Marko 8 - KITABU KITAKATIFU

Yeso yalihiza avandu zielefu zine

¹ Mu madiku yago kiduma kenene chavugana kandi, na kigira avandu sivali ni chukulia mba, Yeso yalanga aviigi veve, navavoolera,

² “Mbererera avandu yava kigira vaali harara nainzi amadiku gavaga, na kalunu sivaveeye ni chukulia mba.

³ Niiva ndavavolera vazie yengo ninzara, ihuyuki ilatuula valala kunzira, kigira valala kuvo vatuli ihale.”

⁴ Aviigi veve vamuteeva, “Mundu anyala konyoora hayi ichukulia mu changalangwe ichukulihiza avandu yava vosi?”

⁵ Yeso yavateva, “Muveeye ni migadi janga?” Navo vaamutivulira, “Saba.”

⁶ Yalaga avandu viikare hasi. Maku yavugula migadi saba nasaandiza Nyasaye, nameganyia, nahaana ku aviigi vagavuliri avandu.

⁷ Vaali kandi nu tusuzi tutaveeye utunyingi. Yeso yagasiza utusuzi zana yitwo navoora tugavulilwi avandu kandi.

⁸ Avandu valia ni viiguta. Vadoola amadonye gaatigala, ma ni giizura ivihiinda saba.

⁹ Avandu vosi avaalia vaali avaduuka izielefu zine. Yeso yavasivula

¹⁰ nonoho yingira mu liato naviigi veve nazia mu kivala cha Dalimanuza.

Avafarisayo venya kelolekizu

¹¹ Avafarisayo vaza nivatanga koteeva Yeso amateeva. Vaamugeriza ni venya avakolere ekelolekizu chu kumanyia ndi aveeye nu vunyali kutura mwigulu.

¹² Yeso yatura umwika ligali kutura mugati mwimwe navoora, “Kigira ki likula yili lienyaa ekelolekizu? Muvooleraa agiligali, likula yili sililahevwa ekelolekizu choosi mba.”

¹³ Maku yavaleka ni yingira mu liato niyambuka engeleka winyanza.

Mamera ga Vafarisayo na Herodi

¹⁴ Kunangwa aviigi vaali niviviliiyi kuvugura iviukulia, navuzwa vaali nu mugadi mulala mu liato.

¹⁵ Yeso yavagerihiza navoora, “Mugerihi! Muhenze vulahi kigira amamera ga Vafarisayo na Herodi.”

¹⁶ Aviigi vataanga kotevana aveene nivavoora, “Avoora ndio kigira sikoveeye ni migadi!”

¹⁷ Yeso yamanya liganagana liavo navavoolera, “Kigira ki muvooraa simuveeye ni viukulia? Mukikiri kumanya kandi kuhulira? Imioyo jinyu ni midinyu?

¹⁸ Muveeye ni zimoni navuzwa simulolaa mba? Muveeye na matu navuzwa simuhuliraa mba?

¹⁹ Lwa ndameganyia imigadi jitano niimbana ku avandu izielefu zitano, ni vihinda vianga via mwadoola nivizuuyi amadonye?” Navo vaamutivulira, “Likomi na viviri.”

²⁰ Yeso yavateva kandi, “Lwa ndaameganyia imigadi saba ku vandu izielefu zine, ni vihinda vianga via madonye via mwavungiza?” Navo vaamutivulira, “Saba.”

²¹ Kunangwa yavavolera, “Maku mu kikiri kumanya?”

Yeso yahonyia mboku wa Bezisaida

²² Yeso yaduuka Bezisaida harara na aviigi veve. Avandu vamuleetera umundu umboku ni va mugoonyaa amudiiri.

²³ Yeso yagumira umboku oyo umukono naamuhira ichova wi lidaala. Lwa yaali niyakamutuuzira amate muzimoni zizie, yavika amakono kuye, ma namuteeva, “Unyala kolola ikindu choosi?”

²⁴ Umboku oyo yahenza mwigulu navoora, “Ndolaa avandu, navuzwa vaveeye kuli misaala jigendaa.”

²⁵ Yeso yaamuvikira amakono ku zimoni zizie kandi, na ziakunulwa naye natanga kolola ivindu viosi vulahi.

²⁶ Yeso yamuvolera “Zia yengo, na utiirana mu lidaala mba!”

Petero avulaa ndi Yeso aveeve Mesia Mwana wa Nyasaye

²⁷ Maku Yeso yazia naviigi veve mu madaala ga Kaisaria Filipi. Kunzira, Yeso yateeva aviigi veve, “Avandu vavoola inzi nivwaha?”

²⁸ Navo vaamutivulira, “Valala vavoola ivi ni Yohana Mubatizi, avandi Elija, na vandi vavoola oveeye mulala ku Vaporofeti.”

²⁹ Yavateva kandi “Na munyi muvooraa inzi nivwaha?” Petero yamutivulira, “Ivi ni Mesia.”

³⁰ Maku Yeso yaviganihiza vatavoolera umundu kali mulala amakuva yaga.

Yeso yamoloma kigira lidambizwa, likuza ni lisimuguka lilie

³¹ Maku Yeso yaatanga kwigiza aviigi veve navoora, “Gaduukanaa Mwana wa Adamu avitiri mulidambizwa ilinyingi nu kusuulwa na vakulundu na avasaalisi vanene harara na aviigi vi Lilaga. Aliitwa, na inyima wa madiku gavaga, alasimuguka.”

³² Yeso yavavolera agene yaga havulavu. Kunangwa Petero yamuhira ha lovega natanga kumugaya.

³³ Navuzwa Yeso yagirung'ana nahenza aviigi veve naagondokera Petero na amuvoleraa, “Tula muzimoni ziange ivi Setani! Zing'anagani zizio siziveeye zia Nyasaye, navuzwa ni zia vandu.”

³⁴ Yalanga ikiduma cha vandu na aviigi veve, navavoolera, “Mundu ku vosi uwenyaa kononda, yigaye umwene ma agingi musalaba gwigwe ma yanonde.

³⁵ Kigira umundu wenyaa kohonyia livamwoyo lilie umwene alaligotiza, navuzwa umundu ogotizaa livamwoyo lilie kigira inzi, kandi kigira Ivangeri, alalihonyia.

³⁶ Ni vukala ki umundu anyoore lirova liosi, navuzwa agotizi livamwoyo lilie?

³⁷ Anoho umundu alahaana ki mu vogono vwi livamwoyo lilie?

³⁸ Niiva umundu woosi alava esoni kigira inzi na amigizu gange mu likula litaveeye na Nyasaye yiyi, kandi lichamu maku Mwana wa Adamu alakave zisoni naye lwaliiza. Zingelosi mu vukumi vwa Baba weve harara ni vatakatifu veve.”