Marko 15 - KITABU KITAKATIFU

Yeso yahilwa imbiri wa Pilato

¹ Lwa vwaduuka mugambazuri, avasaalisi vanene harara navakulundu na avigizi vi Lilaga harara ni kiyaalo choosi, vateevana icha vanyara kokora. Kunangwa vavoha Yeso ni vaatura naye, kandi nivamuhila ku Pilato.

² Pilato yateeva Yeso, “Ivi niyie Mwami wa Vayuda?” Yeso yamutivulira, “Ivi ovooye.”

³ Vasaalisi vanene vayaala Yeso ku vindu ivinyingi,

⁴ Pilato yateeva Yeso kandi, “Ivi oveeye ku ni kindu cha unyala kutivula? Henza kuli vavoola amakuva manyingi ku ivi gu kukuyaala!”

⁵ Yeso yasura kovora likuva; kunangwa Pilato yaaluha nagenya.

Yeso yakalagirwa likuza

⁶ Vuli ing'inga yi Lisavo lie Lipasaka Pilato yaali ni yanala kovoholora umuhambe mulala uwa vandu vaatovora.

⁷ Ing'inga yene yeyo, umundu walangwa Baraba yaali naveeye muvuhambe harara na vandu vu kwibaala avaari ni vavofwa kigira ilihiolo liu kwita.

⁸ Kiduma cha vandu chaza ku Pilato ni kimuteeva akole kuli yavakoleraa kazozo.

⁹ Pilato yavateva, “Mwenya mbohololere Mwami wa Vayuda?”

¹⁰ Yavoola ndio kigira yamanya vasaalisi vanene vaali nivaleeti Yeso kuye kigira embodoka.

¹¹ Navuzwa vasaalisi vanene vaazuva no kogemehiza ikiduma cha vandu vateeve Pilato avoholore Baraba.

¹² Pilato yavateva kandi, “Mwenya ngole ndi mundu wa Mulangaa Mwami wa Vayuda uyu?”

¹³ Vandu vosi vahanzuka nu mwoyo munene nivavoora, “ Muvambe!”

¹⁴ Pilato yavateva, “Kigira ki? Akoli vudamanu ki?” Navuzwa vameeda kuhanzuka nu mwoyo munene ligali, “Muvambe!”

¹⁵ Pilato yenya kuyaanziza ikiduma, kunangwa yaavoholora Baraba kutura muvuhambe, na yahaana lilago Yeso akuywi no lokova kandi avambwe.

Vasikari vakolera Yeso kehenyahenye

¹⁶ Avasikari vaahira Yeso mu nyumba ya gavana, ma nivavungiza umuganda gwosi gwa vasikari.

¹⁷ Vamuvika iganza yu muzambarao, nivanava itaji ya mafwa nivamuviika ku mutwi.

¹⁸ Maku vataanga kumucheliza, “Ahindiri Umwami wa Vayuda!”

¹⁹ Vamukuya ku mutwi nimbimbu, vamutuuzira amate, vaagwa ku maru gaavo, kandi nivamwinamira.

²⁰ Lwa vaali ni vakamala ku mukolera ekehenyahenye, vaamutuliza inguvu yu muzambarao ni vamuvika izinguvu zizie ma nivamuhila kuvambwa.

Yeso yavambwa

²¹ Kunzira nivazizaa, vaagana nu mundu mulala walangwa Simoni, wilidaala lia Kurene. Yaali baba wa Alekisanda na Rufasi, lwene yilwo yaali natura mu mulimi. Vamuniga naginga umusalaba gwa Yeso.

²² Kunangwa vaahira Yeso havundu halangwa Gologoza, liveeye kovora, “Havundu hi Kihanga.”

²³ Vamuha iwaini izugaani na manemane, navuzwa yasura kunwa.

²⁴ Maku vaamuvamba, kandi ni vagavulana izinguvu zizie, nivazikubira ikura valore iyavuli mundu anyoora.

