Matayo 13 - KITABU KITAKATIFU

Lugano lwu mumizi

¹ Lidiku liene yilio, Yeso yatura munyumba zana, nazia kwikala ku lujinga lwinyanza.

² Viduma vinene viamukumbiriza nivamumina kuduuka naniina mu liato, ni yikala mu. Avandu yavo vosi vasingira ku lujinga.

³ Yeso yavavolera amakuva amanyingi mu zing'ano. “Lidiku lilala, yaali ho umumizi mulala uwatula kuzia kumiza uvuguza.

⁴ Lwa yaali namiiza, vulala vwagwa kunzira, na amanyonyi gaaza ni gavovoza.

⁵ Nuvuundi vwagwa ku marova gu kulwanda. Uvuguza yivwo vwamera vwangu kigira amarova gaali makekeeke.

⁶ Navuzwa lwi iliuva liatura, uvuguza vwali ni vomeri vwaniala. Na kigira imiri javwo sijali ni zinguru, vwuma nulwazana.

⁷ Uvundi vwagwa mu mafa na amafwa gaviruka ni gavumiina.

⁸ Uvundi vwagwa mu marova magunamu, ni vwama uvuswage. Vulala vwama imia ndala, uvundi sitini, nu uvundi salasini.”

⁹ Yeso yamaliriza navoora: “Oveeye na amatu gu kuhulira na ahuliri!”

Kivuni cho komoloma mu zing'ano

¹⁰ Aviigi veve vaza kuye nivamuteeva, “Kigira ki utumikira zing'ano lwa omoloma ku avandu?”

¹¹ Yeso yavativulira, “Munyi muheveywi kumanya agaviswa gu Vwami vwu mwigulu, navuzwa yavo sivaheveeywi ndio mba.

¹² Kigira ku vosi oveeye ni kindu alahevwa ivindi nokomeedwa; navuzwa ku vosi utaveeye nacho, alanyagwa kali icha aveeye nacho.

¹³ Yiki nicho kigira nimbora mu zing'ano; kigira, lihenza vahenza, navuzwa si valora mba, kandi lihulira, valahulira, navuzwa si valamanya mba.

¹⁴ Kuvo gadukizwi kuva agu muporofeti Isaya yavoola: ‘Lihulira mulahulira, navuzwa si mulamanya ligali mba; lihenza mulahenza, navuzwa si mulalora mba,

¹⁵ kigira mioyo ja vandu yava jigwiyi midamanu kandi amatu gaavo galiduhi ku lihulira kandi vamwolizi zimoni ziavo. Gase vakaloli ni zimoni ziavo kandi vakahuliyi na matu gaavo. Nu kumanya zing'anagani ziu mu mioyo jaavo n nu kwiganira vaaluhi viirane ku inzi, na inzi mbahonyie.’

¹⁶ “Navuzwa munyi muveeye nuvugasu ligali, kigira zimoni zienyu zilolaa, kandi amatu ginyu gahulira.

¹⁷ Kigira ligali muvooleraa, avaporofeti na avandu vanyingi valungi venya kolola ivindu via munyi muloraa, navuzwa si vavilola mba, kandi kuhulira aga munyi muhulira, navuzwa sivahulira mba.

Yeso yiivara lugano lwu mumizi

¹⁸ “Kunangwa muhuliri kandi mwigi ichu lugano lwu mumizi lovoolaa.

¹⁹ Ku vosi uhuliraa likuva liu vwami, na avula kulimanya, aveeye kuli uvuguza vwamizwa nivugwa kunzira. Mudamanu yazaa mamunyaga iliamiizwa mu mwoyo gwigwe.

²⁰ Uvuguza vwagwa hagati ha magina voveeye kuli avandu vahuliraa likuva, kandi valivugula nu vuyanzi.

