Matayo 22 - KITABU KITAKATIFU

Lugano lwi lilia lie keserero

¹ Yeso yatumikira kandi izing'ano lwa yamoloma ku avandu.

² “Uvwami vwu mwigulu voveeye kuli mwami uwaalombera umwana weve iliilia lie keserero.

³ Yatuma avatumikiri veve avaari nivagerihiziywi kuuza mu keserero. Navuzwa si venya kuuza mba.

⁴ Yatuma kandi avatumikiri vandi, navoora: Muvoolere yavo avagenihiziywi, ‘Inzi mali kolomba iviukulia viange; izigiriki ni zing'ombe ziange zing'omeru zimali kwitwa. Vindu viosi vitegeki. Hambi mu keserero!’

⁵ Navuzwa sivavugula mu ologendo mba. Vihambira imiyinzi: mulala mu mulimi gwigwe, wundi mu liduka lilie;

⁶ avandi vagumira avatumikiri veve zana ni vaavakuya ma nivaviita.

⁷ Mwami oyo yavihilirwa, natuma avasikari veve nivadiviza aviiti yavo, nivasamba lidaala liavo.

⁸ Kunangwa yavolera avatumikiri veve: ‘Iliilia lie keserero lietegeki ligali, navuzwa avaari ni vamali kogenihizwa sivadukanaa mba.

⁹ Kalunu muzie mu vwavukaniru vwi zinzira, na vosi avamunyoola, muvagenihizi vaze mu keserero.’

¹⁰ Avatumikiri vaatura nivazia mu zinzira, nivaleeta avandu vosi avavanyooraa, avadamanu na valahi. Maku inyumba ye keserero yizula avageni du.

¹¹ “Lwu mwami yingira kolola avageni, yanyoora mundu mulala uwavula kwivika inguvu ye keserero.

¹² Mwami ya muteeva, ‘Mulina, wingiyi ndi muno nutaveeye ninguvu ye keserero?’ Naye yakiring'ana.

¹³ Hene yaho mwami yavolera avatumikiri veve: ‘Muvohi amakono ni virenge, mu siuvi mu kisundi ichova. Uwene yeyo alalira nu kudiedieyiza amiinu.’ ”

¹⁴ Yeso yamaliriza ni livoora, “Avanyingi valangwa, navuzwa avakeekeke vaatovoleywi.”

Amateeva kigira kulitunga uvusuru ku Kaisari

¹⁵ Avafarisayo vazia kovolerana kuli vanyara kogeriza Yeso na mateeva.

¹⁶ Kunangwa, vaatuma kuye valala ku aviigi vaavo harara na avasangi vu muganda gwa Herodi. Vamuteeva, “Mwigizi, kumanyia ivi oveeye umundu wiligali, kandi wigiza uvulariri vwa Nyasaye mu agiligali. Ivi siutiizaa mundu woosi mba, kigira ovonene vwu mundu anoho iligondo si viveeye ikindu ku ivi mba.

¹⁷ Kunangwa kovolere, uganagana ndi? Ni vulahi kutunga uvusuru ku Kaisari, anoho mba?”

¹⁸ Navuzwa Yeso yamanya uvudamanu vwi zing'anagani ziavo navavoolera, “Avagaadi munyi, kigira ki mungerizaa?

¹⁹ Mumanyie mabese gu kutunga uvusuru.” Navo vamuleetera idinari.

²⁰ Yeso yavateva “Kifananyi yiki kandi iling'oda yili ni via vwaha?”

²¹ Vaamutivulira, “Ni via Kaisari.” Ahene yaho Yeso yavavolera, “Muhe Kaisari ivindu via Kaisari, na Nyasaye ivindu via Nyasaye.”

²² Lwa vahulira amativuli yago, vagenya. Na vamuleka nivazia.

