Marko 9 - KITABU KITAKATIFU

¹ Yeso yavavolera kandi, “Ligali ligali inzi muvooleraa, valala ku munyi avasingiyi hano sivalizazama ilikuza kuduuka lwa valilola Uvwami vwa Nyasaye ni vuzaa mu zinguru.”

Yeso yagirung'ana iligondo

² Inyima wa madiku sita, Yeso yavugula Petero, Yakobo na Yohana, naavimilira kuzia mu kiguru ikitambi, aha vaali venyine. Nonoho, Yeso yagirung'anywa naava ni ligondo lindi imbiri wavo.

³ Zinguvu zizie ziagwa izindavu ligali, kali mufuyi wumulirova siyaali yakanyali kuzilaviza zing'ereng'ane kuli ndio mba.

⁴ Maku aviigi vavaga yavo valora Elija na Musa nivavolerana na Yeso.

⁵ Petero yavolera Yeso “Mwigizi, ni vulahi kove hano. Leka kwumbake ividioli vivaga. Kilala ichicho, ikindi cha Musa, ni ikindi cha Elija.”

⁶ Petero harara na vandi vaali nu vuti na siyamanya ichavoolaa mba.

⁷ Maku lilesi liaza nilivakinga, nu umwoyo gwahulirika mu lilesi zana ni govoora, “Uyu nu Mwana wange wandaayaanza. Mumuhuliri!”

⁸ Nonoho lwa viikivuka, si valora umundu wundi mba, nataveeye Yeso yenyine harara navo.

⁹ Lwa vaali ni vasulunguta kutura mu kiguru, Yeso yavalaga vatavoolera umundu kali mulala ivindu via valoli, kuduuka lwu Mwana wa Adamu alisimuguka kutura mu likuza.

¹⁰ Vavisa amakuva gavaloraa, nivateevana aveene ikivuni chi lisimuguka kutura mu vakuzu.

¹¹ Vateva Yeso, “Kigira ki avigizi vi Lilaga vavoola ndi Elija kuduuka yaaze kutanga?”

¹² Yavativulira, “Yee, ligali Elija alaza kutanga aduuki kwetegekiza vuli kindu. Navuzwa kigira ki gang'odwa mu Mang'oda Matakatifu ndi, Mwana wa Adamu alakubizwa ikivi kinyingi nu kuchaywa?

¹³ Navuzwa muvooleraa, ligali Elija yamala kuuza, na avandu vamukolera kuli gavayaanzizaa kuli gang'odwa kuye.”

Yeso yahonyia muyaayi waali ni lidemoni

¹⁴ Lwa vaduuka ku aviigi vandi, valora ikiduma ekenene ni kivakumbirizi harara na avigizi vi Lilaga nivahangalizanaa navo.

¹⁵ Lwa vandu vosi vamulola vagenya ligali, ni vazia kuye ni vamucheliza.

¹⁶ Yeso yavateva, “Muhangalizaniraa ki?”

¹⁷ Umundu mu kiduma yamutivulira, “Mwigizi, ndeti muyaayi wange ku ivi kigira aveeye nilidemoni muye kandi aveeye idimbidi.

¹⁸ Lwi lidemoni limugumiraa, limulasa hasi, ma atulaa ulufulu, ma kandi atangaa kudiedieyiza amiinu, ma atangalala vuzwa. Lwa ndeevi aviigi vovo valitulizi, vaatamiywi.”

¹⁹ Yeso yavavolera, “Likula litaveeye ni lisuuvira munyi! Ndamenya harara ni munyi kuduuka ng'inga ki! Ndikuzira ni munyi kuduuka ng'inga ki! Muleeti hano ku inzi.”

²⁰ Kunangwa valeta muyaayi oyo ku Yeso. Lwi lidemoni lialola Yeso, nonoho liamusang'usura na muyaayi oyo yagwa nagalagara hasi, natura ulufulu mu munwa.

²¹ Yeso yateeva baba weve, “Yaatanga kuva ndi kutura ng'inga ki?” Naye yamutivulira, “Kutura mu vwana vwivwe.

²² Haali kanyingi lidemoni liageriza kumwita ku limutuula mu muliru anoho mumazi. Okoveere zimbavasi, na okokonye niiva galanyalika!”

²³ Yeso, yamuvolera, “Yee, niiva ivi umwene unyala! Ivindu viosi vinyalikaa ku mundu oveeye ni lisuuvira.”

²⁴ Nonoho baba wu muyaayi zana oyo yahanzuka navoora, “Mwami inzi mbeeye ni lisuuvira, navuzwa ni likuzuzu vuzwa. Ngonya mbula ndava ni lisuuvira iliduukiru!”

²⁵ Yeso yalora avandu nivisuunda ahimbi kuvo ma yagondokera ilidemoni navoora, “Ivi lidemoni litamolomaa ni liahana matu, ngulaga, tula mu muyaayi uyu kandi utingira muye kandi!”

