Matayo 1 - KITABU KITAKATIFU

Avaguuga va Yeso Kristo

¹ Yiki ni kitabu cha makura gu luhia lwa Yeso Kristo. Yeso yaali uwi ikisukululwi cha Daudi, uwi ikisukululwi cha Aburahamu.

² Aburahamu yivula Isaka, Isaka yivula Yakobo, na Yakobo ni yivula Yuda navamwavo veve,

³ Yuda yivula Perezi na Zara, mama wavo yaali Tamara, na Perezi yivula Hezoroni, Hezoroni yivula Ramu,

⁴ Ramu yivula Aminadabu, Aminadabu yivula Nahashoni, Nahashoni yivula Salomona;

⁵ Salomona yivula Boazi na mama weve yaali Rahabu, Boazi na Ruzi viivula Obedi; Obedi yivula Jese,

⁶ na Jese yivula Daudi uwaali Mwami. Daudi yivula Solomoni uwa mama weve yaali mukali wa Uria.

⁷ Solomoni yivula Rehoboamu; na Rehoboamu ni yivula Abija. Abija yivula Asa

⁸ Asa yivula Jehoshafati, Jehoshafati yivula Joramu, Joramu yivula Uzia,

⁹ Uzia yivula Jozamu, Jozamu yivula Ahazi, na Ahazi ni yivula Hezekia.

¹⁰ Hezekia yivula Manase, Manase yivula Amoni, na Amoni ni yivula Josia.

¹¹ Josia yivula Jekonia na avamwavo veve. Yaali ing'inga ya Vayuda vaahirwa mu vuhambe mu Babiloni.

¹² Inyima wa Vayuda kuhilwa mu vuhambe mu Babiloni, Jekonia yivula Shelatieli; Shelatieli; yivula Zerubabeli,

¹³ Zerubabeli yivula Abiudi, Abiudi yivula Eliakimu; na Eliakimu ni yivula Azori.

¹⁴ Azori yivula Zadoku, Zadoku yivula Akimu, na Akimu niyivura Eliudi.

¹⁵ Eliudi yivula Elieza, Elieza yivula Matani, na Matani ni yivula Yakobo.

¹⁶ Yakobo yivula Josefu. Josefu niyie uwaali musaza wa Maria, mama wa Yeso ulangwa Mesia

¹⁷ Kunangwa, goosi gaali amakura komi na ine kutura ku Aburahamu kuduuka ku Daudi, kandi amakura komi na ine kutura ku Daudi kuduuka ku ing'inga lwa Vayuda vaahirwa mu vuhambe mu Babiloni, na amakura komi na ine kutura ing'inga yu kuhilwa mu vuhambe kuduuka ku ing'inga ya Mesia.

Liivulwa lia Yeso Kristo

¹⁸ Liivulwa lia Yeso Kristo liali kuli ndi. Lwa Josefu yaali ni yakakwa Maria, mama wa Yeso, navuzwa nivakikiri kuva harara, kuli musaza nu mukali, yanyooleka naveeye ninda ya Roho Mutakatifu.

¹⁹ Kigira Josefu musaza weve, yaali mundu mulungi, si yenya kumuleganyia mba. Yatovola kumuleka makiriri.

²⁰ Navuzwa lwa yaali nakiganagana ku likuva yili, henza, engelosi wu Mwami Nyasaye yaloleka kuye mu maloto, namuvolera, “Josefu, ikisukululwi cha Daudi, utatia kuvugura Maria ave mukali woovo mba, kigira ichaaverekwa muye keveeye cha Roho Mutakatifu.

²¹ Aliivula umwana muyaayi, na ulamugulika lieta lilie Yeso, kigira uyu nivie ulihonvia avandu veve kutura muuvwoni vwavo.”

²² Kunangwa, yaga goosi gekoleka gaduuki kuduukizwa amakuva gu Mwami yavoola kuvitira mu muporofeti;

²³ “Henza, mukaana mugima alavereka, naye aliivula umwana muyaayi, naye alagulikwa ‘Imanueli’ ” iliveeye kovora, “Nyasaye aveeye harara ni kunyi.”

²⁴ Lwa Josefu yavuka mu zindoolo zizie, yakola kuli engelosi wu Mwami yamulaga, navugura mukali weve.

²⁵ Navuzwa si yaali harara naye kuli mukali nu musaza mba, kuduuka lwa Maria yivula umwana muyaayi. Josefu ya mugulika lieta lilie Yeso.