Matayo 12 - KITABU KITAKATIFU

Liteeva kigira Lisabato

¹ Ing'inga yeyo Yeso yaali navitaa mu milimi jo ovoro lidiku lie Lisabato. Aviigi veve vaali ninzara, ma nivatanga kuvuunga iviangala viovoro ni valia.

² Navuzwa, lwa Avafarisayo valora ndio, vavoolera Yeso, “Henza, aviigi vovo vakora gatenyekaa kokolwa ku lidiku lie Lisabato.”

³ Yeso yavavolera, “Munyi si mwasoma kuli Daudi yakola harara na avache veve lwa vaali ninzara?

⁴ Daudi yingira mu nyumba ya Nyasaye harara na avache veve, ni valia imilaango ji migadi mitakatifu. Sigamuduukira oyo anoho avache veve kulia migadi yiji nivataveeye avasaalisi mba.

⁵ Anoho, simwasoma mu Lilaga ndi vuli lidiku lie Lisabato, avasaalisi mu Litembeli vonogonyia lisabato mba, navuzwa sivavalizilwa uvudamanu.

⁶ Kunangwa, muvooleraa ndi munene kuvita Litembeli aveeye hano.

⁷ Mang'oda Matakatifu gavoora, ‘Izimbavasi nizio zia inzi nyenya, sinyenyaa ivisiuviliru vie zinyama mba.’ Niiva ligali mwali munyala kumanya ikivuni chi livoora yili, simwakanyala kukalagira avandu avataveeye na mahiolo mba;

⁸ kigira Umwana wa Adamu niye Umwami wi Lisabato.”

Yeso yahonyia mundu wu mukono gwang'era

⁹ Yeso yatura ahene yaho, nazia niyingira mu lisinagogi liavo.

¹⁰ Yaali mu mundu mulala uwaali nu mukono gwang'era. Avandu vateva Yeso, “Gadukanaa kohonyia mundu ku lidiku lie Lisabato?” Vamuteeva ndio vanyoore kivuni cha vamuyaalira.

¹¹ Navuzwa Yeso yavavolera, “Niiva, mulala ku munyi aveeye ni ligondi lilie iligwiyi muliliina; si alaligumira nu kulituliza mu ku lidiku lie lisabato?

¹² Nasindi mundu; siaveeye mulahi kuvita ligondi! Kunangwa, Lilaga lietu livugilira kunyi kokoonya mundu ku lidiku lie Lisabato.”

¹³ Maku yavolera mundu oyo, “Nyira mukono gugwo.” Naye yanyira mukono; nagwo gwahona, niguva kuli ugundi.

¹⁴ Maku, Avafarisayo vaatura ichova, ni valomba zing'anagani kuli vanyara kudiviza Yeso.

Mutumikiri mutovole wa Nyasaye

¹⁵ Lwa Yeso yamanya likuva yilio, yatura ahene yaho. Avandu vanyingi vaamulonda, nahonyia avalwaye vosi,

¹⁶ naaviganihiza ndi vatavoolera avandu amakuva geege mba,

¹⁷ ku gaduuki kudukizwa agu muporofeti Isaya yavoola:

¹⁸ “Henza uyu aveeye mutumikiri wange wa ndaatovora; muyanze wange, wu mwoyo gwange guyaanzaa. Inzi ndakatumi Roho wange kuye, naye alakalandizi likalaga liange liuvulungi ku zihiiri ziosi.

¹⁹ Sialava na mahangali anoho kukuba ulwanga, anoho kolomba liyoga kuzinzira mba.

²⁰ Si alavunanyia ikidundu kimali kulingwa mba, anoho kusiminya itaya imulamula mba. Alazizagilira vugira kuluha kuduuka, lwi likalaga liu vulungi, liguuta,

²¹ avandu vosi valakaviki lisuuvira liavo muye.”

Yeso na Belizebuli

²² Ahene yaho valetera Yeso mundu mulala muvoku kandi uwaali idimbidi kigira lidemoni liali ni liamugumira. Yeso yamuhonyia kuduuka namoloma kandi nalora.

²³ Viduma viosi via avandu vagenya, ni vavoola, “Uyu anyala kuva Umwana wa Daudi?”

²⁴ Navuzwa lwa Avafarisayo vagahulira, vavoola “Mundu uyu akunga amademoni kuzinguru zia Belizebuli, munene wa amademoni.”

²⁵ Yeso yamanya zing'anagani ziavo, navavoolera, “Uvwami vwosi uvwavukanaa uvwene, vwonekaa ma vugwa; si vunyala kusingira mba. Amadara goosi anoho zinyumba ziosi iziavukanaa nukulwana iziene zilagwa ligali.

²⁶ Niiva, Setani alakunga Setani yiilwaanaa umwene. Kunangwa uvwami vwivwe vulasingira ndi?

²⁷ Munyi muvooraa ndi, inzi ngungaa amademoni kuzinguru zia Belizebuli; avalondi vinyu vaagakunga kuzinguru zia vwaha? Kigira yaga, aveene yavo valava avakalagi vinyu.

