Matayo 15 - KITABU KITAKATIFU

Miima ja avaguuga

¹ Avafarisayo na avigizi vi Lilaga kutura Jerusalemi, vaza ku Yeso, ni vamuteeva;

² “Kigira ki aviigi vovo vononyia miima ja avaguuga viitu? Si viisaavanga amakono gaavo kuli gadukanaa ni vakikiri kulia!”

³ Yeso yavativulira, “Kigira ki na munyi mulonda amigizu ginyu aveene, na nimwononyia Lilaga lia Nyasaye?

⁴ Nyasaye yalaga navoora, ‘Wizominye baba woovo na mama woovo’ kandi, ‘Ku vosi, onyegaa baba anoho mama weve, gamudukira yiitwi ligali.’

⁵ Navuzwa munyi mwigizaa kovora ndi, niiva umundu avooreraa baba weve anoho mama weve, ‘Viosi via ndukanaa kuha munyi kuli ovokonyi, yivi mali ku vihaana ku Nyasaye,’

⁶ uyu atahaana uluyali ku baba weve anoho mama weve, navio mba. Na ndio mwononyia Lilaga lia Nyasaye ku lilonda amigizu ginyu aveene.

⁷ Avagaadi munyi! Isaya yaporofeta vulahi ku munyi lwa yavoola:

⁸ ‘Avandu yava, Nyasaye avoora, vanzizominya vuzwa ni minwa jaavo, navuzwa mu mioyo jaavo, vaveeye ihale ninzi.

⁹ Lisigamira liavo liveeye lia vuzwa. Amigizu gaavo gaveeye amalago ga vandu vuzwa!’ ”

Vindu vilombaa mundu kuva mudamanu

¹⁰ Kunangwa Yeso yalanga kiduma cha vandu vaze kuye navavoolera, “Muhuliri kandi mumanye!

¹¹ Kindu kekolaa umundu kuva mudamanu, si keveeye ikindu kingiraa mu munwa gwigwe mba, navuzwa ikitulaa muye nicho kimukolaa kuva mudamanu.”

¹² Kunangwa aviigi veve vaza kuye, nivamuteeva, “Umanyi ku Avafarisayo vaali kwikigitalizwa lwa vaahuliyi amakuva yaga?”

¹³ Navuzwa Yeso yativura navoora, “Kitagwa choosi cha Baba wange wu mwigulu atasimika kiliifwa.”

¹⁴ “Mutavahendera mwoyo mba. Vaveeye aviimiliri vavoku. Umboku niyimilira umboku, vombi valagwa mu vogo.”

¹⁵ Petero yamuvolera, “Ukwivaliri lugano yilu.”

¹⁶ Yeso yavavolera, “Munyi simulumanyi kandi mba?

¹⁷ Si mumanyi ndi ikindu choosi ichingiraa mu munwa kizizaa munda ma inyima kitulaa ichova?

¹⁸ Navuzwa ivitulaa mu munwa vituraa mu mwoyo, na iviene yivi nivio ivikolaa umundu kuva mudamanu.

¹⁹ Kigira mu mwoyo gwigwe zing'anagani zindamanu zitulaa mu, izimwimiliraa ukwita, okoheya, kandi okokora ikifwavi chi zing'ano ziosi; kunuura, koveha nu kugina avandi vandi.

²⁰ Yivi nivio ivikolaa mundu kuva mudamanu. Navuzwa kulia chukulia na mamisu ku makono, sikokolaa mundu kuva mudamanu mba.”

Lisuuvira liu mukali Mukanani

²¹ Yeso yatura ahene yaho nazia komenya muvivala via Tiro na Sidoni

²² Kunangwa, mukali mulala Mukanani wi ikivala yicho yaza kuye, ni yanira navoora, “Mwami, Umwana wa Daudi, ombere zimbavasi! Mukaana wange aveeye ni lidemoni, na limukubiza ikivi ligali.”

²³ Navuzwa Yeso si yamutivulira kindu mba. Aviigi veve vaza kuye ni vamuvolera, “Umukungi azie! Akolondaa kandi akolaa liyoga inyima wiitu!”

²⁴ Navuzwa Yeso yativura, “Inzi ndaatumwa vuzwa ku amagondi gagota aga vandu va Isiraeli.”

²⁵ Navuzwa mukali oyo yaza nasigama imbiri weve, navoora, “Mwami, ongonye!”

²⁶ Yeso yamutivulira, “Sivoveeye vulahi kuvugura chukulia cha avana nu kusigisira zimbwa mba.”

²⁷ Mukali oyo yativura, “Yee, yago gaveeye agiligali Mwami; navuzwa kali zimbwa ziliizaa madonye gatigalaa kutura komesa yu Mwami wazio.”

²⁸ Ma Yeso yamutivulira, “ Mukali, lisuuvira lii lio ni linene. Aga ivi wenyaa galekoleka.” Kandi mukaana weve yahona ku ing'inga yene yeyo.

Yeso yahonyia avandu avanyingi

²⁹ Yeso yatura ahene yaho naavitira ku lujinga lwinyanza ya Galilaya. Yanigira mu kiguru, ni yikala mu.

³⁰ Viduma vinene via avandu vaza kuye, nivagingi avalema, avavoku, zidimbidi, avafogoya na vandi avanyingi avaari avalwaye, nivavaviika imbiri wi virenge via Yeso naye yavahonyia.

³¹ Avandu vagenya ligali lwa valora izidimbidi nizimolomaa, na avalema nivagenda, avafogoya nivahoni kandi avavoku nivalora; na vaakuminya Nyasaye wa Isiraeli.

Yeso yalihiza vandu zielefu zine

³² Yeso yalanga aviigi veve vaze kuye navoora, “Mbererera avandu yava kigira vakava ninzi ku madiku gavaga na kalunu sivaveeye ni chavalia mba. Sinyenyaa vazie nivataalia mba, gase ihuyuki ilavatuula kunzira.”

³³ Avatumwa veve vamuvolera, “Hano koveeye muchangalangwe. Nakonyoole hayi ichukulia kiduukaa kulihiza ikiduma yiki choosi?”

³⁴ Yeso yavateva, “Muveeye ni milaango ji migadi janga?” Navo vaamutivulira, “Koveeye ni milaango saba nu tusuzi tokekeeke ututali tunyingi.”

³⁵ Kunangwa, Yeso yalaga ikiduma kwikala hasi.

³⁶ Ma yavugula imilaango ji migadi saba, nasandiza Nyasaye, nameganyia. Yaaha aviigi navo vagavulira avandu.

³⁷ Vosi valia kandi niviguta. Aviigi vavungiza amadonye nigizula ivihinda saba.

³⁸ Avandu avaalia vaali avasaza izielefu zine, nivatavaliziywi mu na avakali kandi avana.

³⁹ Maku Yeso yaasiivula avandu kandi, yanina mu liato nazia mu kivala cha Magadani.