura mu likuza, na kalunu yimiraa imbiri winyu kuzia Galilaya; mulamulola uwene yeyo!’ Mwizurizi aga inzi mali kumuvolera.”

⁸ Kunangwa avakali yavo vaatura hakilindwa vwangu, nivatiiyi, navuzwa ni vizuyi uvuyanzi vonene ligali, ni vanyagura kuzia kovoolera aviigi veve.

⁹ Lwa vaali nivazizaa kovoolera aviigi veve, nonoho Yeso mwene yagana navo navacheliza; “Mirembe ku munyi.” Vakali yavo vazia kuye, ni vagumira ku virenge vivie, kandi vaamusigamira.

¹⁰ Maku Yeso yavavolera, “Mutatia mba! Muzie kovoolera avamwavo vange vazie Galilaya, valandolera yo.”

Makuva ga valindi vi kilindwa

¹¹ Avakali yavo lwa vaali ni vazizaa, valala ku avasikari avalindaa ikilindwa vazia mu lidaala linene kovoolera avasaalisi vanene amakuva goosi agaali nigekoleka

¹² A vasaalisi vanene na vakulundu vavugana harara nivalomba kiyaalo. Vaaha avasikari yavo mabese manyingi

¹³ ni vavoola, “Muvoolere avandu ndi, ‘Aviigi veve vazi vudiku ni vamwiva lwa mwali ni mugonaa.’

¹⁴ Niiva amakuva yaga galaduuka ku mwamihi, kunyi kulamuvoolera munyi muvura imbara, na munyi simulava ni kindu kimudegeliza mba.”

¹⁵ Kunangwa avalindi yavo vaavugura mabese ni vakora kuli vavolerwa vakole. Na amakuva yaga galanda mu Vayuda kali kuduuka kalunu.

Yeso yaloleka ku aviigi likomi na mulala

¹⁶ Aviigi likomi na mulala vazia ku kiguru mu Galilaya, aha Yeso yavalaga vazie.

¹⁷ Lwa vamulola vaamusigamira kali niiva avalala kuvo vahayahayiza.

¹⁸ Yeso yisunda ahimbi kuvo navavoolera, “Mbeeveywi zinguru ziosi mu ligulu kandi mu lirova.

¹⁹ Muzie, mukore avandu vi zihiiri ziosi vave vigi vange: muvabatizi: mu lieta lia Baba, liu Umwana, na lia Roho Mutakatifu;

²⁰ muviigizi kolonda ivindu viosi via mali kumulaga. Na ndava harara ni munyi madiku goosi; kuduuka ku keheri chi ing'inga.”