Marko 6 - KITABU KITAKATIFU

Yeso yasuulwa ha Nazareti

¹ Yeso yatura ahene yaho niyirana mu lidaala lilie, aviigi veve vaamulonda.

² Ku lidiku lie Lisabato, yaatanga kwigiza mu lisinagogi. Avandu avanyingi avamuhulira vagenya ni vavoola, “Mundu uyu yaatuliza hayi amakuva yaga goosi? Ni vogeri ki vwa yahevwa yivu? Akokoraa ivilolekizu kuturana kuliha?

³ Uyu siaveeye umuvazi, umwana wa Maria, amwavo Yakobo, Jose, Yuda na Simoni? Avavozo veve si vamenya hano harara ni kunyi?” Na vamusuura.

⁴ Yeso yavavolera, “Muporofeti anyala koheevwa uvukumi ihale kutura yengo weve, navuzwa achayangwa mu lidaala liatura mu, harara naviiko kandi avinyumba yeeye.”

⁵ Si yaali anyala kokora ho ivilolekizu ivinene mba, nitali yavika amakono geege ku valwaye vakekeeke kandi naavahonyia.

⁶ Yaagenya ligali kigira sivali ni lisuuvira linene mba. Yeso yavodong'ana mu madaala agaali ahimbi, ni yigiza avandu.

Yeso yatuma aviigi likomi na vaviri

⁷ Yalanga aviigi veve likomi na vaviri, natanga kuvatuma vaviri, vaviri. Yavaha uvunyali kutuliza amademoni.

⁸ Yavagaya navoora, “Lwa muzia mutavugula ikindu choosi mba, nitaveeye imbimbu yenyine. Mutavugula imigadi, anoho umusigo, anoho mabese zimuya.

⁹ Mwiviki ivilato, navuzwa mutiviika izinguvu ziviri mba.”

¹⁰ Yavavolera kandi, “Hoosi aha mwingirizwa munyumba, mu menye mu kuduuka lwa muturaa ho.

¹¹ Navuzwa hoosi ha vandu valivula kumwingiriza anoho ku muhulira, muturi ho namweye uluguchi lwu mu zinduvatiru zienyu, yaga gave ekelolero kuvo.”

¹² Kunangwa vaatura ni vilwazira avandu vaduuki kwiganira.

¹³ Vakunga amademoni amanyingi, kandi ni vaavaka avalwaye avanyingi amaguta nu kuvahonyia.

Likuza lia Yohana Mubatizi

¹⁴ Kalunu Umwami Herodi yahulira amakuva yago, kigira lusuma lwi lizominywa lia Yeso lwalanda mu kivala choosi. Avandu valala vavoola “Yohana Mubatizi usimuguki kutura mu vakuzu! Yicho nicho kivuni kigira naveeye ni zinguru yizi okokora vilolekizu vinene yivi muye.”

¹⁵ Avandi navo vavoola, “Mundu uyu ni Elija.” Avandi vavoola, “Uyu aveeye muporofeti kuli mulala ku vaporofeti va kale.”

¹⁶ Lwa Herodi yahulira amakuva yaga, yavoola, “Uyu ni Yohana Mubatizi! Inzi ndaalaga umutwi gwigwe gukalwe, navuzwa usimuguki!”

¹⁷ Herodi mwene yaali nahaani lilago Yohana agumirwi, ma avofwi ni minyororo, ma avikwi muvuhambe. Herodi yakola ndio kigira Herodia, umukali wa amwavo weve Filipo uwa yaali navuguyi kuva umukali weve.

¹⁸ Yohana yaali na avoleeye Herodi, “Sigaduukana ivi kuvugura umukali wa amwavo woovo mba.”

¹⁹ Maku Herodia yavugula uvutima ovonene ku Yohana, niyenya kumwita, navuzwa si yanyala mba kigira Herodi

²⁰ yaali ni yatia Yohana kigira yamanya aveeye umundu umulahi kandi umutakatifu. Kulwayago yamukinga vulahi. Herodi yayanza kuhuliriza aga Yohana yavoola, kali niiva yaahenda umwoyo ligali ing'inga yoosi yayamuhulirizaa.

²¹ Lwu kumaliriza Herodia yanyoora uvwiyangu vwivwe. Lwi lidiku lie liivulwa lia Herodi liaduuka, Herodi yalombera avanene veve vosi, harara na vakulundu va Galilaya vosi lilia.

²² Mukaana wa Herodia yingira navina, nayaanziza Herodi harara na avageni veve ligali. Mwami yavolera mukaana oyo, “Usave inzi choosi cha wenyaa nainzi ndakuha.”

²³ Herodi ya mwisuuhira navoora, “Choosi icha ondeva, ndakuha; kali niiva ni inusu yu vwami vwange.”

²⁴ Mukaana oyo yatura nazia koteeva mama weve, “Muteeve ki?” Naye yamutivulira, “Umutwi gwa Yohana Mubatizi.”

²⁵ Mukaana yirana vwangu ku mwami namuvolera, “Nyenya ombe ulwene yilu umutwi gwa Yohana Mubatizi ku loderu.”

²⁶ Mwami yavelera ligali, navuzwa kigira iliesuuha lia yisuhira imbiri wa vageni veve, si yayanza kuvunanyia lilaga lilie mba.

