Matayo 21 - KITABU KITAKATIFU

Yeso yingiraa Jerusalemi ni sango enene yi liguuta

¹ Lwa Yeso harara na aviigi veve vaali ahimbi kuduuka Jerusalemi, vaza Bezifage mu Kiguru cha Mizeituni. Hene yaho Yeso yatuma aviigi veve vaviri vitange imbiri

² na vavoolera, “Muzie mu lidaala iliveeye imbiri winyu. Ahene yaho mulanyola isukiri nevoheeywi harara ne kemoli chayo. Muzivoholore na mundeetere.

³ Niiva mundu alamuteeva kindu choosi, mumuvolere, ‘Mwami azienyaa,’ Na hene yaho alaleka muzileete.”

⁴ Likuva yili liekoleka ndi gaduuki kudukizwa agavoolwa nu muporofeti:

⁵ “Muvoolere lidaala lia Jerusalemi, Henza, mwami woovo yazaa ku ivi! Aveeye muhooma kandi aniini ku isukiri, kemoli chibunda.”

⁶ Kunangwa aviigi veve vazia ni vakora kuli Yeso yavalaga.

⁷ Valeta ibunda harara ne kemoli chayo, ni vaala ku zinguvu ziavo, kandi Yeso yikala ku isukiri.

⁸ Kiduma kenene chaala izinguvu ziacho kunzira, na vandu vandi vatema iziisia zie misaala ni vaala kunzira.

⁹ Kiduma cha avandu valala vaamwimilira na avandi nivamulonda inyima. Vataanga kuhanzuka nivavoora, “Hosana ku Umwana wa Daudi! Agasizwi uyu uzaa mu Iieta liu Mwami! Yizominywi Nyasaye oveeye yigulu mwigulu!”

¹⁰ Lwa Yeso yaali ni yingiraa Jerusalemi, lidaala liosi liali ni ligoonya. Avandu vateva, “Ivwaha uyu?”

¹¹ Na avandu vaali mu viduma vaativura, “Uyu nu muporofeti Yeso, kutura Nazareti, lidaala lia Galilaya.”

Yeso yingira mu Litembeli

¹² Yeso yingira mu Litembeli lia Nyasaye, nakunga avandu vosi avaari nivagulizaa nukugula ivindu. Yaatung'aminya izimesa zia vakiranyi va mabese, ni zindeve zia yavo avagulizaa vidudi.

¹³ Yavavolera, “Gang'odwa mu Mang'oda Matakatifu ndi Nyasaye yavoola, ‘Litembeli liange lilalangwa inyumba yu kusaala.’ Navuzwa munyi mugekoli kuva luhangaywa lwa vanuuri.”

¹⁴ Avavoku na avalema vaza kuye mu Litembeli, naye yavahonyia.

¹⁵ Avasaalisi vanene kandi Avigizi vi Lilaga vavihilirwa ligali lwa valora agokogenyia ga Yeso yakola, na avana ni vaahanzuka mu Litembeli ni vavoola: “Hosana ku Umwana wa Daudi.”

¹⁶ Kunangwa vateva Yeso, “Uhuliraa gavavoola?” Yeso yavativulira, “Yee, ligali mbulira. Simwasoma Mang'oda Matakatifu yaga? Wayigiza avana vakekeeke na avana vanuuna vahane lizominya liduukiru ni minwa jaavo.”

¹⁷ Maku Yeso yavaleka natura mu lidaala zana nazia Bezani, uwayagona.

Yeso yalaama musaala gwu mukuyu

¹⁸ Lwa Yeso yaali ni yirana mu lidaala mugambazuri, yaali ninzara.

¹⁹ Yalora mukuyu kunyasi kwi inzira, maku yazia kugwo, navuzwa si yanyoora kindu kugwo mba, nigatali amatu geng'ine. Yagovoolera, “Utama kandi amakuyu mihiga josi mba!” Ahene yaho, mukuyu gwaniala.

²⁰ Lwa aviigi valora yaga, vagenya ligali ni vateva, “Kigira ki mukuyu yigu guniaye vwangu?”

²¹ Yeso yavativulira, “Ligali muvooleraa, munyi ni muva ni lisuuvira vugira kuhayahayiza, si munyala kokora yaga geng'ine agakoleywi ku mukuyu, navuzwa kali munyala kovoolera kiguru yiki, ‘Yigingi wisigisi mu inyanza,’ na galakolwa ndio.

²² Ni muva ni lisuuvira, kindu choosi chamuteeva mu lisaala mulakenyoola.”

Amateeva kigira vunyali vwa Yeso

²³ Yeso yingira kandi mu Litembeli ni yigiza. Lwa yaali ni yigizaa, avasaalisi vanene na vakulundu vamuteeva, “Okolaa ivindu yivi ku vunyali vwa vwaha? Nivwaha wakuha uvunyali yivu?”

