Marko 7 - KITABU KITAKATIFU

Miima ja avaguuga

¹ Avafarisayo harara na avigizi vi Lilaga, avaari ni vatuli Jerusalemi vavunga harara imbiri wa Yeso.

² Valora valala ku aviigi va Yeso nivalizaa ichukulia chavo na mamisu. Sivali nivisaavi amakono munzira idukanaa mba.

³ Kigira Vafarisayo na Vayuda vosi valonda amigizu ga vanyoola kutura ku avaguuga vaavo: sivalizaa chukulia nivatisaavi amakono gaavo munzira indahi kolondekana ni miima jaavo mba.

⁴ Sivalizaa ikindu choosi kutura mu chiitu nivakikiri kuchogiza kutanga mba. Valonda malago ni miima jindi minyingi ja vanyoola, kuli kwogiza ivikombe, izinyingu, zibakuli ni vituria vie migasa.

⁵ Kunangwa Avafarisayo na avigizi vi Lilaga vateva Yeso, “Kigira ki aviigi vovo si valonda imiima ja vaguuga viitu vaakolekela, navuzwa mu vogono yivwo, valiza na mamisu ku makono?”

⁶ Yeso yavativulira, “Avagaadi munyi! Muporofeti Isaya yaporofeta agiligali ku munyi lwa yang'oda: ‘Avandu yava vanzizominya na makuva ameere, Nyasaye avoora, navuzwa imioyo jaavo jiveeye ihale kutura ku inzi.

⁷ Vaveeye ku ni kivuni chu kusigamira mba, kigira amigizu gaavo gaveeye vuzwa amalago ga vandu!’

⁸ “Munyi mulekaa amalago ga Nyasaye ni mulonda imiima ja vandu.”

⁹ Yeso yavavolera kandi, “Munyi muveeye ninzira yu vugadi, yu kusuura amalago ga Nyasaye kunangwa muduuki konyoora inzira yokolonda amigizu ginyu aveene.

¹⁰ Musa yalaga, ‘Wizominyi baba woovo na mama woovo,’ kandi, ‘Uyu onyegaa baba anoho mama weve, gamudukira akuzi.’

¹¹ Navuzwa munyi mwigizaa ndi niiva umundu aveeye ni kindu cha anyala kokonya nacho baba weve anoho mama weve, navuzwa avoole, ‘Yiki keveeye Koribani,’ agaveeye kovora keveeye cha Nyasaye,

¹² sianyala kunigwa kokonya baba weve anoho mama weve mba.

¹³ Munzira yiyi, amigizu gamuhanaa ku vandi gatulizaa ho likuva lia Nyasaye. Viveeye ho kandi ivindu vindi vinyingi viu lugano yilu ivia mukoraa.”

Vindu vikola umundu kuva umudamanu

¹⁴ Maku Yeso yalanga kandi ikiduma cha vandu navavoolera, “Munyi mwosi mumbulirizi, ma mumanyirize.

¹⁵ Ikindu kitulaa ichova ma chingira mu mundu sikinyala kumulomba ave mudamanu kolondekana nu mwima mba. Nitali ivindu vituraa mu mwoyo gwu mundu nivio ivimukolaa umudamanu.

¹⁶ [Nimuva nimuveeye na matu gu kuhulira, muhuliri!]”

¹⁷ Lwa yaali niyakatula mu kiduma cha vandu nu kwingira munyumba, aviigi veve vamuteeva ilivoola liu lugano yilu.

¹⁸ Yeso yavavolera, “Kali munyi kandi simuveeye avageri kuli avandi. Munyi si mumanyi ndi ikindu kingiraa mu mundu kutura ichova si kinyala ku mukora umudamanu mba,

¹⁹ kigira si kimwingira mu mwoyo mba, navuzwa kizizaa munda, na inyima kitulaa ichova?” Mu livoora yaga, Yeso yavoola iviukulia viosi vive iviukuliivwa.

²⁰ Yaazizagilira kovora, “Keveeye ikitulaa mu mundu nicho ikimukolaa avuli kuva munifu.

²¹ Kigira ivitulaa mugati mu mwoyo gwu mundu vituraa mu zing'anagani zindamanu izimwimiliraa kokora uvudamanu zing'ano ziosi, ukunuura, ukwita, livolizana,

²² okoheya, ukukayirwa, uvuviti kokora kifavi chi zing'ano ziosi; ovovehi, embodoka, kolegeriza, kugina kwelola harara nuvusiru

²³ ivindu vidamanu yivi viosi vituraa mugati mwu mwoyo gwu mundu, ma vimukola mudamanu.”

Lisuuvira liu mukali Mukanani

²⁴ Yeso yatura ho kandi, nazia mu kivala cha Tiro na Sidoni. Yingira munyumba na avula kwenya umundu kali mulala amanye; navuzwa si yaali unyala kwivisa mba.

²⁵ Ahene yaho umukali mulala, wu mukaana weve yaali ni lidemoni, yahulira Yeso aveeye mu. Yaza naagwa hasi, imbiri hi virenge via Yeso.

²⁶ Mukali zana oyo yaali Muguriki, wivulwa mu losoma lwa Foenisia mu Siria. Yagoonya Yeso akungi ilidemoni kutura mu mukaana weve.

²⁷ Yeso yamuvolera, “Avana vatange kwiguta; kigira sivoveeye vulahi kuvugura ichukulia cha vana nu kusigisira izimbwa mba.”

²⁸ Navuzwa umukali oyo yamuvolera, “Gaveeye ndio, Mwami; navuzwa kali izimbwa ziveeye isi we mesa ziliizaa amadonye gi viukulia via vana agatigala komesa.”

²⁹ Yeso yamuvolera, “Kigira livoora yili, zia yengo. Lidemoni limali kutura ku mukaana woovo!”

³⁰ Maku yazia yengo weve, nanyoora umwana naagoni ku kidali, ni lidemoni limali kutura muye.

Yeso yahonyia dimbidi

³¹ Lwa nyima Yeso yatura mu kivala cha Tiro, naavitira Sidoni, naduuka kunyanza ya Galilaya ma naavitira hagati hi kivala cha Dekapolisi kilangwa.

³² Avandu vamuleetera umundu waali dimbidi. Vamugoonya aviiki amakono kuye.

³³ Yeso yaamutuliza mu avandu naamuhira ha lovega yenyine, naviika videte vivie mu matu geege, naatuza amate ma namudiira ku lulimi.

³⁴ Inyima yahenza mwigulu natuula umwika, namuvolera, “Efaata,” iliveeye kovora, “Igulika.”

³⁵ Ahene yaho amatu geege giigulika, nu ululimi lwilwe ni lovoholorwa, namoloma vulahi.

³⁶ Yeso yavagaya nukuviganihiza vatavoolera mundu kali mulala likuva yilio. Navuzwa kali niyavagaya, vazizagilira kulandiza amakuva yago.

³⁷ Avandu vagenya ligali kuvita, ni vavoola, “Akolaa ivindu viosi vulahi akolaa kali avahana amatu vahuliri, ni zidimbidi vamolome!”