Matayo 26 - KITABU KITAKATIFU

Lilohiza mu vwivisu ukwita Yeso

¹ Lwa Yeso yamala kovora amakuva yaga goosi, yavolera aviigi veve,

² “Mumanye ndi inyima wa madiku gaviri kulava ni lilia lie Lipasaka, kandi Umwana wa Adamu alahaanwa mu makono ga vasigu veve, avambwe.”

³ Maku avasaalisi vanene navakulundu vavugana harara ha mugizi gwinyumba yu Musaalisi Munene uwalangwa Kayafa,

⁴ kandi vosi valohiza mu vosivisu kuli vagumira Yeso mu vwivisu, vaduuki kumwita.

⁵ Navuzwa vavoola, “Itava ing'inga yi lilia lie Lipasaka mba, kigira avandu valakola liyoga.”

Mukali yavaka Yeso amaguta ha Bezani

⁶ Lwa Yeso yaali ha Bezani munyumba ya Simoni, uwaali niyalwala ovogere,

⁷ Mukali mulala yaza ku Yeso ni juba ya maguta gafunyaa umwayu agu vuguli vonene ligali. Yaagitulura ku mutwi gwigwe lwa yaali nalizaa.

⁸ Lwa aviigi veve valora yaga, vavihilirwa ligali, ni vavoola, “Kigira ki amaguta yaga gonekaa vuzwa?

⁹ Amaguta gu mwayu yaga gaali ganyala kugulizwa mabese gigulu ma vahane ku avadaka.”

¹⁰ Yeso yamanya zing'anagani ziavo, navavoolera, “Kigira ki mukubizaa mukali uyu kivi? Oyo ongoleeye ikindu ikilahi ligali.

¹¹ Munyi mulava na vadaka vuli kazozo, navuzwa simulava ninzi amadiku goosi mba.

¹² Mukali uyu unzituluriyi amaguta ukwetegekiza liyavirwa liange.

¹³ Agiligali muvooleraa, hoosi mu lirova, aha Ivangeri yiyi ilakilwazwe, ekekolwa chu mukali uyu akoli, kilakatalwi kumwizuliza.”

Yuda avugiliraa kuzaama Yeso

¹⁴ Maku mulala ku aviigi likomi na vaviri uwalangwa Yuda Esikarioti yazia ku avasaalisi vanene,

¹⁵ navateeva, “Mulaamba ki ninzaama Yeso ku munyi?” Vaamuvalizira ividonye salasini viefeza ni vamuha.

¹⁶ Kutura ing'inga yeyo, Yuda yenyeleriza inzira ni ing'inga indahi yu kuhaana Yeso kuvo.

Yeso Yalohiza kulia Lipasaka na aviigi veve

¹⁷ Ku lidiku liu kutanga lie lisavo liu mugadi gutaveeye na mamera, aviigi vazia ku Yeso ni vamuteeva, “Wenyaa kokolombere hayi iliilia lie Lipasaka?”

¹⁸ Yavativulira, “Muzie mu lidaala, munyumba yu mundu, ma mumuvolere, ‘Mwigizi avoora, ing'inga yange iduuki. Nyenya kokolera Lipasaka munyumba yooyo harara na aviigi vange.’ ”

¹⁹ Aviigi vaakora kuli Yeso yavalaga na valomba iliilia lie Lipasaka.

²⁰ Lwa gwaduuka mugolova, Yeso harara na aviigi veve likomi na vaviri viikara kulia.

²¹ Lwa vaali ni valiza, Yeso yavoola, “Agiligali muvooleraa, mulala ku munyi alaanzaama.”

²² Aviigi vavelera ligali, nivatanga kumuteeva sa mulala, “Mwami, ninzi noho?”

²³ Yeso yavativulira, “Uyu odongeraa harara ninzi mu sahani niyie uzizaa kunzaama!

²⁴ Yee, Umwana wa Adamu alakuza kuli gang'odwa kuye, mu Mang'oda Matakatifu, navuzwa, kilaamo keveeye ku oyo uzamaa Umwana wa Adamu! Vwali vwakaveeye vulahi musaza uyu alavula kwivulwa!”

²⁵ Yuda, muzaami yamuteeva, “Ligali Mwigizi! Uganaganaa ninzi noho?” Yeso yamutivulira, “Ivi ovooye.”

Lipasaka liu Mwami

²⁶ Lwa vaali ni valiza, Yeso yavugula umulango gwu mugadi, nahaana ilisaandiza ma nameganyia. Yahaana ku aviigi veve navoora, “Vuguli mulie; yigu nu muviri gwange. ”

²⁷ Yavugula ekekombe kandi, nasandiza imbiri wa Nyasaye, ma navaha navoora, “Munwi mwosi;

²⁸ yaga na masahi gange, agaveeye umuhuri gwi lilagana lia Nyasaye, agasundurwa kigira ilisamiifa liu uvwoni vwa vanyingi.