²¹ Navuzwa sivaveeye nimiri muvo aveene mba. Navo vidinyirizaa mu likuva zana hakekeke vuzwa, ma lwa valora ikivi anoho lidambizwa kigira likuva zana yilio ni lizaa, ahene yaho viranaa inyima.

²² Nuvuguza yivu uvwagwa mu mafwa voveeye kuli avandu vahuliraa likuva, navuzwa amadidikano gi ikivala yiki, harara nilienya uvutugi, vikunikaa likuva zana, ma vavura kwama amakuyu.

²³ Uvuguza vwamizwa mu marova amagunamu, voveeye kuli avandu vahuliraa likuva na valimanya, navo vaama amakuyu ligali; luguza lulala lwamaa mia, ulundi sitini, nu lundi salasini.”

Lugano lwa amavanze

²⁴ Yeso yavolera avandu lugano lundi: “Uvwami vwu mwigulu voveeye kuli mundu wamiza uvuguza uvulahi mu mulimi gwigwe.

²⁵ Navuzwa ulwa avandu yaali nivagonaa, umusigu weve yaza namiiza mavanze hagati hi ingano, ma nazia.

²⁶ Kunangwa, lwa vitagwa viaviruka nivitanga kulaviza, amavanze nago gaatanga kololeka kandi.

²⁷ Avatumikiri vumwene mulimi vazia kuye nivamuvoolera, ‘Mwami, si wamiiza uvuguza vulahi mu mulimi gugwo? Amavanze nago ganyoolekaa mu ndi?’

²⁸ Naye yavativulira, ‘Umusigu niyie wakola yaga.’ Avatumikiri veve vamuteeva, ‘Wenyaa kwiha gatuli mu?’

²⁹ Naye yavativulira, ‘Awa, gase hawundi lwa muva nimwihanga amavanze, mu liihira mu ingano.

³⁰ Leki viombi viviruki harara kuduuka ing'inga yi ligesa. Ing'inga yene yeyo ndakavoolere avagesi. Mutange kuvungiza amavanze, mugavohe mu zinganya gasambwi. Navuzwa ingano mugivungizi na mugeteere mu kedeera change.’ ”

Lugano lwu luguza lwi lisaazi

³¹ Yeso yavavolera lugano lundi: “Uvwami vwu mwigulu kuli luguza lwi lisaazi, ulwu mundu yavugula nalutaaga mu mulimi gwigwe.

³² Ulwene loveeye lokekeeke kuvita uvuguza vundi vwosi, navuzwa lwa lomeraa, luvilukaa luduuki lonene kuvita vitagwa viosi, ma lugwa musaala, kandi amanyonyi gi yigulu galombaa zinyumba viduku mu zisia ziagwo.”

Lugano lwa amamera

³³ Yeso yavavolera lugano lundi: “Uvwami vwu mwigulu voveeye kuli amamera gu mukali yavugula nazuganyia mu kihinda chu vusie, kuduuka ni vugwa amamera vwosi ma nivuvimba.”

Kutumikira zing'ano

³⁴ Yeso yavolera avandu vindu yivi viosi mu zing'ano. Siyavavoolera kindu choosi vugira lugano mba.

³⁵ Yakola yaga aduuki kutwekiza agu muporofeti yavoola, “Ndatumikira zing'ano ulwa inzi moloma kuvo; Ndavavolera ivindu vitamanyikani kutura lwi lirova lialombwa.”

Yeso yiivara lugano lwi livaanze

³⁶ Maku Yeso yaleka avandu nazia munyumba. Aviigi veve vazia kuye, ni vamuvolera, “Ukuvuuliri lugano lwa mavanze mu mulimi.”

³⁷ Yeso yavavolera, “Mumizi wu uvuguza vulahi nu Umwana wa Adamu.

³⁸ Mulimi ni kivala. Uvuguza vulahi na avandu vu Vwami vwu mwigulu. Navuzwa amavanze ni avana vu Mudamanu.

