Matayo 27 - KITABU KITAKATIFU

Yeso Yahilwa imbiri wa Pilato ni Liesunga lia Yuda

¹ Lwa vwacha, avasaalisi vanene na vakulundu vaakora kiyaalo ku Yeso nivalomba zing'anagani kuli vanyara kumwita.

² Vaamuvoha ni minyororo, nivamwimiriza nu kumuhaana ku Pilato, uwaali mwamihi wa Varumi.

³ Lwa Yuda, umuzaami yalora ndi Yeso umali kukalagirwa, yiganira niyiranyia ku vasaalisi vanene na vakulundu iviali vidonye viefeza salasini.

⁴ Yavavolera, “Mali kokora uvwoni ku kuzaama umundu utaveeye na mahiolo akuzi!” Navuzwa vamuvolera, “Yago gaveeye ki ku kunyi? Agene yago nagoogo ivi umwene!”

⁵ Yuda yalasa ividonye viefeza yivio mu Litembeli, natura ichova zimbiru, nazia kwisunga mwene.

⁶ Avasaalisi vanene vaavugura ividonye viefeza yivio ni vavoola, “Nu mujiru kuviviika mu livikiru lie Litembeli kandi, kigira ziveeye mabese gikisaahi.”

⁷ Nivakamara kuvugirizana, vaagura Umulimi gwu Mulongi na mabese yago, gove ahukuyavira avamenya.

⁸ Yiki nicho kigira kali kuduuka lero umulimi yigwo gulangangwa “Mulimi gwi Kisaahi.”

⁹ Kunangwa amakuva gu muporofeti Jeremia yaali ni yavoola gaagwa agiligali, “Vaavugura ividonye viefeza salasini, uvuguli vwa vandu va Isiraeli vavugirizana kumutungira,

¹⁰ ma vatumikira mabese zana kugura Umulimi gwu Mulongi, kuli Mwami yaali ni yaandagi.”

Mwami wa Varumi Yumuteeva Yeso

¹¹ Yeso yaasingirizwa imbiri wu mwami, wa Varumi uwamuteeva, “Ivi niyie Mwami wa Vayuda?” Yeso yaamutivulira “Ivi ovooye.”

¹² Navuzwa siyaativula kindu ku ga vasaalisi vanene na vakulundu vaamugina mba.

¹³ Maku Pilato yamuteeva, “Siuhulira ivindu viosi via vavoola ku ivi?”

¹⁴ Navuzwa Yeso siyaamutivulira kindu mba kuduuka mwamihi nagenya ligali.

Yeso Yakalagirwa likuza

¹⁵ Vuli ing'inga yoosi yi lilia lie Lipasaka mwami yaali nu mwima gwo kovoholora umuhambe mulala wa Vayuda vaatovora.

¹⁶ Ing'inga yene yeyo yaali ho muhambe mulala uwamanyikana kulikola uvudamanu, uwalangwa Baraba.

¹⁷ Lwa vandu vamala kuvugana harara, Pilato yavateva, “Mwenya muvohololere vwaha ku vaviri yava, Baraba anoho Yeso ulangwa Mesia?”

¹⁸ Yavoola ndio kigira yamanya vamuyaara kigira embodoka.

¹⁹ Lwa Pilato yaali niyikaye kondeve yi Likalaga, umukali weve yamuletera amakuva namuvolera “Utakola ikindu ku mundu mulungi uyu mba, kigira lero nyooye ilisalirizwa ilinyingi mu maloto kigira ye.”

²⁰ Navuzwa avasaalisi vanene na vakulundu vavoolera avandu vateeve Baraba avoholorwi, na Yeso yiitwi.

²¹ Umwami Pilato yavateva, “Ni uliha ku vaviri yava wa mwenya mboholore?” Vamuvolera, “Baraba!”

²² Pilato yavateva, “Maku ngole ki ku Yeso ulangwa Mesia?” Vosi vaamutivulira, “Muvambe!”

²³ Pilato yateeva, “Kigira ki? Akoli uvudamanu ki?” Navo vaakira iliyoga, ni vahanzuka: “Avambwe!”

²⁴ Lwa Pilato yalora ndi sianyala kokora kindu, kandi iliyoga limeedeki, yavugula amazi niyisaava makono geege imbiri wi kiduma, navoora, “Inzi simbeeye nimbala ku likuza liu mundu mulungi uyu mba. Gaveeye ku munyi aveene.”

²⁵ Avandu vosi vavoola, “Amasahi geege gave ku kunyi, kandi ku vana viitu!”

²⁶ Hene yaho Pilato yaavoholora Baraba kutura mu vuhambe. Maku yalaga vasikari veve vakuyi Yeso, ma avambwe.

Avasikari vakolera Yeso kehenyahenye

²⁷ Maku avasikari va Pilato vingiriza Yeso munyumba yu mwami na avasikari vosi vaamukumbiriza.

²⁸ Vaamutuliza izinguvu zizie, navamuviika inguvu inzakanyu.

²⁹ Maku vanava itaji ya mafwa, ni vamuvika ku mutwi gwigwe na, vamuviikira imbimbu mu mukono gwigwe umulungi, ma vasigama imbiri weve ni vamukolera ekehenyahenye. Vavoola, “Ahindiri Mwami wa Vayuda!”

³⁰ Vaamutuzira amate, nivavugura imbimbu nivamukuya nayo ku mutwi.

³¹ Lwa vaali nivakamara kumukolera ekehenyahenye, vaamutuliza inguvu inzakanyu, ni virana kumuviika izinguvu zizie, ma nivazia ku muvaamba.

