Marko 3 - KITABU KITAKATIFU

Yeso yahonyia mundu wu mukono gwang'era

¹ Maku Yeso yingira kandi mu lisinagogi, umundu yaali mu uwaali ni yaang'era umukono.

² Avandu valala vaali mu avenya kwihambihiza Yeso vamunyoole nuvudamanu. Vahenza valore niiva Yeso yaali anyala kohonyia umundu oyo ku lidiku lie Lisabato.

³ Yeso yavolera umundu waali niyang'era mukono, “Hamba usingiri imbiri yinu.”

⁴ Maku Yeso yateeva avandu, “Amalago giitu gakuvugiliraa kokole ki ku lidiku lie Lisabato? Gaduukanaa kokonye anoho kusalirizi? Kohonyie ilivamwoyo liu mundu anoho kulidivizi?” Navuzwa vakiring'ana.

⁵ Yeso yavahenza zimbega ziosi navihilirwa, kandi navavererera kigira uvudinyu vwi mioyo jaavo. Yavolera umundu oyo, “Nyira mukono gugwo!” Naye yanyira umukono gwigwe, nagwo gwahona ligali.

⁶ Kunangwa, Avafarisayo vaatura ichova, nonoho, vavolerana harara na vandu avumuganda gwa Herodi valohizi kuli vaali vanyara kwita Yeso.

Ikiduma ahimbi na Inyanza

⁷ Yeso harara na aviigi veve vaatura ahene yaho nivazia ku lujinga lwinyanza ya Galilaya. Kiduma kenene cha vandu chamulonda kutura Galilaya, Ivuyuda,

⁸ Jerusalemi, Idumea, ni Ivugwi wu Mugera gwa Jorodani kandi kutura Tiro na Sidoni. Avandu yavo vaali kiduma kenene ligali. Vazia ku Yeso kigira vaali ni vaahuliyi ivindu vinyingi via yakola.

⁹ Yeso yavolera aviigi veve vamwetegekiziri iliato, gase ikiduma kilamumiina.

¹⁰ Yaali niyakohonyia avandu avanyingi. Avalwaye vosi vamiinana nivenya kuzia vaduuki ahimbi kuye vamudiiri.

¹¹ Lwa avandu avaari na mademoni vamulola, vaagwa hasi mam'mama imbiri weve ni vakuba lukwiri, “Ivi oveeye Mwana wa Nyasaye!”

¹² Yeso yagaya amademoni vululu gavuli kumuvura.

Yeso yatovola avatumwa likomi na vaviri

¹³ Yeso yazia mu kiguru, nalaanga vosi ava yenya vaze kuye. Vaza kuye,

¹⁴ yatovola avandu likomi na vaviri avayalanga “Avatumwa.” Yavavolera, “Mali kotovola munyi muve harara nainzi. Nandumi munyi kandi muzie ichova kwilwaza,

¹⁵ kandi mulava nuvunyari kukuunga amademoni.”

¹⁶ Yava nivo likomi na vaviri avayatovola: Simoni uwa Yeso yagulika Petero,

¹⁷ Yakobo na Yohana, avayaayi va Zebedayo Yeso yavagulika Boanerige, iliveeye kovora, “Avasaza vi Inguba”

¹⁸ Andereya, Filipo, Baturumayo, Matayo, Tomasi, Yakobo muyaayi wa Alufayo, Tadayo, Simoni Mukanani,

¹⁹ na Yuda Esikarioti, uwazaama Yeso.

Yeso na Belizebuli

²⁰ Lwi nyima Yeso yazia yengo. Ikiduma ekenene chivungizana kali Yeso na vigi veve nivadaka uvwiyangu vwu kulia ichukulia.

²¹ Lwa avinyumba yeeye vahulira, vazia kumugumira kigira avandu vaali ni vavoola, “Yaali kulaluka.”

²² Avigizi valala vi Lilaga avaari nivatuli Jerusalemi vavoola, “Aveeye na Belizebuli muye! Belizebuli uyu niyie umunene wa mademoni umuhezaa zinguru kugakuunga.”

²³ Kunangwa Yeso yavalanga navavoolera mu Zing'ano, “Setani anyala ndi kukuunga Setani?

²⁴ Niiva uvwami vwi kivala vulavukana uvwene, uvwami yivwo si vunyala kusingira mba.

²⁵ Niiva vandu vinyumba valavukana mu vidieli ivielwaanaa iviene ku viene, inyumba yeyo si inyala kuhindira mba.

²⁶ Kulwayago niiva uvwami vwa Setani vunyala kwavukana mu vidieli viukwilwaana iviene ku viene, si vunyala kuhindira mba, navuzwa vulavunikana nu kumalirika.

²⁷ “Sihaveeye nu mundu unyala kwingilira inyumba yu mundu wi zinguru ma amunyage imiandu jije vugira kovoha wi zinguru oyo kutanga, maku amunyage imiandu jije zana.

²⁸ “Ligali, ligali inzi muvooleraa, avandu vanyara kusamiifwa uvwoni vwavo vwosi harara na mahiolo gaavo goosi.

²⁹ Navuzwa uyu ulinyega Roho Mutakatifu sialisamiifwa kali hakuzu mba, kigira umali kokora uvwoni vwi mihiga ni mihiga.”

³⁰ Yeso yavoola yaga kigira avandu valala vaali ni vavooye, “Aveeye ni lidemoni muye.”

Mama wa Yeso na vamwavo veve

³¹ Kunangwa Mama wa Yeso na vamwavo veve vaza nivasingira ichova, ni vatuma umundu amulange Yeso.

³² Ikiduma cha vandu chaali ni chikaye kumukumbiriza. Vamuvolera, “Mama woovo na avamwavo vovo vaveeye ichova vakwenyaa.”

³³ Yeso yavavolera, “Mama wange na avamwavo vange ni vanga vwaha?”

³⁴ Yahenza avandu vaali ni vamukumbirizi navoora, “Heenzi! Yava nivo avaveeye mama wange na a vamwavo vange.

³⁵ Umundu woosi okolaa kuli Nyasaye yenya, oyo niyie amwavo wange, mbozo wange kandi mama wange.”