³⁹ Musigu wamiiza mavanze ni Setani. Ligesa liveeye keheri chi lirova, na avagesi ni zingelosi.

⁴⁰ Kuli mavanze gavungizangwa harara ma gasambwa nu muliru, galava ndio mu keheri chi ing'inga yiyi.

⁴¹ Umwana wa Adamu alatuma zingelosi veve, navo valavungiza kutura mu Vwami vwivwe ivindu viosi ivileetaa uvwoni, na vosi avaakoraa uvudamanu,

⁴² nukulaswa mu kisambiru chu muliru. Ahene yaho avandu valalira nu kudiedieyiza amiinu.

⁴³ Na avalungi valang'ereng'ana kuli liuva mu Vwami vwa Baba wavo. Oveeye na matu gu kuhulira, ahuliri.

Lugano lwi Livikiru liaviswa

⁴⁴ “Uvwami vwu mwigulu voveeye kuli livikiru liaviswa mu mulimi. Mundu mulala yalinyoola naalivisa kandi. Yayanza ligali kuduuka nazia kuguliza viosi via yaali navio naagula mulimi yigwo.

Lugano lwi ilulu

⁴⁵ “Uvwami vwu mwigulu voveeye kuli mukoli wi viasara uwenyaa zilulu zindahi.

⁴⁶ Naye lwa yamala konyoora ilulu ndala yu vuguli vonene, yazia kuguliza viosi via yaali navio nagigula.

Lugano lwu muluvu gwi zisuzi

⁴⁷ “Kandi, Uvwami vwu mwigulu voveeye kuli muluvu guvikwaa munyanza, magugumira zisuzi zie zing'ano ziosi.

⁴⁸ Ulwa gwizura, avandu vagung'usaa ma vagoleeta ku lujinga, ma viikara kodoola zisuzi zindahi ni vaviika mu vihinda viavo, navuzwa zindamanu vazisiuva ihale.

⁴⁹ Galava kuli ndio mu ing'inga ye keheri. Zingelosi valatura, kandi valavukanyia avandu vachamu kutura ku avalungi;

⁵⁰ na valasiuva avachamu zana mu kisambiru. Ahene yaho avandu valalira nu kudiedieyiza amiinu.”

Vindu vihia ni Vikulu

⁵¹ Yeso yavateva, “Muhuliyi vindu yivi viosi?” Navo vaamutivulira, “Yee Mwami.”

⁵² Yeso yavavolera, “Ku lwa yago, Mwigizi wi Lilaga samulala, umali kwigizwa amakuva gu vwami vwu mwigulu, aveeye kuli mundu mwene inyumba, utuliza mu kedeera chiche ivindu vihia kandi ivindu vikulu.”

Yeso yasuulwa ha Nazareti

⁵³ Lwa Yeso yamala kovora zing'ano yizi ziosi yatura hazana yaho,

⁵⁴ yirana mu lidaala lia yengo wavo. Yigiza avandu mu lisinagogi liavo kuduuka nivagenya nivavoora, “Mundu uyu yaatuliza hayi ovogeri yivu kandi vilolekizu vie zinguru yivi?

⁵⁵ Uyu siaveeye umwana wu muvaazi? Mama weve sialangwa Maria? Nu avamwavo veve, sivaveeye vanga Yakobo, Yosefu, Simoni na Yuda?

⁵⁶ Avavozo veve sivamenyi hano harara ni kunyi? Na umundu uyu yanyoora haliha yaga goosi?”

⁵⁷ Ku, vaamuvihilirwa kandi nivamusuula ligali. Navuzwa Yeso yavavolera, “Muporofeti aveeye ni lizominywa havundu handi hoosi, nitali sianyala kwizominywa mu lidaala lia yengo weve mba.”

⁵⁸ Kigira yaga, Yeso siyaakola ho vilolekizu vinyingi mba, kigira ilivula kusuuvira liavo.