Matayo 25 - KITABU KITAKATIFU

¹ “Ku ing'inga yeyo Uvwami vwu mwigulu vulakave kuli vakana avagima likomi avaavugura zitaya ziavo nivazia kwaganira oyo osereraa umwiha.

² Vatano kuvo vaali avasiru, na vatano vandi vaali avageri.

³ Lwa yavo avaari avasiru vaavugura zitaya ziavo, sivavugula amaguta gandi gokomeeda muzio mba.

⁴ Navuzwa avageri vaavugura amaguta gandi mu zi juba harara ni zitaya ziavo.

⁵ Lwa uwaseleraa umwiha yaalindagira, avakaana yavo vosi vateengeza, ma ni vagona.

⁶ “Navuzwa vudiku hagati, liali ho ni lilangilizana linene ‘Henza! Nguyio oyo osereraa umwiha yaazaa! Muturi muzie kumwaganira!’

⁷ Hene yaho avakaana vosi avagima vavuuka ni vetegekiza izitaaya ziavo.

⁸ Avasiru vavoolera avageri, ‘Kuhi ku maguta ginyu makekeeke, kigira izitaaya zietu zisimaa!’

⁹ Navuzwa avageri vavavolera, ‘Awa, sigalakuduuka ni munyi mba! Ni vulahi muzie mu liduka mwiguliri aginyu.’

¹⁰ Navuzwa, lwa vakana vasiru vaali ni va kiziyi kugura amaguta, Mwami wa seleraa mwiha yaza. Avakaana vagima avageri avaari nivetegeki, vingira harara naye munyumba ye keserero, ma kiliango ni kihanwa.

¹¹ “Inyima avakaana vagima avasiru vaza. Vavoola, ‘Mwami, mwami, kwiguliri kiliango!’

¹² Navuzwa yavativulira, ‘Agiligali muvooleraa, Inzi si mumanyi mba!’ ”

¹³ Kunangwa Yeso yamaliriza navoora, “Mugerihi, mulindi, kigira si mumanyi lidiku anoho ing'inga mba.”

Lugano lwa avatumikiri vavaga

¹⁴ “Uvwami vwu mwigulu vulakave kuli ndi. Mundu mulala yenya kuzia mu kivala kindi. Yalanga avatumikiri veve navaha ivindu vivie vamulindili.

¹⁵ Yavaha sa mulala kolondekana ni zinguru zizie. Mulala yamuha ivigero vitano via mabese ivilangwa zitalenta, wundi vigero vie zitalenta ziviri; na wundi kegero chi italenta ndala, ma nazia.

¹⁶ Uyu wahevwa zitalenta zitano yazia naakiranyia nanyoora uvukala vwi zindi zitano.

¹⁷ Munzira ndala nzere, umutumikiri wahevwa zitalenta ziviri yanyoora vukala zitalenta zindi ziviri.

¹⁸ Navuzwa oyo uwahevwa italenta ndala yazia naavisa kegero chu Mwami weve mu marova.

¹⁹ “Inyima wa madiku manyingi, mwami wa vatumikiri yavo yaza. Yaatanga koteeva kuli vuli mulala yatumikira ekegero cha yahevwa.

²⁰ Mutumikiri wahevwa zitalenta zitano yaza namuvolera, ‘Mwami, wamba zitalenta zitano. Henza, mbeeye ni zindi zitano, uvukala vwa ndaanyoora.’

²¹ Mwami weve yamuvolera, ‘Okoli vulahi, umutugwa mulahi kandi umusuuvirifu. Walinda vulahi ivindu vikekeke; ndakuviika ove umulindi wi vindu ivinyingi. Hamba wingiri mu vusangali harara nu mwami woovo.’

²² “Umutumikiri wahevwa zitalenta ziviri yaza navoora, ‘Mwami, wamba zitalenta ziviri. Henza, mbeeye ni zitalenta zindi ziviri; uvukala vwa ndanyoora.’

²³ Mwami weve yamuvolera, ‘Okoli vulahi mutumiri mulahi, kandi umusuuvirifu. Waali umusuuvirifu ku vindu vikekeke; ndakuviika kulinda ivindu ivinyingi. Hamba wingiri usangale ninzi!’