²⁴ Yeso yavativulira, “Inzi kandi ndamuteva liteeva lilala. Ni mundivulira, inzi kandi ndamuvolera vunyali vwa ngolera mu vindu yivi.

²⁵ Vunyali vwa Yohana yabatiziraa vwatula ku vwaha? Vwatula ku Nyasaye anoho ku vandu?” Vatanga lihangalizana aveene ku vene ni vavoola, “Ni kovora, ‘Vwatula ku Nyasaye,’ alakoteeva, ‘Kigira ki nimuvula kumusuuvira?’

²⁶ Na ni kovora, ‘Vwatula ku avandu,’ kutizaa kiduma cha vandu, kigira vosi vavugilira ndi Yohana yaali muporofeti.”

²⁷ Kunangwa, vaamutivulira, “Kumanyi mba!” Yeso yavavolera, “Kandi inzi sindamuvolera vunyali vwa ngolera mu ivindu yivi mba.”

Lugano lwa avana vaviri

²⁸ “Munyi muganaganaa ki? Mundu mulala yaali na vayaayi vaviri. Yazia ku muyaayi munene namuvolera, ‘Umwana wange, lero zia uyinziri mu mulimi gwi mizabibu.’

²⁹ Umwana oyo yamuvolera, ‘Nziza mba!’ Navuzwa inyima yagirunganyia zing'anagani zizie, nazia kuyinzira.

³⁰ Mundu oyo yazia ku umwana weve winyima namuvolera malala meere kandi. Naye yamuvolera: ‘Yee baba, nziza,’ navuzwa siyaazia kuyinzira mba.

³¹ Ku ni mwana ki ku vaviri yava wakola lienya lia baba weve?” Vaamutivulira, “Umwana wimbiri.” Kunangwa Yeso yavavolera, “Agiligali muvooleraa, avasololi vuvusuuru na avaheyi valingira mu Vwami vwa Nyasaye imbiri winyu.

³² Kigira Yohana yaza ku munyi naamumanyia inzira yu vulungi, na munyi si mwamusuuvira mba. Navuzwa avasololi vuvusuuru na vaheyi vaamusuuvira. Kali lwa mwaali ni mwa kalola agene yago goosi, si mwiganira, nu kumusuuvira mba.”

Lugano Iwu mulimi gwi kizabibu na valimi vadamanu

³³ Yeso yavoola, “Huliri lugano lundi: Mundu mulala mwene mulimi yasimika kizabibu; kandi yeeva ulugaga nayava mu kiminilu chiwaini. Yumbaka umunaara gwokohenzeraku. Inyima yatekela avalimi vandi, ma nazia mu kivala kindi ihale.

³⁴ Lwi ing'inga yi ligesa mazabibu yaduuka, yatuma avatumikiri veve ku valimi ndi vamuhe ku mazabibu geege.

³⁵ Avalimi yavo vagumira avatumikiri veve ni vaakuya mulala, wundi ni vamwita, wundi ni vamulasa na magina.

³⁶ Mwene kizabibu yatuma avatumikiri vandi kandi, avanyingi kuvita avaari vukutanga. Avalimi yavo vaavakola kuli ndio kandi.

³⁷ Navuzwa mu limalirika, yatuma umwana weve mwene, naganagana ndi, ‘Valahaana uluyali kuye.’

³⁸ Navuzwa lwa avalimi yavo valora umwana weve vavolerana, ‘Uyu niyie ulinyoola imiandu; gendi kumwiti, ma kuvuguli imiandu jije!’

³⁹ Maku vamugumira ni vamuhira ichova wi kizabibu, nivamwita.”

⁴⁰ Yeso yavateva, “Kunangwa lwu umwene kizabibu aliiza, alikola ki ku avalimi yavo?”

⁴¹ Vaamutivulira, “Alakadivizi ligali avandu vadamanu yavo; na alakavugiliri avalimi vandi koko vavuguli ikizabibu yicho avalimuha ekedonye chiche chi ligesa lie mizabibu ku ing'inga idukanaa.”

⁴² Yeso yavateva, “Si mwasoma likuva yili mu Mang'oda Matakatifu? ‘Ligina liavumbaki vasuura limali kokolwa ligina linene liu mukoona. Mwami niyie wakola yaga; na gaveeye gokogenyia mu zimoni zietu!’

⁴³ “Kigira yaga muvooleraa, munyi mulanyagwa Uvwami vwa Nyasaye ma vohevwe avandu vi ihiiri yindi, avanyala kwama amakuyu amalahi.”

⁴⁴ Uyu ugwa ku ligina yili alavunikana ividonye; na ni ligwira umundu woosi, lilamusionolanyia.

⁴⁵ Lwa avasaalisi vanene na Avafarisayo vahulira zing'ano zizie yizi, vamanya avoora amakuva gaavo.

⁴⁶ Kulwayago venya inzira yu kumugumira. Navuzwa vaatia ividuma avavoora ndi, Yeso aveeye muporofeti.