Marko 16 - KITABU KITAKATIFU

Lisimuguka lia Yeso

¹ Lwi Lisabato liali ni liakavita, Maria Magadalena, Maria mama wa Yakobo na Salome, vaagura amaguta gafunyaa umwayu kuzia kuvaka umuviri gwa Yeso.

² Mugambazuri ku lidiku lia Jumapili, iliuva nilitongaa, vaduuka ha kilindwa.

³ Kunzira vateevana, “Nivwaha waza akogomagominyiri iligina lituli ha kiliango chi kilindwa?”

⁴ Navuzwa lwa vahenza, valora iligina liali ilinene ni limali kogomagominywa.

⁵ Lwa vingira mu kilindwa, valora umusoleri niyiviiki inguvu indavu, yikaye kolovega lwu mukono mulungi; vagenya ligali.

⁶ Umusoleri oyo yavavolera, “Mutagenya mba. Inzi manyi vuzwa mwenya Yeso wa Nazareti uwaavambwa. Umali kusimuguka! Siaveeye hano mba. Heenzi havundu ahavamuta.

⁷ Navuzwa muzie mu volere aviigi veve harara na Petero ndi umali kwimilira imbiri winyu kuzia Galilaya. Mu lamulolera yo kuli yamuvolera.”

⁸ Kunangwa vaatura mu kilindwa izimbiru kigira vaali ni lidegera, kandi niligenya. Sivavoolera umundu woosi ikindu mba kigira vaatia. [

Yeso alolekaa ku Maria Magadalena

⁹ Lwa Yeso yasimuguka mu mavwevwe lidiku lia Jumapili, yaloleka kutanga ku Maria Magadalena, wa Yeso yaali ni yaatuliza amademoni saba.

¹⁰ Maria Magadalena naye yazia navolera avalina va Yeso. Ing'inga yene yeyo vaali nivakisioma nu kulira;

¹¹ Lwa vahulira Yeso aveeye mwoyo kandi Maria Magadalena umuloli, si va suuvira mba.

Yeso yaloleka ku aviigi vaviri

¹² Inyima wa yaga Yeso yaloleka ni ligondo lindi ku aviigi vaviri. Aviigi yavo vaali ni vegendagendiza mu lidaala.

¹³ Navo viirana kandi ni vavoolera avandi, navuzwa sivavasuuvira mba.

Yeso yaloleka ku vigi likomi na mulala

¹⁴ Lwukumaliriza Yeso yaloleka ku aviigi likomi na mulala lwa vaali nivalizaa. Yaavalemba kigira sivali nilisuvira mba kandi kigira uvudinyu vwi mioyo jaavo. Kigira sivasuuvira yavo avaari nivamuloli lwa yaali namali kusimuguka mba.

¹⁵ Yavavolera, “Muzie mu lirova liosi kandi mwilwaze Ivangeri ku avandu vosi.

¹⁶ Ku vosi usuviraa na abatizwi alahonywa. Ku vosi uvula kusuuvira, alakalagirwa.

¹⁷ Avasuuviraa valahevwa izingulu kokora ivilolekizu. Mu lieta liange valakunga amademoni; valamoloma mu zinimi zimbia.

¹⁸ Niiva valagumira ku zinzoka anoho ni vanwa ikindu choosi chukwita, sikilavasaliriza mba. Valaviika amakono ku valwaye, navo valahona.”

Yeso yavugurwa kuzia mwigulu

¹⁹ Lwu, Mwami Yeso yaali niyakamoloma navo, yavugurwa kuzia mwigulu, ni yikala ha mukono mulungi gwa Nyasaye.

²⁰ Aviigi vazia kwilwaza muvivala viosi. Mwami yayinzira harara navo, nadinyiriza amakuva gaavo ni vilolekizu vialondekana navo.]