²⁹ Muvooleraa, sindanwa kandi iwaini ya mazabibu yaga mba, kuduuka lidiku yilio lia ndinwa iwaini yindi imbia harara ni munyi mu Vwami vwa Baba wange.”

³⁰ Maku viimba ulwimbu nukutura ichova kuzia mu Kiguru cha Mizeituni.

Yeso Yaporofetaa ndi Petero alamwambakana

³¹ Maku Yeso yavavolera, “Uvudiku vwa lero munyi mwosi muliruka, mundeke nzienyine kigira Mang'oda Matakatifu gavoora, ‘Ndakuya umwayi, na magondi galasalana.’

³² Nitali inyima wi lisimuguka liange, ndazia Galilaya imbiri winyu.”

³³ Petero yavolera Yeso, “Kali vosi ni vaasalana vakoleke, inzi sindakoleka mba!”

³⁴ Yeso yavolera Petero, “Inzi ngovolera ndi, uvudiku vwa lero idaywa nikikiri kulagula, ivi ulanyambakana haali kavaga.”

³⁵ Petero yamuvolera, “Kali niiva gandukira kukuza harara nivi, sindakakwambakane mba!” Aviigi vandi vosi vavoola ndio kandi.

Yeso Yasaala mu Gezisemane

³⁶ Yeso yazia harara na vigi veve havundu halangwa Gezisemane. Yavavolera, “Mwikale hano, nainzi nzie kusaalira hambiri hala.”

³⁷ Yazia harara na Petero kandi avayaayi vaviri va Zebedayo. Yaatanga kovelera, no kohenda mwoyo,

³⁸ navavoolera “Mbeeye no vovereri ovonene ligali mu mwoyo gwange, kali kuduuka ku likuza. Mwikale hano mulindi harara ninzi.”

³⁹ Yisunda hambiri hakekeke, naagwa hasi mam'mama nasaara navoora, “Baba wange, ni ganyalika, tuliza ekekombe chu vusaliri yiki ku inzi! Navuzwa gatava aguvulaliri vwange, nitali gave kuli ivi wenyaa.”

⁴⁰ Yirana ku aviigi vavaga zana, nanyoora ni vagona, na yavolera Petero, “Simunyala kohenza kali isa ndala mba?

⁴¹ Muhenze kandi musaale gase Setani alamugeriza. Umwoyo gwenyaa, navuzwa umuviri goveeye umudedekere.”

⁴² Yeso yazia lwa kaviri nasaara; “Baba wange, niganyalika kekombe chu vusaliri yiki kimbiti mburi kukinwa, navuzwa uvulariri vuvwo vokolwi.”

⁴³ Yirana kuvo kandi nanyoora vagona. Si vaali vanyara kohenza mba kigira izindoolo zinyingi.

⁴⁴ Yeso yavaleka kandi nazia, kusaala lwa kavaga, na yavoola makuva malala meere.

⁴⁵ Maku yirana ku aviigi veve, navateeva, “Mukegonaa kandi mukesosaa? Heenzi! Ing'inga iduuki, yu umwana wa Adamu amali kuvikwa mu makono ga avoni.

⁴⁶ Vuki, kuzie! Heenzi, unzamaa nguyio uduuki!”

Iligumirwa lia Yeso

⁴⁷ Lwa Yeso yaali nakemoloma navo, Yuda uwaali mulala ku aviigi likomi na vaviri yaduuka. Harara naye ikiduma kenene chamulonda nivaveeye ni vivavi kandi ivigurumi, avaari nivatumiywi na vasaalisi vanene navakulundu.

⁴⁸ Umuzaami yaali namali kuvaha kimanyiru navoora: “Umundu wanambuusi, niyie wa mwenya. Mu mugumiri!”

⁴⁹ Yuda yazia kilungika ku Yeso namuvolera “Mirembe jive ku ivi, Mwigizi,” kandi yamuvusa.

⁵⁰ Yeso yamuvolera, “Mulina, kola vwangu ichauzi kokora!” Maku avandu yavo vaza ni vagumira Yeso, nivadinya kuye ligali.

⁵¹ Mulala ku vigi va Yeso yanyira umukono gwigwe, nasomola ikivavi chiche kutura mu lwula, naatema umutumikiri wu Musaalisi Munene ugutu.

⁵² Yeso yamuvolera, “Yiranyia kivavi chicho mu lwula, kigira woosi utumikira ikivavi aliitwa ni kivavi.