Yeso Yavambwa

³² Lwa vaali ni vazizaa, vanyoola mundu mulala uwalangwa Simoni kutura Kurene. Vamuniga agingi umusalaba gwa Yeso.

³³ Lwa vaduuka havundu halangwa Gologoza, livoora lialio liveeye, “Ha kihaanga,”

³⁴ vamuha iwaini izuganyiwi ni kindu ikilulu, navuzwa lwa Yeso yaagizazama, yasura kuginwa.

³⁵ Lwa vaali nivakamuvamba, vagavulana izinguvu zizie mu likuba zikuura kuzio.

³⁶ Maku, viikara ni vamulinda hazana.

³⁷ Higulu hu umutwi gwigwe vang'oda ho agavamuyalira kuli ndi, “UYU NIYIE YESO, UMWAMI WA VAYUDA.”

³⁸ Aviivi vaviri vavambwa harara naye, mulala ku mukono mulungi, nu wundi ku mukono mumosi.

³⁹ Avandu vavita ahene yaho vaamunyega, nivasung'usa imitwi jaavo.

⁴⁰ Vavoola, “Ivi si wavoola ulasambula Litembeli ma uliumbake kandi ku madiku gavaga? Wehonyie umwene. Niiva oveeye Umwana wa Nyasaye yika kutura ku musalaba!”

⁴¹ Avasaalisi vanene harara na avigizi vi Lilaga kandi avakulundu navo vamukolera ekehenyahenye nivavoora,

⁴² “Yahonyia avandi, navuzwa sianyala kwehonyia umwene! Aveeye Mwami wa Isiraeli, kalunu niiva aliika kutura ku musalaba, kunyi kulamusuuvira.

⁴³ Yasuuvira Nyasaye navoora, aveeye Umwana weve; kalunu leki kolole niiva Nyasaye yenya kumuhonyia.”

⁴⁴ Kali aviivi vavambwa harara naye vaamunyega kuli ndio kandi.

Likuza lia Yeso

⁴⁵ Kutura zisa sita kuduuka zisa tisa zia mbasu, kisundi chakunika kivala choosi.

⁴⁶ Lwi ing'inga yaduuka ahimbi zisa tisa, Yeso yalira nu mwoyo munene, “Eli, Eli, lama sabakatani?” Livoora liago liveeye, “Nyasaye wange, Nyasaye wange, kigira ki ondeki?”

⁴⁷ Navuzwa valala kuvo avaari nivasingiyi ho lwa vahulira agene yago vavoola, “Alaangaa Elija.”

⁴⁸ Mulala kuvo yanyagura vwangu navugura isiponji ni yiina mu isiki, nagiviika ku lusaala, naamunwehiza.

⁴⁹ Vandi vavoola, “Leka kolole niiva Elija alaza kumuhonyia.”

⁵⁰ Yeso yalira vudinyu, ma naalakula mwoyo gwigwe.

⁵¹ Hene yaho, inguvu yi Litembeli yatanduka mu hagati kutura yigulu kuduuka hasi. Lirova liadegera, amagina ni gadika,

⁵² ivilindwa viakunuka kandi, na avatakatifu vanyingi avaari ni vaakuza kale vasimugukizwa.

⁵³ Inyima wi lisimuguka lia Yeso, vatakatifu vatuli mu vilindwa, ni vingira mu Lidaala Litakatifu, nivaloreka ku vandu avanyingi.

⁵⁴ Lwu munene wa vasikari, harara na vasikari avalindaa Yeso valora ilidegera lie lirova ni vindu viosi viekoleka, vaatia ligali ni vavoola, “Ligali umundu uyu yaali Umwana wa Nyasaye.”

⁵⁵ Ahene yaho vaali ho avakali avanyingi avahenzeraa ihale, vaali avalondi Yeso kutura Galilaya nivamukonya.

⁵⁶ Kuvo vaali Maria Magadalena, Maria mama wa Yakobo na Josefu, kandi umukali wa Zebedayo.

Liyavirwa lia Yeso

⁵⁷ Lwa gwaduuka mugolova, mutugi mulala kutura Arimazia, yaduuka; lieta lilie liali Josefu, ma kandi yaali umwigi wa Yeso.

⁵⁸ Yazia ku Pilato naasava ahevwe umuviri gwa Yeso. Pilato yaavugilira.

⁵⁹ Kunangwa Josefu yavugula umuviri yigwo, nagulingira musuuka imbia kandi indahi,

⁶⁰ naguviika mu kilindwa chiche kihia cha yaali navaazi mu lwanda ludinyu. Maku yagomagominya iligina ilinene nakunika ha vwingiliru vwi kilindwa ma nazia.

⁶¹ Maria Magadalena na Maria wundi vaali ho, ni viikaye ni vahenzi kilindwa.

Mulindi wi kilindwa

⁶² Lwa vwacha, ku lidiku lie Lisabato avasaalisi vanene na Vafarisayo vazia kuvugana wa Pilato

⁶³ ni vavoola, “Mwami, kwizulizaa umugadi ula yavoola nakikiri kukuza, ‘Inyima wa madiku gavaga ndasimuguka.’

⁶⁴ Kulwayago tuliza lilago ikilindwa kisingilirwi kuduuka ilidiku lia kavaga gase aviigi veve valaza kumwiva ma vavoolere avandu ndi yaakusimuguka kutura mu vakuzu. Uvugadi vwi nyima yivu vulava uvudamanu ligali kuvita vwu kutanga.”

⁶⁵ Pilato yavavolera, “Muveeye na avasikari vinyu. Muzie kukilinda kuli munyala.”

⁶⁶ Kunangwa vazia ni vasingilira ikilindwa ni vaviika umuhuri ku ligina, no koleka ho avasikari va lindi.