Marko 4 - KITABU KITAKATIFU

Lugano lwu Mumizi

¹ Yeso yaatanga kwigiza naveeye ku lujinga lwinyanza ya Galilaya. Ikiduma kenene cha vandu cha mukumbiriza kuduuka ni gamuniga kwingira mu liato; ni yikala mu. Liato liali munyanza ni kiduma choosi chasingira ku lujinga.

² Yaviigiza ivindu vinyingi mu zing'ano, navavoolera:

³ “Huliri! Umumizi yatura nazia kumiza uvuguza vwivwe.

⁴ Lwa yaali namiiza, vulala vwagwa kunzira, na amanyonyi gaaza ni gavovoza.

⁵ Uvundi vwagwa ku magina ahatali na marova manyingi. Uvuguza yivwo vwamera vwangu kigira amarova gaali ho makekeeke.

⁶ Lwi iliuva liatonga vwaniala; kigira imiri javwo si jaali ni zinguru, vwuma.

⁷ Uvundi vwagwa mu mafa, na amafa gaviruka, ni gavumiina, ma ni vuvura kwama.

⁸ Uvundi vwagwa mu marova magunamu vwa viruka ni vwama. Vulala vwaleeta amakomi gavaga, uvundi amakomi sita, na uvundi mia.”

⁹ Maku Yeso yamaliriza kovora, “Ka huliri ligali, niiva muveeye na matu.”

Kivuni cho komoloma mu zing'ano

¹⁰ Lwa Yeso yaali naveeye yenyine, avalala ku yavo avaari vamali kumuhuliriza vazia kuye harara na aviigi likomi na vaviri nivamuteeva ikivuni chu lugano yilwo.

¹¹ Naye yavativulira, “Munyi muheveywi kumanya agimbisu yu vwami vwa Nyasaye, navuzwa avandi vosi avaveeye ichova valavolerwa ikindu choosi mu zing'ano,

¹² Kunangwa, ‘Lihenza valahenza ligali, navuzwa si valalola mba lihulira valahulira ligali, navuzwa si valamanya mba. Kigira niiva vakakoli ndio, vaali vakagirungani ukwilanira Nyasaye, kandi naye yakavasamiihi uvwoni vwavo.’ ”

Yeso yiivara lugano lwu mumizi

¹³ Ahene yaho Yeso yavateva, “Niiva si mu manyi ulugano yilu, mwakamanya ndi izing'ano zindi ziosi?

¹⁴ Umumizi amiizaa ilikuva lia Nyasaye.

¹⁵ Avandu valala vaveeye kuli uvuguza vugwizaa kunzira; lwa vahuliraa, Setani yaazaa vwangu mavanyaga ilikuva limali kumiizwa muvo.

¹⁶ Avandu vandi vaveeye kuli uvuguza vugwizaa kulwanda. Lwa vahulira ilikuva valivugula vwangu nu vuyanzi vonene.

¹⁷ Navuzwa silivingiraa nu kuhila imiri muvo mba. Navo vidinyirizaa mu Iikuva zana hakekeke vuzwa. Na ing'inga valora ikivi anoho ilidambizwa kigira likuva lia Nyasaye, nonoho ilisuuvira liavo likuzaa.

¹⁸ Avandi vaveeye kuli uvuguza vugwizaa muvulimu vwa mafa. Yava nivo avahulira ilikuva,

¹⁹ navuzwa uvunyang'ani vwi lirova yili, iliegomba liu vutugi, harara ni liegomba lie vindu vindi viosi vingira muye mavikunika likuva zana; na kigira yaga goosi ilikuva zana silinyala kwama amakuyu mba.

²⁰ Navuzwa avandu vandi vaveeye kuli uvuguza vugwizaa mu marova magunamu. Vahuliraa ilikuva, valivugilira, kandi vaama amakuyu: avalala salasini, avandi sitini, na avandi mia.”

Itaya mu kihinda

²¹ Yeso yaazizagilira kuvavoolera, “Aveeye ho mundu uvugura itaya ma agikunikira mu kihinda anoho agiviikaa mu lwaalo lwi kidali? Si amanyaa agiviikaa yigulu komesa?

²² Ichaaviswa choosi kilakaloleke ichova havulavu kandi yicho ichakunikirwa kilakakunurwi.

²³ Umundu oveeye na matu gukuhulira, ahuliri!”

²⁴ Yeso yavavolera kandi, “Mutegize amatu ku goosi aga muhulira! Amalago ga mutumikiraa kukalagira avandu vandi, nigo aga Nyasaye atumikiraa kumukalagira nu vutima vonene kuvita ligali.

²⁵ Umundu oveeye ni kindu alamedwa, na utaveeye ni kindu alanyagwa kali ikikuzuzu chaveeye nacho.”

Ulugano lwu vuguza vuvirukaa

²⁶ Yeso yaazizagilira kovora, “Uvwami vwa Nyasaye voveeye kuli umundu umiizaa uvuguza mu mulimi.

²⁷ Agona vudiku kandi avukaa mbasu, nu uvuguza navwo ni vomera kandi kuviruka. Navuzwa oyo siamanya kuli vuvirukaa mba.

²⁸ Lirova liene livirukizaa ivitaagwa kandi lilomba amakuyu kwama; kutanga komera, kuviruka, lwu kumaliriza, kwama vuswage.

²⁹ Na lwu vuswage vokomeraa, umundu oyo avugulaa muvano atangaa kogesa, kigira ing'inga yi ligesa iduuki.”

Lugano lwu luguza lwi lisaazi

³⁰ Yeso yavoola, “Kufananyia naki Uvwami vwa Nyasaye? Kutumikira lugano ki kwivaala?

³¹ Loveeye kuli luguza lwi lisaazi, oloveeye olokekeke kuvita uvuguza vwosi mu lirova.

³² Navuzwa lwa lutagwa, lomeraa nukugwa kitagwa kenene ligali kuvita vitagwa viosi; lutulizaa zisia zinene kuduuka amanyonyi gigulu galuhaa gumbakaa hasi mu chiriri chagwo.”

³³ Yeso yavilwazira likuva lilie mu zing'ano zinyingi kuli yizi; yavavolera kuduuka nivahulira.

³⁴ Siyavavoolera ikindu choosi vugira kutumikira izing'ano mba, navuzwa lwa yaali na aviigi veve venyine, yaali anyala kuvivaalira vuli kindu choosi.

Yeso yakiring'anyia iviguvuli

³⁵ Lwa gwaduuka mugolova ku lidiku liene yilio Yeso yavolera aviigi veve, “Gendi kwambuki kuzie ku lwangereka lundi.”

³⁶ Kunangwa valeka ikiduma cha avandu; aviigi veve vanina mu liato lia Yeso yaali niyikaye mu. Amato gandi gaali ho kandi.

³⁷ Kihuzuzi kenene chahuuza kandi iviguvuli ni vikuya ku liato, ma nilitanga kwizura amazi.

³⁸ Yeso mwene yaali inyima mu liato naagonaa naviiki mutwi ku ipilo. Aviigi veve vaamuvukiza ni vamuvolera, “Mwigizi, ivi siohendaa ndi koveeye ahimbi kudiva?”

³⁹ Yeso yavuka naagondokera imbuza, navoora “Kiring'ana! Lengela!” Imbuza yalekera, na gwaali umulengera munene.

⁴⁰ Yeso yateeva aviigi veve “Kigira ki mutiizaa? Si muveeye ni lisuuvira?”

⁴¹ Maku vaatia ligali ni vateevana, “Uyu nivwaha? Kali imbuza ni viguvuli vimuhulira!”