Matayo 18 - KITABU KITAKATIFU

Nivwaha oveeye munene mwigulu?

¹ Ing'inga yeyo aviigi vaza ku Yeso, ni vamuteeva, “Ni vwaha oveeye munene mu Vwami vwu mwigulu?”

² Yeso yalanga umwana mukekeeke, na amusingiriza hagati haavo,

³ navoora, “Muvooleraa agiligali ndi, ni mutagirung'ana mugwi kuli avana vakekeeke, munyi simulingira ligali mu vwami vwu mwigulu mba.

⁴ Ku vosi uwegehizaa kuli umwana mukekeeke uyu, aveeye umunene mu Vwami vwu mwigulu.

⁵ Ku vosi uwingirizaa umwana mukekeeke kuli uyu ku lieta liange, yingirizaa inzi.

Kwikigitariza avandi

⁶ “Ku vosi okokora mulala ku vakekeeke yava kuvula kusuuvira mu inzi, vwakaveeye vulahi lugina lonene ni lwakasungiywi mu ligoti lilie ma asiuvwi mu luliva lwinyanza.

⁷ O, kilaamo keveeye mukivala kigira ivindu vilombaa avandu kokora uvwoni. Amagerizu galaaza, navuzwa kilaamo keveeye ku lirova kigira viveeye mu ivindu vikola avandu kugwa muvwoni. Amagerizu kuli yaga gaaza kazozo, navuzwa kilaamo keveeye ku mundu uyu wa magerizu yaga gaaza kuvitira muye!

⁸ “Niiva mukono gugwo anoho kerenge chicho ni kikwikigitaliza ma vikolombe okole uvwoni uvikalage ma uvisiuvi ihale. Ni vulahi ivi kwingira mu livamwoyo vugira mukono anoho kerenge, kuvita kusiuvwa mu muliru gwi mihiga ni mihiga noveeye na makono gombi anoho ivirenge viombi.

⁹ Emoni yooyo nekolomba okole uvwoni, ugitulizi ma ugisiuvi. Ni vulahi ukwingira mu livamwoyo noveeye ne emoni ndala, kuvita kusiuvwa mu muliru gwe gehena noveeye ni zimoni zizio ziombi.

Lugano lwi ligondi liagota

¹⁰ “Mulole ndi muvuli kuchaya mulala ku vakekeeke yava inzi muvooleraa. Zingelosi ziavo mwigulu, ziveezaa imbiri wa Baba wange vuli kazozo. [

¹¹ Mwana wa Adamu yaza kohonyia avaagota.]

¹² “Muganaganaa ndi? Mundu naava naveeye na magondi mia, ma agotizi lilala kugo, amanyaa akola ki? Alekaa agatigaye makomi tisa na tisa mu vigulu, kandi azia kwenya iligoti lila.

¹³ Niiva alinyoora; muvooleraa agiligali, alisangaliraa kuvita vusangali vwa asangalira agandi tisa na tisa, agavula kogota gala.

¹⁴ Kandi nindio, Baba winyu oveeye mwigulu siavugiliraa mulala ku vakekeeke yava agote mba.

Aminyu umali kukwonera

¹⁵ “Amwavo woovo nakwonera, zia kuye umumanyie uvwoni vwivwe. Navuzwa gakoleke vuzwa mu vwivisu hagati hinyu. Niiva mulahuliriza umali kwilanyia amwavo woovo.

¹⁶ Navuzwa navula kukuhulira, vugula mundu wundi mulala anoho vaviri, amakuva goosi gaduuki kulungika mu livoora lia avaloli vaviri anoho vavaga.

¹⁷ Niiva asuraa kuvahulira, volera likanisa. Niiva asuraa kuhulira kali likanisa, ave ku ivi kuli avandu vatamanyi Nyasaye, kandi avasololi vuvusuuru.

Kovoha no kovoholora

¹⁸ “Muvooleraa agiligali, kindu ku viosi, icha muvoha mu lirova kilavofa kandi mwigulu; kandi kindu ku viosi cha muvholoraa mu lirova, kilavoholorwa mwigulu kandi.

¹⁹ Inzi muvooleraa, vaviri ku munyi nivavugilirzana mu lirova muno ku kindu choosi cha vasaala, Baba wange oveeye mwigulu alavakolera chazana.

²⁰ Kigira hoosi ha vavugani vaviri anoho vavaga ku lieta linage, inzi mbeeye hagati haavo.”

Ulugano lwu mutumikiri mulala utasaamiihaa

²¹ Petero yaza ku Yeso, namuteeva, “Mwami, amwavo wange nanzonela ndamusamiiha haali kanga? Haali saba?”

²² Yeso yamutivulira, “Inzi singovooleraa haali saba vuzwa mba, navuzwa kuduuka sabwini haali saba,

²³ kigira yaga, Uvwami vwu mwigulu voveeye kuli mwami mulala wenyaa kuvaliza amagovi ga vatumikiri veve.

²⁴ Lwi livaliza liatanga, yaleetelwa umundu mulala uwaali ni ligovi lie zitalenta zielefu likomi.

²⁵ Mundu oyo siyaali ni kindu chu kutunga mba. Mwami weve yaatuliza lilago agulizwi harara nu mukali weve kandi vana veve, ni vindu viosi via yaali navio, ligovi liduuki kutungwa.

²⁶ Kunangwa umutumikiri oyo yagwa hasi ku maru geege navoora, ‘Mwami, ombere zimbavasi na inzi ndakutunga iligovi liosi!’

²⁷ Mwami wu mutumikiri oyo yamuveera izimbavasi, namusamiiha iligovi, namuleka.

²⁸ “Navuzwa mutumikiri oyo yatura, nanyoora mulala ku vatumikiri vache, uwaali ni ligovi lilie lie zidinari imia. Yaamwizumba mu madundu, navoora, ‘Ndungaa ligovi liange!’

²⁹ Mutumikiri wache yagwa hasi ku maru geege, naamusaala, ‘Ombere na inzi ndakutunga ligovi liilio liosi.’

³⁰ Navuzwa yasura. Mu vogono yivwo, yamukola avofi muvuhambe kuduuka lwa atungaa ligovi.

³¹ Avatumikiri vache lwa valora agene yago, vavelera ligali, nivazia kovoolera mwami wavo agekoleka yago.

³² Mwami yalanga mutumikiri oyo namuvolera, ‘Ivi oveeye mutumikiri mudamanu ligali! Ivi wangonya ma ningusamiiha iligovi liilio liosi!

³³ Si vwali vulahi koveera mutumikiri wacho zimbavasi, kuli inzi ndaali kokovera zimbavasi?’

³⁴ Maku umwami yavihilirwa ligali, naamuhira muvuhambe kuduuka atungi iligovi lilie liosi.”

³⁵ Yeso yamaliriza kovora, “Baba wange wu mwigulu alakola malala meere ku munyi niiva simulasamiiha avamwavo vinyu mugati mwi mioyo jinyu.”