²⁷ Kunangwa umwami yatuma vwangu mulala ku vasikari avamulindaa, naamulaga aleete umutwi gwa Yohana. Musikari yazia nakalaga umutwi gwa Yohana muvuhambe,

²⁸ ma nagoleetera koloderu, naha umukana naye yaguhaana ku mama weve.

²⁹ Lwa aviigi va Yohana vagahulira, vazia kuvugura muviri gwigwe nivaguvika mu kilindwa.

Yeso yalihiza vandu zielefu zitano

³⁰ Avatumwa virana kandi nivaagaana na Yeso. Vamuvolera goosi aga vaali nivakoli kandi aga vigiza.

³¹ Avandu vaali avanyingi avaazaa kandi nivazia, ukuduuka kali Yeso na aviigi veve nivadaka uvwiyangu vwukulia. Yeso yavolera aviigi veve, “Hambi kuzie kwenyine aha vandu vataveeye, musoose hakekeke.”

³² Kunangwa vataanga logendo venyine mu liato nivazia aha vandu vavura kuva.

³³ Avandu vanyingi vaavalola nivazizaa, ma vavamanyiriza; kulwayago vaatura mu madaala goosi, ni vanyagura nivimila uwa Yeso na aviigi veve vazizaa, nivavavita kandi niviizura yo.

³⁴ Lwa Yeso yika ku lujinga lwinyanza, yalora ikiduma ekenene cha vandu navavererera, kigira vaali kuli amagondi gataali nu mwayi. Yaatanga kuvigiza ivindu vinyingi.

³⁵ Ing'inga yaali niviiti, kulwayago aviigi vazia ku Yeso ni vamuvolera, “Hano ni mukiziimi, kandi kalunu ing'inga iviti.

³⁶ Nivulahi ovoolere avandu yava vazie mu milimi nu mumadala gaveeye ahimbi, viguliri iviukulia.”

³⁷ Navuzwa Yeso yavavolera, “Munyi mu vahe ichavalia.” Navo vamuteeva, “Kuzie kugura imigadi ji vidonye mia mbiri viefeza kuvahe valie?”

³⁸ Yeso yavateva, “Muveeye ni migadi janga? Muzie mulole.” Lwa vaali ni vaakalola, vamuvolera, “Jiveeye ho imigadi jitano, ni zisuzi ziviri.”

³⁹ Yeso yavolera aviigi veve viikalize avandu vosi mu viduma.

⁴⁰ Maku viikara mu viduma via avandu mia, na avandi mu viduma via vandu amusini.

⁴¹ Maku Yeso yavugula imigadi jitano ni zisuzi ziviri yizio, nahenza mwigulu, nasaandiza Nyasaye, nameganyia imigadi, naha aviigi veve vagavuliri avandu. Yavagavulira izisuzi ziviri yizio, kandi hagati haavo vosi.

⁴² Avandu vosi valia niviguta.

⁴³ Aviigi vavungiza amadonye gaatigala ku migadi nu kuzisuzi. Vavungiza amadonye mu vihinda likomi na viviri nivizuuyi.

⁴⁴ Avandu vosi avaalia imigadi, vaali izieletu zitano.

Yeso yagenda ku mazi

⁴⁵ Nonoho Yeso yavolera aviigi veve vingiri mu liato viimili imbiri, kuzia ku lwangereka lundi lwinyanza kuduuka Bezisaida. Naye yaali nakisiivula avandu vazie yengo.

⁴⁶ Lwa yamala kuvasiivula, yazia mu kiguru kusaala.

⁴⁷ Lwa mugolova gwaduuka iliato liali hagati munyanza naye yaali yenyine ku lujinga.

⁴⁸ Yalora aviigi veve nivanyang'anaa kuhila iliato kigira imbuza yaavahunzulanyia yiyi na yiyi. Lwa vwali nivuchezaa, hagati hi zisa tisa ni zisa likomi na ziviri zia mugamba, Yeso yazia kuvo na agendaa ku mazi ni yenya kuvavita.

⁴⁹ Navuzwa lwa vamulola na agendaa ku mazi, vaganagana ni kigiingi. Vaakuba izikwiri.

⁵⁰ Vosi lwa vamulola, vaadegera ligali. Nonoho Yeso yamoloma kuvo navoora, “Lemi mioyo, ninzi. Mutatia mba!”

⁵¹ Yanina mu liato harara navo kandi imbuza yakiring'ana. Aviigi vagenya ligali,

⁵² kigira sivamanyiriza kuli gakolekaa lwa Yeso yalihiza avandu izielefu zitano mba; iziganagani ziavo ziali nu vudinyu kumanyiriza agiligali ge kelolekizu yiki.

Yeso yahonyiaa avalwaye mu kivala cha Genesareti

⁵³ Lwa vaali nivakambuka inyanza, vaduuka mu kivala cha Genesareti ni vavoha iliato ku lujinga.

⁵⁴ Lwa vaatura mu liato, avandu vamanyiriza Yeso vwangu.

⁵⁵ Kunangwa vanyagura mariviti, mu kivala yicho choosi, ni vataanga kugingira avalwaye vaavo ku majambi, ni vavaleeta havundu hoosi aha vahulira Yeso aveeye.

⁵⁶ Hoosi aha Yeso yazia, mu tudaala, mu madaala, anoho mu kivala choosi, avandu valeta avalwaye mu viitu, ni vamuhoomba avavugiliri kudiira vuzwa ku lukigiti lwi inguvu yeeye. Na vosi avamudiira vaahona.