²⁶ Vwangu lidemoni liakuba lukwiri; ni limusang'usula vuvi ligali, ma ni limuleka. Muyaayi oyo yaali kuli umukuzu. Avanyingi kuvo vavoola, “Akuzi!”

²⁷ Navuzwa Yeso yamugumira umukono namukoonya, na yasingira.

²⁸ Lwa Yeso yaali niyakingira munyumba, aviigi veve vazia kuye naveeye yenyine ni vamuteeva, “Kigira ki kunyi si kunyali ku lituliza?”

²⁹ Yavavolera, “Lidemoni ulugano yilu silinyala kutulizwa nigatali ni lisaala lienyine; Ikindu kindi mba.”

Yeso yamoloma kandi kigira Likuza lilie

³⁰ Lwa Yeso na aviigi veve vaatura yo, valonda inzira ivitiraa Galilaya. Yeso si yenya avandu vamanye aha yaali mba,

³¹ kigira yaali ni yigizaa aviigi veve: Yaviigiza navoora, “Mwana wa Adamu alaviikwa mu makono ga avandu avalimwiti. Navuzwa niyakiitwa, inyima wa madiku gavaga, alasimuguka.”

³² Aviigi veve si vamanya ikivuni chi livoora lilie mba, kandi vaatia kumuteeva.

Nivwaha oveeye munene mwigulu?

³³ Vaduuka Kaperinaumi, na lwa yaali munyumba, “Yeso yateeva aviigi veve, kigira ki ni muhangalizana kunzira?”

³⁴ Navuzwa vaakiring'ana kigira kunzira vaali nivatevanangi, nivwaha oveeye munene kuvo.

³⁵ Yeso yikala hasi naalanga avaari likomi na vaviri navavoolera, “Mundu na ava niyenya kuva imbiri kuduuka ave winyima kandi umutumikiri wa vosi.”

³⁶ Yavugula umwana mukekeeke naamusingiriza imbiri wavo, naamukumbelera ma navavoolera,

³⁷ “Uvugilira mwana kuli uyu mu lieta liange, avugiliraa inzi; na uyu uvugilira inzi siavugiliraa inzi, navuzwa avugiliraa kandi uyu uwanduma.”

Mundu utahing'anaa ni kunyi aveeye harara ni kunyi

³⁸ Yohana yamuvolera, “Mwigizi, kwalola umundu natulizaa amademoni mu lieta liilio, nikumugaya kigira siaveeye mulala kukunyi mba.”

³⁹ Navuzwa Yeso yavoola, “Mutamugayi mba, kigira si haali ho nu mundu okolaa kelolekizu ku lieta liange unyala kutivula madamanu ku inzi.

⁴⁰ Kigira utahing'anaa ni kunyi aveeye harara ni kunyi.

⁴¹ Ligali muvooleraa, ku vosi umuha ekekombe cha mazi munwi kigira muveeye harara ninzi, alanyoola amadanyi.”

Kwikigatariza avandi

⁴² “Mundu wosi okola mulala ku vakekeeke, yava kuvula kusuuvira mu inzi, vwakaveeye vulahi ulugina lonene lusungwi mwigoti, ma asiuvwi mu luliva lwinyanza.

⁴³ Na niiva umukono gugwo gwakakokoli wikigitale no kokora uvwoni, gaduukanaa ugukale. Ni vulahi kwingira mu livamwoyo nu mukono mulala kuvita kuva na makono gombi ma uzie mu gehena, mu muliru gutasimaa. [

⁴⁴ Umwene yimwo izing'ende ziliizaa avandu sizikuzaa mba; kandi muliru gusimaa mba.]

⁴⁵ Niiva ekerenge chicho kilakokola okole uvwoni, kandi, ukikalage! Ni vulahi kwingira mu livamwoyo umulema kuvita kuva ni virenge viombi ma usiuvwi mu gehena [

⁴⁶ umwene yimwo izing'ende ziliizaa avandu sizikuzaa mba; kandi muliru gusimaa mba.]

⁴⁷ Kandi emoni yooyo ne kokoloa okole uvwoni, ugitulizi! Nivulahi, kwingira mu vwami vwa Nyasaye ne moni ndala kuvita kuva ni zimoni ziombi na usiuvwi mu gehena.

⁴⁸ Umwene yimwo zing'ende zitakuzaa zimenyaa mu, kandi umuliru gutasimaa goveeye mu.

⁴⁹ “Vuli mundu alatakaswa nu muliru kuli ikisiuviliru kitakasangwa ni ijumbi.

⁵⁰ “Munyu numulahi, navuzwa niiva gulagotiza ekenosi chagwo, unyala kokora ki ogolombe gugwi munyu kandi? “Muve ne kenosi chu vulina hagati hinyu, kandi mumenye mu mirembe na vandi.”