Marko 5 - KITABU KITAKATIFU

Yeso yahonyia mundu waali na mademoni

¹ Yeso harara na aviigi veve vaduuka lwangereka lundi lwinyanza ya Galilaya mu kivala cha Gerasa.

² Lwa Yeso yika kutura mu liato, yavugana nu mundu waatura mu vilindwa uwaali ni lidemoni.

³ Umundu oyo yaali ni yamenya mu vilindwa. Sihaali ho nu mundu ku vosi uwaali anyala kumuvoha kali ni minyororo mba.

⁴ Yaali ni yavofwa haali kanyingi ni vivia kandi minyororo, navuzwa yagadula iminyororo kandi akalanyia ivivia zana. Umundu si yaali ho ni zinguru ziu kumukiring'anyia mba.

⁵ Zing'inga ziosi, uvudiku nu mbasu, yaali mu vilindwa nu mu vigulu, nahanzuka nu kwiduya na magina.

⁶ Ulwa yalora Yeso nakikiri ihale, yanyagura nazia kusigama imbiri weve,

⁷ nahanzuka nu mwoyo munene navoora, “Onyenyaa ki ivi Yeso Mwana wa Nyasaye, oveeye igulu Ligali? Ngogonya, imbiri wa Nyasaye, utandambiza mba!”

⁸ Yavoola ndio kigira Yeso yaali namuvooleye, “Ivi lidemoni, tula mu mundu uyu!”

⁹ Yeso yamuteeva, “Ilieta liilio nivwaha?” Naye yamutivulira, “Ilieta liange ni Legiona, kigira koveeye avanyingi!”

¹⁰ Yaazizagilira kogoonya Yeso avuli kukunga amademoni kutura mu kivala yicho mba.

¹¹ Chaali ho ichayo chi zinguruvi ichaali nichayaa ha kiguru.

¹² Amademoni yago gagoonya Yeso ni, gavoora “Ukutumi kuzie mu zinguruvi, kwingiri muzio.”

¹³ Naye yaavugilira. Maku mademoni yago gaturaa vwangu ni gikuba muzio. Ichayo choosi ikiduuka izielefu ziviri chasulunguta zimbiru ni zigwa munyanza, nizikuzira mu.

¹⁴ Yavo avaari avayi vi zinguruvi yizio viiruka nuvuti nivavoora amakuva yago mu lidaala nu mu kivala. Vandu vaatura ni vazia kolola agaali ni gekoleki.

¹⁵ Lwa vazia ku Yeso, valora umundu waali na mademoni niyikaye makiriri, kandi niyiviiki zinguvu, vaali nu vuti.

¹⁶ Avandu vaali nivaloli agaali ni gekoleki, vavoolera avandi amakuva gaali negekoleki ku mundu wa mademoni gaali nigaagumira, kandi agaakoleka ku zinguruvi.

¹⁷ Maku vataanga kogoonya Yeso atuli mu kivala chavo.

¹⁸ Lwa Yeso yaali ni yingiraa mu liato, umundu wa mademoni gaali nigaagumira yamugoonya, “Leka nzie harara na ivi!”

¹⁹ Navuzwa Yeso yamugaya, namuvolera, “Zia yengo woovo ku avandu vovo, uvavoolere ivindu vinene viu Mwami akokoleeye, kandi kuli amali kukovelerera.”

²⁰ Kunangwa umundu oyo yatura nazia kuvitira mu Dekapolisi, navoora ivindu via Yeso yaali naamukoleye. Avandu vosi avahulira vagenya ligali.

Mukaana wa Yairo nu umukali wadira kunguvu ya Yeso

²¹ Lwa Yeso yaali namali kwambuka kandi ni liato ku lwangereka lundi lwinyanza, ikiduma ekenene chavunga imbiri weve; naye yaali nasingiyi ahimbi ninyanza.

²² Yaza mulala ku aviimiliri vi lisinagogi, ilieta lilie yalangwa Yairo. Lwa yalora Yeso, yagwa havirenge vivie

²³ namugoonya ligali, navoora, “Mukaana wange mukekeeke aveeye ahimbi kukuza. Mwaza ngogonya, nuyanza hamba uviiki kuye amakono googo, ahone, ave mwoyo!”

²⁴ Yeso yazia harara naye. Ni kiduma cha avandu avanyingi ligali vamulonda, ni vamumiina kutura izimbega ziosi.

²⁵ Yaali ho mukali mulala umulwaye uwataaza amasahi ku lwi mihiga likomi na giviri,

²⁶ Kali niiva yaali niyaazia ku avaahi vi zinyasi avanyingi, siyaahona mba. Yaali niyaatumikira mabese manyingi, navuzwa yaazizagilira kulwala kuvita lwambiri.

²⁷ Lwa yahulira amakuva ga Yeso, yaza nang'unya mu kiduma inyima weve, nadiira kunguvu yeeye,

²⁸ niyevolera umwene, “Nindiira kunguvu yeeye vuzwa, ndahona.”

²⁹ Mukali uyu yadira kunguvu ya Yeso, ahene yaho ilitaaza lia masahi geege liakalizira; kandi yahulira naahoni mu muviri gwigwe.

³⁰ Ahene yaho Yeso yamanya ndi izingulu ziituli kuye, yagirung'ana mu kiduma nateeva, “Nivwaha udiiyi kunguvu yange?”

³¹ Aviigi veve vaamutivulira, “Olola kuli ikiduma kiminanaa, na ivi oteeva, ‘Nivwaha undiiyi?’ ”

³² Navuzwa Yeso yaazizagilira kohenza izimbega ziosi alore umundu okoli ndio.

³³ Navuzwa umukali oyo kigira yamanya ichaali nikekoleki kuye, yagwa hasi imbiri wa Yeso novodegeri, namuvolera agiligali goosi.

³⁴ Yeso yamuvolera, “Mukaana wange, lisuuvira liilio likohonyi. Zia ni mirembe na ohone ligali.”

³⁵ Lwa Yeso yaali nakevoola ndio, avandu valala vaza kutura munyumba ya Yairo, ni vamuvolera, “Mukaana woovo umali kukuza. Leka Umwigizi ave!”

³⁶ Yeso siyavugula ikindu mu gavavoola mba, navuzwa yavolera munene wi lisinagogi, “Utatia mba, suuvira vuzwa.”

³⁷ Siyavugilira umundu woosi kumulonda mba natali Petero Yakobo na Yohana amwavo weve venyine.

³⁸ Lwa vaduuka hango hu munene wi lisinagogi, Yeso yahulira iliyoga, ililira ni lisioma ilinyingi.

³⁹ Yingira munyumba, navavoolera, “Kigira ki mukubaa zikwiri ni musiomaa? Mukaana uyu siakuzi mba, agonaa.”

⁴⁰ Vatanga limuhenyahenya. Yavavolera vatuli ichova vosi, ma navugura baba na mama wu mukaana oyo harara na aviigi veve, ni vingira ahu mwana yaali naagoni.

⁴¹ Yagumira umwana mukono namuvolera, “Talitakumi,” iliveeye kovora, “Mwana mukaana, ngovolera uvuki!”

⁴² Ahene yaho umukana oyo yavuka nagenda. Yaali naveeye ni mihiga likomi na giviri. Lwayaga geekoleka, avandu vagenya ligali kuvita kegero.

⁴³ Navuzwa Yeso yaviganihiza ligali vatalandiza amakuva yaga ku mundu kali mulala mba. Yavavolera vahe mukaana oyo ichukulia.