²⁵ Yaali saa tatu zia mugamba lwa vamuvaamba.

²⁶ Amang'oda gi liyaalwa lilie gaali ndi: “MWAMI WA VAYUDA”

²⁷ Vamuvaamba harara na vanuuri vaviri, mulala ku mukono gwigwe umulungi nu wundi ku mukono gwigwe mumosi. [

²⁸ Hene yaho gaduukizwa Amang'oda Matakatifu agaavoola, “Yavikwa harara na voni.”]

²⁹ Avandu vavita ahene yaho vaamunyega, vasung'usa imitwi jaavo nivavoora, “Ehe! Ivi waali niwenya usambuli Litembeli kandi uliumbaka ku madiku gavaga!

³⁰ Wehonyie ivi umwene kandi wiki kutura ku musalaba!”

³¹ Avasaalisi vanene harara na avigizi vi Lilaga vamukolera ekehenyahenye kandi nivavoora, “Yahonyia avandi, navuzwa sianyala kwehonyia umwene mba!

³² Leki kolole Kristo, Mwami wa Isiraeli yiki kutura ku musalaba kalunu kunangwa kuduuki kumulora nukumusuuvira!” Kali avandi avavambwa harara naye vaamunyega.

Likuza lia Yeso

³³ Kutura saa sita zia mbasu kuduuka saa tisa, ikisundi chakunika ikivala choosi.

³⁴ Lwa yaduuka zisa tisa Yeso yalira nu mwoyo umunene navoora, “Eloi, Eloi, lama sabakatani?” Liveeye kovora, “Nyasaye wange, Nyasaye wange, kigira ki ondeki?”

³⁵ Valala ku vandu vaali nivasingiyi ho, lwa vahulira agene yago vavoola, “Huliri! Alaangaa Elija.”

³⁶ Mundu mulala yanyagura ni yiina isiponji mu isiki naviika kisala naamuha anwi navoora, “Lindi kolole niiva Elija alaza kumwikiza kutura ku musalaba!”

³⁷ Yeso yahanzuka ma nakuza.

³⁸ Inguvu yaali mu Litembeli yatanduka hagati kutura yigulu kuduuka hasi.

³⁹ Munene wa vasikari uwaali nasingiyi imbiri weve yalora kuli Yeso yalira ma nakuza, yavoola, “Agiligali umundu uyu yaali Mwana wa Nyasaye!”

⁴⁰ Avakali valala avahenzeraa ihale, navo vaali Maria Magadalena, na Maria mama wa Yakobo mukekeeke kandi wa Josefu na Solome.

⁴¹ Aveene yava valonda Yeso lwa yaali Galilaya ni vamutumikira. Vaali ho kandi avakali vandi avanyingi avaazia naye Jerusalemi.

Liyavirwa lia Yeso

⁴² Lwu mugolova gwaduuka, lidiku liu kwetegekera Lisabato,

⁴³ Josefu wa Arimazia, mukulundu wu luyali, mulala ku vakalagi, uwalindiliraa liza liu Uvwami vwa Nyasaye, yaluvirira nazia ku Pilato nateeva umuviri gwa Yeso.

⁴⁴ Pilato yaagenya kuhulira ndi Yeso umali kukuza. Yalanga munene wa vasikari namuteeva niiva Yeso yaali nakuzi kale.

⁴⁵ Lwu Munene wa vasikari yavolera Pilato Yeso umali kukuza, yaavugilira Josefu kuvugura umuviri gwigwe.

⁴⁶ Josefu yaagula inguvu yi katani, ni yikiza umuviri kutura ku musalaba, nagulingira mu inguvu, namuviika mu kilindwa ichaali ni chavazwa mu lwanda. Maku yagomagominya ligina linene, nu kuhana ikilindwa.

⁴⁷ Maria Magadalena na Maria mama wa Josefu valora ha yavikwa.