Marko 2 - KITABU KITAKATIFU

Yeso yahonyia umundu wafogoya

¹ Inyima wa madiku makekeeke, Yeso yirana Kaperinaumi, na vandu vahulira ndi umali kuuza yengo munyumba yeeye.

² Avandu vanyingi vaza ni vavunga, ni vadaka uvwiyangu kigira vaduuka nu mukiliango. Yeso yaali navilwaziraa ilikuva,

³ lwa avandu vane vaza ni vamuleetera umundu wafogoya, nivamugingi.

⁴ Na kigira uvunyingi vwa avandu, si vaali vanyara kwisunda ahimbi ku Yeso mba. Kulwayago, vaafudura igulu winyumba ha Yeso yali. Lwa vamala koveta ho, vikizira ho uwafogoya oyo naagoni ko vogono vwivwe.

⁵ Lwa Yeso yalora ilisuuvira linene lia vaali nalio, yavolera uwafogoya, “Mwana wange, usamihiywi uvwoni vuvwo.”

⁶ Avigizi valala vi Lilaga avaari nivikaye ho, vaganagana mu mioyo jaavo,

⁷ “Umundu uyu amolomaa ndi kigira ki? Yaga na manyego! Ni vwaha wundi unyala kusamiiha uvwoni natali Nyasaye yenyine?”

⁸ Ahene yaho Yeso yamanya mu mwoyo gwigwe aga vaganagana mu mioyo jaavo, kunangwa yavavolera, “Kigira ki muganaganaa ndio mu mioyo jinyu?

⁹ Ekeveeye ichangu ni kiliha? Kovoolera uwafogoya, ‘Usamihiywi uvwoni vuvwo,’ anoho kovora, ‘Singira, ugingi ovogono vuvwo, ogende?’

¹⁰ Navuzwa nyenya mu manye ndi, Mwana wa Adamu aveeye ni zinguru mu kivala ukusamiiha avandu uvwoni.” Kunangwa yavolera umundu waali ni yaafogoya oyo,

¹¹ “Ngovolera, singira ugingi ovogono vuvwo, na uzie yengo.”

¹² Nonoho yasingira navugura vogono vwivwe nazia chova vwangu wa avandu vosi vamulola avamumanya ni vagenya. Vakuminya Nyasaye ni vavoola, “Kukikiri kolola ku kindu kuli yiki mba!”

Yeso yalanga Levi amulonde

¹³ Yeso yatura nazia ku lujinga lwi inyanza ya Galilaya. Kiduma kenene cha vandu chaza kuye, naye yaatanga kuvigiza.

¹⁴ Lwa yaali navitaa, yalora Levi, muyaayi wa Alufayo, niyikaye munyumba ya vasololeraa mu uvusuru. Yeso yamuvolera, “Nonda!” Nonoho Levi yasingira naamulonda.

¹⁵ Lwa Yeso yaali nalizaa ichukulia munyumba ya Levi, avasololi vuvusuuru harara na avoni avanyingi vamulonda avanyingi kuvo harara na vigi veve viikara harara naye kulia viukulia.

¹⁶ Lwa avalala ku avigizi vi Lilaga vu muganda gwa Vafarisayo valora Yeso nalizaa na avoni kandi avasololi vuvusuuru, vateva aviigi veve, “Kigira ki aliiza harara na vasololi vuvusuuru kandi na avoni?”

¹⁷ Lwa Yeso yahulira, yavavolera, “Avandu avalamu si venya umwahi wi zinyasi mba, navuzwa avamwenyaa ni yavo avaveeye avalwaye. Sindaaza kulanga avalungi mba, navuzwa ndaaza ku avoni.”

Amateeva kigira lihonga iliilia

¹⁸ Ing'inga ndala aviigi va Yohana na aviigi va Vafarisayo vaali nivahonga lilia; avandu vaza nivateeva Yeso, “Kigira ki aviigi va Yohana na ava Vafarisayo vahonga lilia, navuzwa aviigi vovo si vahonga lilia.”

¹⁹ Yeso yavativulira, “Avalangiywi mu keserero vanyara ndi kohonga lilia lwu Umwami wa oselereywi aveeye harara navo? Zing'inga ziosi zia osereraa aveeye harara navo, si vanyara kohonga lilia mba.

²⁰ Navuzwa amadiku galaduuka agu mwami osereraa alitulizwa kuvo; ulwene yilwo nilwo lwa valihonga lilia.

²¹ “Sihaveeye ho nu mundu ukalaa kilavi chinguvu imbia ma akinavira kunguvu ingulu mba. Naakoraa ndio, ikilavi kihia yicho kililinga makihuduli inguvu yeyo, nayo ilatandukila ligali.

²² Sihaveeye ho nu mundu uzukaa iwaini imbia mu zimuya zie visero vikulu mba. Naakora ndio iwaini yeyo harara nizimuya zie visero zana zilafuduka. Iwaini imbia izukangwa mu zimuya zie visero vihia!”

Liteeva kigira Lisabato

²³ Lidiku lilala lie Lisabato, Yeso yaali na avitaa mu milimi jo ovoro; na lwa vigi veve vaali ni vagenda, vataanga kugudula iviangala vio ovoro

²⁴ Avafarisayo vavoolera Yeso, “Henza! Kigira ki aviigi vovo vakora agataduukana kulidiku lie Lisabato?”

²⁵ Yeso yavativulira, “Munyi simwasoma aga Daudi yakola ing'inga yene yila lwa yaali nilienya ikindu cha valia? Oyo harara na vandu veve vaali ninzara,

²⁶ kunangwa yingira munyumba ya Nyasaye nalia imigadi Mitakatifu ijahaanwa ku Nyasaye. Yaga gekoleka lwa Abiazari yaali Musaalisi Munene. Kolondekana ni Lilaga lietu, si gaduukanaa mundu wundi woosi kulia mugadi yigu, nivatali Avasaalisi venyine; navuzwa Daudi yaagulia kandi naguhana ku yavo avayaali harara navo.”

²⁷ Maku Yeso yavavolera, “Lisabato lialomberwa avandu, navuzwa avandu sivalomberwa Lisabato mba!

²⁸ Kulwayago, Mwana wa Adamu nu Mwami wi Lisabato kandi.”