Matayo 24 - KITABU KITAKATIFU

Yeso yamolomkigira Lidivizwa lie Litembeli

¹ Yeso yatura mu Litembeli, kandi lwa yaali nazizaa, aviigi veve vaza kuye, mvamumanyia zinyumba zie Litembeli.

² Navuzwa yavativulira, “Muloraa ivindu yivi viosi? Agiligali muvooleraa, si lilakatigale hano ligina kali lilala ni lisiingiyi mu vogono vwalio mba; goosi galakavunguluki.”

Ikivi ni lidambizwa

³ Lwa Yeso yaali niyikaye mu Kiguru cha Mizeituni, aviigi veve vaza kuye machiriri nivamuteeva, “Kovolere, ivindu yivi vilakakoleke ing'inga ki? Ni kelolekizu ki ikilimanyia iliiza liilio, kandi ekeheri chi lirova?”

⁴ Yeso yavativulira, “Mugerihi! Mutaleka umundu woosi kali mulala amugaade.

⁵ Kigira avanyingi valaza ni vatumikira ilieta liange ni vavoola, ‘Inzi niyie Mesia!’ Navo valagotiza avandu vanyingi.

⁶ Mulahulira amahi nulusuma lwa amahi, navuzwa mutahenda mioyo mba kigira ivindu yivi vilaza, navuzwa ekeheri chene kikiri kuduuka.

⁷ Ihiiri ilavukira ihiiri yindi; uvwami vulavukira uvwami vundi; halavaho ni zinzara kandi kodegera kwi lirova ihale nihale.

⁸ Ivindu yivi viosi viveeye vuzwa kuli litanga lie lilumwa lia uyu oveeye ni inda.

⁹ “Maku ing'inga yeyo mulakagumirwi, mudambizwi kandi mwitwi. Zihiiri ziosi zilakamusuli kigira ilieta liange.

¹⁰ Vandu avanyingi valikigitara no koleka ilisuuvira liavo. Valazamana aveene naveene nu kuduunyirana

¹¹ Avaporofeti vovovehi avanyingi valaza na valagotiza avandu vanyingi.

¹² Kigira vuchamu vulamedeka, kandi uvuyanzi vwa vanyingi vulageha.

¹³ Navuzwa uyu ulakikuziri kuduuka ku keheri, alahonywa.

¹⁴ Ekeheri ni kikiri kuduuka, Ivangeri yu Vwami vwa Nyasaye iliilwazwa mu lirova liosi eve ekelolero ku zihiiri ziosi, maku keheri kilakaduuki.

Vusaliri vonene

¹⁵ “ Lwa mulilora “Kindu kidamanu ligali keleetaa lidiviza” lia mu muporofeti Danieli yavoola nasingiyi Havundu Hatakatifu, hene yaho osomanga amanye.

¹⁶ Avandu vaveeye mu Vuyuda virukiri mu vigulu.

¹⁷ Oyo oveeye ku kcsegese chi inyumba atiika kandi kuvugura ikindu munyumba yeeye kandi mba.

¹⁸ Na uyu oveeye mu mulimi atiirana yengo kuvugura inguvu yeeye mba.

¹⁹ O, kilaamo keveeye ku yavo avaveeye ni inda, kandi ku yavo avanyunyia mu madiku yago!

²⁰ Musaale Nyasaye ndi iliiruka lienyu litakave ing'inga yu vukindu, anoho ku ilidiku lie Lisabato!

²¹ Kigira ing'inga yene yeyo ikivi kenene kilakaveho likikiri kololeka ku kutura litanga lie lirova kuduuka lero. Silakaveho ing'inga yindi kandi mba.

²² Navuzwa Nyasaye umali kwimbihiza amadiku yago. Alavula kokora ndio, ngano sihaveeyeho nu mundu woosi uwakahoni mba. Navuzwa kigira avatovole veve, Nyasaye alakimbihiza madiku yago.

²³ “Maku niiva umundu namuvolera, ‘Henza, Mesia nguyu aveeye hano!’ Anoho, ‘Nguyio aveeye hala!’ Mutamusuuvira mba.

²⁴ Kigira valatulira mesia vovovehi, na vaporofeti vovovehi. Valakola ivilolekizu vinene vaduuki kugaada kali avatovole va Nyasaye, niganyalika.

²⁵ Henza! Inzi mali kumuvolera ing'inga nikikiri kuduuka.

²⁶ “Anoho nivamuvoolera, ‘Heenzi, aveeye mwigendanyama!’ Mutazia yo mba. Anoho, ‘Eleenzi, yiivisi munyumba ivuliri!’ Mutasuuvira mba,

²⁷ kigira kuli oloheni long'ereng'anaa kutura ivugwi kuduuka imadioli, kandi ni ndio iliiza liu Umwana wa Adamu lilakave.

