Matayo 14 - KITABU KITAKATIFU

Likuza lia Yohana Mubatizi

¹ Ing'inga yeyo, Herodi, mwamihi wa Galilaya yahulira lusuma lwa Yeso.

² Yavolera avatumikiri veve, “Mundu uyu ligali niyie Yohana Mubatizi asimuguki kutura mu vakuzu! Yiki ni kigira aveeye ni zinguru yizi kokora vilolekizu.”

³ Herodi yaali nalagi Yohana agumirwi, kandi avofwi ni minyororo ma naviikwa muvuhambe. Yaali naakori agene yaga kigira Herodia, umukali wa Filipo amwavo weve.

⁴ Kigira Yohana yavolera Herodi, “Ni vudamanu ivi koleta Herodia, mukali wa amwavo woovo!”

⁵ Herodi yenya kwita Yohana, navuzwa yatia ikiduma cha vandu kigira kuvo, Yohana yaali muporofeti.

⁶ Lwi lidiku lie lilia lie livulwa lia Herodi liaduuka, umukana wa Herodia yaasievera avageni. Herodi yayanzizwa ligali.

⁷ Yalagana mu liesuuha ukuhaana ku mukaana oyo ikindu choosi icha amuteeva.

⁸ Naye, kigira yaagerihizwa na mama weve, yateeva, “Nyenya umutwi gwa Yohana Mubatizi ku isahani.”

⁹ Herodi yavelera ligali, navuzwa kigira ku liesuuha lilie, kandi kigira avageni vaali mu lilia harara naye, yaatuliza lilago umukana ahevwe icha yenya.

¹⁰ Kunangwa, Herodi yatuma umundu, nakalaga umutwi gwa Yohana muvuhambe.

¹¹ Umutwi gwigwe gwaleeterwa ku isahani, ni vaaha mukaana, naye na ahilira mama weve.

¹² Aviigi va Yohana vaza ni vaavugura umuviri gwigwe ni vaaguyavira; ma nivazia ni vavoolera Yeso.

Yeso yalihiza vandu zielefu zitano

¹³ Lwa Yeso yahulira amakuva ga Yohana, yatura hazana yaho naniina mu liato, nazia mu vwivisu aha avandu vatali. Navuzwa lwa avandu vahulira, vaamulonda kutura mu madaala.

¹⁴ Yeso yatura mu liato, kandi lwa yalora ikiduma kenene cha vandu, umwoyo gwigwe gwizura ovovereri, kandi yahonyia vosi avaari avalwaye.

¹⁵ Lwa gwaduuka mugolova, aviigi veve vaza kuye ni vamuvolera, “Hano ni mu kiziimi, kandi ing'inga iviti ovoolere avandu vazie mu madaala viguliri iviukulia aveene.”

¹⁶ Navuzwa Yeso yavavolera, “Vatazia mba, munyi muvahe viukulia.”

¹⁷ Navuzwa vamuvolera, “Kunyi koveeye hano ni milaango jitano ji migadi jenyine, ni zisuzi ziviri vuzwa.”

¹⁸ Yeso yavavolera, “Vileeti hano.”

¹⁹ Yahaana lilago ndi avandu viikare mu kiguti; navugura imilaango jitano ni zisuzi ziviri, nahenza mwigulu, nahaana ilizominya ku Nyasaye kuvigasiza. Yaavimeganyia, naha aviigi veve, vahane ku avandu.

²⁰ Avandu vosi avaalia, kandi niviguta. Aviigi vavungiza amadonye gaatigala nigizula ivihinda likomi na viviri.

²¹ Vosi harara vaali avasaza izielefu zitano, vugira kuvaliza avakali na avana.

Yeso Yagenda ku amazi

²² Yeso yavolera aviigi veve vanini mu liato, viimili imbiri weve kuzia engereka winyanza, naye nakisiivula avandu.

²³ Lwa yamala kuvasiivula, yanigira mu kiguru yenyine kuzia kusaala. Lwa gwaduuka mugolova, yaali ahene yaho yenyine.

²⁴ Ing'inga yene yeyo, liato liali ni limali kuduuka ihale hagati hinyanza ni lihunzulanyianywa yiyi na yiyi ni viguvuli kigira imbuza enene yahuuza nukuligoyaanyia.

²⁵ Nivuchezaa, ahimbi hagati hizisa tisa ni zisa likomi na ziviri zia mugambazuri, Yeso yazia ku aviigi veve, nagenda ku amazi.

²⁶ Lwa aviigi veve vamulola nagenda kunyanza vaatia ligali nivavoora, “Ni kigiingi!” Vaakuba zikwiri kigira uvuti.

²⁷ Nonoho Yeso yamoloma kuvo navoora “Muleme mwoyo! Ninzi! Mutatia mba!”

²⁸ Maku Petero yamuvolera, “Mwami, naava naveeye ni ivi ligali, mbe munwa ng'ende ku amazi nzizi ku ivi.”

²⁹ Yeso yavoola, “Vulahi, Hamba.” Petero yika natura mu liato, nagenda ku mazi kuzia ku Yeso.

³⁰ Navuzwa lwa yalora imbuza nemeedekaa, yatia, ma natanga kwiyina. Yanira nu mwoyo munene navoora, “Mwami mbonyia!”

³¹ Ahene yaho Yeso yanyira mukono gwigwe, namugumira, namuvolera, “Ivi wilisuuvira likekeeke! Kigira ki nuhayahayiza?”

³² Lwa vombi vanina mu liato, imbuza yakiring'ana.

³³ Vosi avaari mu liato vaasigamira Yeso, ni vavoola, “Ligali ivi oveeye Umwana wa Nyasaye.”

Yeso yahonyia avalwaye mu kivala cha Genesareti

³⁴ Lwa vaambuka inyanza, vaduuka mu kivala cha Genesareti,

³⁵ aha vandu vamanya Yeso. Kunangwa vaahira amakuva hvundu hoosi mu zimbega ziali ahimbi, nivaleeta avalwaye vosi ku Yeso.

³⁶ Vamugoonya aleke vadiiri vuzwa ku lukigiti lwi inguvu yeeye; navo vosi avaludiira vahonywa.