Liteeva kigira lisimuguka

²³ Ku lidiku zana yilio, avalala ku Avasadukayo avavooraa lisimuguka lia vakuzu siliveeye ho, vazia ku Yeso nivamuteeva:

²⁴ “Mwigizi, Musa yavoola ndi, ‘Mundu naleta umukali maakuzi vugira koleka avana, gadukanaa amwavo weve yiranyie umukunzakali oyo umwandu, ma yivuliri amwavo weve avana.’

²⁵ Vaali ho avamwavo saba. Wu kutanga yaleeta umukali ma nakuza vugira avana. Yalekera amwavo weve ukwilanyia mukunzakali weve mwandu.

²⁶ Gaali ndio kandi ku amwavo wa kaviri uwa kavaga, kali kuduuka ku uwa saba.

²⁷ Inyima wa avamwavo yavo vosi kukuza, mukunzakali oyo naye kandi yakuza.

²⁸ Kunangwa ku lidiku lwa vakuzu valisimuguka, mukunzakali oyo aliva mukali wa vwaha ku avamwavo saba yavo? Vosi vaali naye kuli mukali wavo.”

²⁹ Yeso yavativulira, “Agiligali munyi muveeye avadamanu, kigira si mumanyi Mang'oda Matakatifu, anoho zinguru zia Nyasaye mba.

³⁰ Lwa avakuzu valisimuguka, si valiselera avakali kandi sivaliselerwa mba. Valakave kuli zingelosi mwigulu.

³¹ Navuzwa ku makuva gi lisimuguka lia vakuzu, mukikiri kosoma aga Nyasaye yamuvolera? Yavoola,

³² ‘Inzi mbeeye Nyasaye wa Aburahamu, Isaka Nyasaye wa Yakobo?’ Ku, siaveeye Nyasaye wa avakuzu, navuzwa aveeye Nyasaye wa avaveeye mwoyo.”

³³ Lwi Viduma viahulira yaga, vagenya ligali ku amigizu geege.

Lilago linene

³⁴ Lwa Avafarisayo vahulira ndi Yeso umali kukiring'anyia Avasadukayo, vaavungizana harara.

³⁵ Mulala kuvo, mwigizi wi Lilaga lia Musa yaageriza Yeso ni liteeva.

³⁶ Yateeva “Mwigizi, ni lilago ki iliveeye linene ku Malago ga Musa goosi?”

³⁷ Yeso yamutivulira, “Uyaanze Mwami Nyasaye woovo nu mwoyo gugwo gwosi, ni livamwoyo liilio liosi, no vogeri vuvwo vwosi.

³⁸ Yili nilio lilago linene liu kutanga.

³⁹ Lia kaviri liveeye kuli ndio: ‘Uyaanze mutende woovo kuli wiyanza mwene!’

⁴⁰ Malago goosi aga Musa, harara na miigizu ga vaporofeti, gidiira ku malago gaviri yaga.”

Liteeva kigira Mesia

⁴¹ Lwa Avafarisayo valala vaavungizana harara, Yeso yavateva,

⁴² “Munyi muvooraa ki ku makuva ga Mesia? Aveeye wi kisukururwi cha vwaha?” Vaamutivulira, “Aveeye wi kisukururwi cha Daudi.”

⁴³ Yeso yavateva, “Kigira ki lwa Daudi yaali mu zinguru zia Roho Mutakatifu, yamulanga ‘Mwami?’ Daudi yavoola,

⁴⁴ ‘Mwami yavolera Mwami wange: Yikala hano ku mukono gwange mulungi kuduuka lwa mbikaa avasigu vovo kuva isi wi virenge vivio.’

⁴⁵ Niiva Daudi yaalanganga Mesia ‘Mwami,’ Mesia anyala ndi kuva kisukururwi cha Daudi?”

⁴⁶ Sihaali ho nu mundu uwanyala kumutivulira ilikuva mba. Kutura lidiku yilio, sihaali ho nu mundu uwaluvilira kandi kumuteeva iliteeva mba.