⁵³ Munyi si mumanyi inzi nyara kulaanga Baba wange, naye andetere ulwene yilu zingelosi kuvita izielefu likomi na vaviri?

⁵⁴ Navuzwa, Amang'oda Matakatifu agaavoola yaga gaduukanaa gekoleka, ganyala kutwekizwa ndi?”

⁵⁵ Ing'inga zana yeyo, Yeso yamoloma ku Kiduma cha avandu vaza kumugumira, “Muuzi kung'umira ni vivavi ni vigurumi kuli mbeeye umunuuri? Madiku goosi ndaaveyange mu Litembeli ninzigizaa, na simwang'umira mba!

⁵⁶ Nitali yaga goosi gaakoleki kunangwa, agavaporofeti vaang'oda mu Mang'oda Matakatifu gaduuki kutwekizwa.” Kunangwa aviigi vosi vamuleka ni viiruka.

Yeso imbiri wi Kiyaalo

⁵⁷ Yavo avagumira Yeso vamuhira wa Kayafa, Musaalisi Munene, aha avigizi vi Lilaga na vakulundu vaali nivavuganiyi.

⁵⁸ Petero yamulondelera inyima kuduuka hamugizi hu Musaalisi Munene. Yingira ni yikala harara na vasikari aduuki kolola ichekolekaa.

⁵⁹ Avasaalisi vanene ni kiyaalo choosi venyeleriza amakuva go vovehi kugina Yeso, vaduuki ku mwita;

⁶⁰ navuzwa sivanyoola ichukwihambihiziraku mba, kali niiva avandu vovovehi vaali avanyingi. Lwu kumaliriza avandu vaviri vaza

⁶¹ ni vavoola, “Mundu uyu yavoola, ‘Nyara kwononyia Litembeli lia Nyasaye nukuliumbaka kandi ku madiku gavaga.’ ”

⁶² Musaalisi Munene yasingira nateeva Yeso, “Ivi oveeye ni cha unyala kutivula ku makuva ga vandu yava vavoola ku ivi?”

⁶³ Navuzwa Yeso yakiring'ana. Musaalisi Munene yamuvolera, “Ngwisuuhiza mu lieta lia Nyasaye oveeye mwoyo, okovolere niiva ivi niyie Mesia, Umwana wa Nyasaye.”

⁶⁴ Yeso yamuvolera, “Ivi ovola ndio. Navuzwa mbolera munyi mwosi: kutura ing'inga yene yiyi kuzizagilira, mulalora Mwana wa Adamu ni yikaye ku mukono mulungi gwa Nyasaye Wuvunyali, kandi ni yaazaa ku malesi gu mwigulu.”

⁶⁵ Hene yaho Musaalisi Munene yatandula izinguvu zizie, navoora, “Ovooye manyego! Kwenyera ki avalolekizi vandi? Kalunu muhuliyi linyego geege.

⁶⁶ Munyi muloraa ndi?” Vaamutivulira, “Adukanaa akuzi!”

⁶⁷ Maku, vamutuzira amate mumoni ni vamukubaga; na yavo avaamusamula

⁶⁸ vavoola, “Koporofetere Mesia! Kovolere nivwaha ukuduyi!”

Petero Yambakana Yeso

⁶⁹ Petero yaali ni yikaye ha mugizi lwa mulala ku vatumikiri vakana vu Musaalisi Munene yaza kuye navoora, “Ivi kandi ni mulala ku vaali na Yeso wa Galilaya.”

⁷⁰ Navuzwa Petero yambakana imbiri wa vosi navoora, “Simanyi aga ovola mba.”

⁷¹ Lwa yaali natura ichova mu kiliango chu mugizi, mutumikiri mukaana wundi yamulola navolera avandu vasaza vaali ho, “Mundu uyu ligali yaali harara na Yeso wa Nazareti.”

⁷² Petero yambakana kandi ni yisuha, “Inzi nzisuha ndi, si manyi umundu uyu mba!”

⁷³ Ing'inga engekeeke, avandu vasaza avaari nivasingiyi ho vaza ku Petero ni vamuvolera, “Agiligali ivi oveeye mulala kuvo kigira livoora liilio limanyia ndio.”

⁷⁴ Maku Petero yaatanga kwilaama nu kwisuuha, na avoora, “Nzisuha ligali nokovoora agiligali! Gaduukanaa Nyasaye asalirizi niiva simbolaa agiligali! Inzi manyi umundu uyu mba!” Ahene yaho idaywa yalagula,

⁷⁵ na Petero yizuliza amakuva ga Yeso yamuvolera, “Idaywa nikikiri kulagula, ivi ulanyambakana haali kavaga.” Yatura nazia ichova nalira ligali no vovereri.