²⁸ “Havundu hi miviri mikuzu jiveeye niho ahi zindizu zievungizaa.

Iliiza liu Umwana wa Adamu

²⁹ “ Inyima wi linyang'ana lia madiku yago, iliuva lilamwaminywa, mweli si guliaka; zing'ereng'ani zilakaaguluki kutura mwigulu; ni vindu viosi viezingulu viu mwigulu vilakadengeyizwi.

³⁰ Maku kelolekizu chu Umwana wa Adamu kilakaloleke mwigulu, na ahene yaho zihiiri ziosi zie lirova zilakaliri, lwa valilola Umwana wa Adamu ni yazaa ku malesi ni zinguru nu vukumi vonene.

³¹ Naye alatuma zingelosi veve ni kisiriva chu mwoyo munene, navo valavungiza avatovole veve vatuli zimbega zine ziosi zie lirova, kutura ku keheri yiki kuduuka ku keheri kindi chi lirova.

Amigizu kigira musaala gwu mukuyu

³² “Kalunu mwigi lugano yilu kutura ku mukuyu. Hene yaho lwu ulusia lwagwo lutanga kugwa lodoto ni lusivuka amatu, mumanya ndi ing'inga yi kivasu eveeye ahimbi.

³³ Ni ndio kandi, ing'inga ya muloraa vindu yivi viosi ni viekoleka, mumanye Umwana wa Adamu aveeye ahimbi ligali.

³⁴ Agiligali muvooleraa, likula yili si lilavita ivindu yivi viosi ni vikikiri kokolwa mba.

³⁵ Ligulu ni lirova vilavita, navuzwa amakuva gange sigalivita mba.”

Sihaveeyeho nu umanyi ing'inga

³⁶ “Navuzwa lidiku yilio ni ing'inga yeyo sihaveeyeho nu mundu umanyi kali zingelosi vu mwigulu, kali Umwana, navuzwa Baba yenyine.

³⁷ Kuli gaali mu madiku ga Nuhu kandi liduka liu Umwana wa Adamu lilava kandi kuli ndio.

³⁸ Kigira kuli gaali mu madiku yago, amazi manene nigakiri kuuza, avandu valia kandi ni vanwa, avasaza na vakali vaahilana kuduuka lidiku lia Nuhu yingira mu liato;

³⁹ kali sivamanya ichaali ni chekoleka mba, kuduuka lwa amazi gaaza ni gavahila vosi. Galakave ndio kandi ku lidiku liu Umwana wa Adamu alakaaze.

⁴⁰ Ing'inga yeyo, avandu vaviri valakave nivayinziraa mu mulimi; mulala alakavugulwi, nu wundi alakatigale.

⁴¹ Avakali vaviri valakave ni vasiezaa ku lugina; mulala alakavugulwi na wundi alakatigale.

⁴² “Kigira yaga, lindi, kigira si mumanyi lidiku liu Mwami winyu aliiza mba.

⁴³ Navuzwa mwizurizi likuva yili Mwene inyumba alava niyamanya ing'inga yu mwivi yaazaa, ngano yakalindi, kandi siyakaleki inyumba yeeye ivunagwe mba.

⁴⁴ Kunangwa, munyi mwetegeke kandi kazozo, kigira Umwana wa Adamu alakaze ing'inga ya mutaganagana.”

Mutumikiri musuuvirifu nutali musuuvirifu

⁴⁵ Yeso yavoola, “Nivwaha oveeye mutumikiri musuuvirifu kandi mugeri? Ni uyu wu mwami weve aviikaa ave munene ku avinyumba yeeye, kuvaha chukulia chavo ing'inga idukanaa?

⁴⁶ Aveeye nuvugasu mutumikiri wu Mwami weve aliiza ma alamunyoole nakora ndio!

⁴⁷ Agiligali muvooleraa, alaviika mutumikiri oyo asingiliri ivindu vivie viosi.

⁴⁸ Navuzwa naava mutumikiri mudamanu, alevoolera umwene mu mwoyo gwigwe, ‘Mwami wange akizia,’

⁴⁹ ma atange kukuya avatumikiri vache, kandi kulia nu kunwa harara na vahambiki,

⁵⁰ mwami weve alakaze ku lidiku lia oyo ataganagana kandi ing'inga ya atamanyi.

⁵¹ Alakamuhe amageri kandi alakamusiuvi ichova ma amuviiki mu kidieli kilala harara na vagadi. Halava ni lilira kandi lidiedieyiza amiinu.