²⁴ “Navuzwa oyo uwahevwa ekegero kilala chi talenta yaza navoora, ‘Mwami, ndaamanya ivi oveeye mundu mululu. Ogesanga ha wavula kutaga, kandi uvungiza ha wavula kusalanyia.

²⁵ Inzi ndaatia ma ninzia kuvisa vudinyu italenta yooyo mu marova. Henza! Ngiyi iyaali iyooyo; givuguli.’

²⁶ “Mwami weve yamutivulira, ‘Ivi umutumikiri mudamanu kandi mugata! Wamanya inzi ngesaa aha ndaavura kutaga, kandi mbungizaa aha ndaavura kusalanyia uvuguza.

²⁷ Vwali vwakaveeye vulahi ulavika italenta yange mu bengi, nainzi ngano ndaali mbuguli ziosi harara nu vukala vwazio lwa nzilani ndi.

²⁸ Kunangwa vuguli italenta yeyo ma muhe oyo wi zitalenta likomi.

²⁹ Kigira uyu oveeye navio, alahevwa ivindi, navuzwa uyu utaveeye ni kindu, alanyagwa kali icha aveeye nacho.

³⁰ Umutumikiri uwavula koleta iviuvukala uyu, mu musiuvi ichova mu kisundi! Uwene yeyo alalira nu kudiedieyiza amiinu.’

Likalaga lie keheri

³¹ “Lwu Umwana wa Adamu aliiza kuli Umwami harara ni zingelosi vosi alikala ku endeve yu vwami vwivwe,

³² na zihiiri ziosi zilavungizwa imbiri weve. Naye alakavavukanyie kuli umwayi yavukanyia amagondi kutura ku zimburi.

³³ Alaviika amagondi ku mukono gwigwe mulungi, na zimburi ku mukono gwigwe mumosi.

³⁴ Ma Mwami alakavoolere avaveeye ku mukono gwigwe umulungi, ‘Hambi munyi avaagasizwa na Baba wange munyore miandu ju vwami vwa mwalomberwa kutura lwi lirova liatanga.

³⁵ Ndaali ninzara na munyi mwamba chu kulia; ndaali nu vuluhu na munyi mwamba chu kunwa. Ndaali umugeni na munyi mwanyingiriza.

³⁶ Ndaali chahonyo na munyi mwambika izinguvu. Ndaali umulwaye na munyi mwandeenda. Ndaali muvuhambe, na munyi mwaza kondola.’

³⁷ “Ahene yaho avalungi valakavoole, ‘Mwami, ni ng'inga ki ya kwakolola noveeye ninzara ma nikukuha ichukulia, anoho noveeye nu vuluhu ma ni kukuha ichukunwa?

³⁸ Ni ng'inga ki ya kwakolola noveeye umugeni ma nikukwingiriza anoho noveeye chahonyo ma nikukuviika?

³⁹ Ni ng'inga ki ya kwakolola noveeye umulwaye anoho mu vuhambe ma nikuza kokolola?’

⁴⁰ Mwami alakavativuliri, ‘Muvooleraa, choosi cha mwakolera mulala ku avamwavo vange avakeekeke yava, mwakolera inzi!’

⁴¹ “Alakavoolere avaveeye ku mukono gwigwe mumosi, ‘Tuli ku hizi munyi avalaamwa na Nyasaye! Muzie mu muliru gwi mihiga ni mihiga ugwalomberwa Setani harara ni zingelosi veve!

⁴² Kigira, ndaali ninzara na munyi simwamba ichukulia. Ndaali nu vuluhu na simwamba amazi.

⁴³ Ndaali umugeni na simwanyingiriza. Ndaali chahonyo na simwambika mba; ndaali umulwaye kandi mu vuhambe, navuzwa munyi simwaninda mba.’

⁴⁴ “Maku valakamutivuliri, ‘Mwami, ni ng'inga ki ya kwakolola noveeye ninzara, anoho nu vuluhu anoho noveeye umugeni, anoho chahonyo anoho noveeye umulwaye, anoho mu vuhambe ma nikuvula kuuza kokokonya?’

⁴⁵ Umwami alakavavoolerc, ‘Muvooleraa, choosi cha mwavura kokolera mulala ku vakekeeke yava, mwavura kokolera inzi.’

⁴⁶ Kulwayago, valazia konyoora ikivi na maduywa gi mihiga ni mihiga, navuzwa avalungi valanyora livamwoyo lie mihiga ni mihiga.”