²⁸ Navuzwa inzi niimba ni ngungaa amademoni kuzinguru zia Roho wa Nyasaye, kunangwa mumanye ndi uvwami vwa Nyasaye vumali kuduuka ku munyi.

²⁹ “Anoho umundu anyala ndi kwingira munyumba yu mundu wundi wi zinguru nukumunyaga vindu vivie, naatatangi kovoha wi zinguru oyo kunangwa anyale limunyaga ivindu vivie zana?

³⁰ “Ku vosi utahambana ninzi ahing'anaa ninzi; kandi ku vosi utavungizaa harara ninzi asalanyia ligali.

³¹ Kigira yaga muvooleraa, avandu valasamifwa uvwoni na manyego gaavo goosi, navuzwa uvwoni vwo konyega Roho Mutakatifu si vulisaamiifwa mba.

³² Ku vosi ovola ilikuva lio konyega Umwana wa Adamu alasaamiifa, navuzwa oyo ovola ilikuva lio konyega Roho Mutakatifu, sialisaamiifwa kali mu likula lia kalunu yili, anoho mu likula iliiza mba.

Musaala gumanyikanaa ku amakuyu gagwo

³³ “Ni mwenya munyore makuyu malahi, gamudukira muve nu musaala umulahi; kandi ni mwenya munyore makuyu madamanu, muve nu musaala mudamanu. Umusaala gumanyikanaa ku makuyu gagwo.

³⁴ Munyi avana vi zinzoka! Munyala kovora ndi ivindu vilahi, lwa muveeye avadamanu? Kigira munwa govoora amakuva gizuyi mu mwoyo.

³⁵ Mundu mulahi aleetaa ivindu vilahi kutura mu livikiru lilahi liumwoyo gwigwe; kandi umundu mudamanu atulizaa amadamanu kutura mu livikiru liu uvudamanu vwu mwoyo.

³⁶ “Muve ni lisuuvira ndi, ku Lidiku lie Likalagirwa sa mulala alahaana ilivaliza lia vuli likuva lia yativura.

³⁷ Amakuva googo galakukalagira; galakulang'aminya niiva ivi oveeye vulungi anoho oveeye umuhioli mba.”

Ukwenya kelolekizu

³⁸ Kunangwa avalala ku Vafarisayo kandi Avigizi vi Lilaga vavoolera Yeso, “Mwigizi, kwenyaa kolole kelolekizu kutura ku ivi.”

³⁹ Naye yavativulira navoora, “Munyi vandu va madiku gano muveeye avandu avadamanu kandi muvura uvunyaiaye! Mwenya kelolekizu. Si mulahevwa ekelolekizu kindi nikitaveeye chu muporofeti Jona cheng'ine.

⁴⁰ Kuli Jona yaali munda mwi isuzi enene madiku gavaga, mbasu nu vudiku, kandi nindio Umwana wa Adamu alava musi mwi lirova madiku gavaga, mbasu nu vudiku.

⁴¹ Avandu va Nineve valasingira mu Lidiku lie Likalaga, na valakalagira likula yili. Avandu va Nineve viganira kigira lilwaza lia Jona. Navuzwa henza, munene kuvita Jona aveeye hano!

⁴² Mwami wi kikali wa Sheba alakasingiri ku Lidiku lie Likalaga harara ni likula yili nu kulikalagira, kigira yalomba ologendo kutura ihale mu kivala chiche ni yaza kuhulira amigizu govogeri ga Solomoni. Navuzwa henza, munene ligali kuvita Solomoni aveeye hano!

Lirana lia roho mudamanu

⁴³ “Lwa roho mudamanu atulaa mu mundu, agendagendaa mwigendanyama aha mazi gataveeye, niyenyaa ahokososera. Natanyooye hokososera

⁴⁴ yevoolera umwene, ‘Ndirana munyumba yange ya ndaaleka.’ Na lwa yirana agenyoolaa neveeye enzere, na imali kweywa vulahi.

⁴⁵ Mazia koleta roho vadamanu vandi saba, avadamanu ligali kumuvita navo vosi vazaa ma vingira komenya mu mundu oyo. Iliiva liu mundu oyo livezaa ilidamanu ligali kuvita lie imbiri. Yaga kandi galakoleka ndio ku avandu vi likula liveeye ho lidamanu yili.”

Mama wa Yeso na vamwavo veve

⁴⁶ Lwa Yeso yaali nakemoloma ku viduma, henza, mama weve na avamwavo veve vaza nivasingira ichova, ni venya kovolerana naye.

⁴⁷ Kunangwa, mundu mulala yamuvolera, “Mama woovo na avamwavo vovo vaveeye ichova, venya kovolerana niivi.”

⁴⁸ Navuzwa Yeso yamutivulira, “Mama wange nivwaha? Na avamwavo vange ni vanga vwaha?”

⁴⁹ Kandi yanyira umukono gwigwe naasona ku aviigi veve, navoora, “Yava nivo mama wange na avamwavo vange!

⁵⁰ Ku vosi okolaa uvulariri vwa Baba wange oveeye mwigulu, uyu niyie amwavo wange kandi mbozo wange, kandi mama wange.”