Marko 12 - KITABU KITAKATIFU

Lugano lwu mulimi gwi kizabibu na valimi

¹ Yeso yaatanga komoloma navo mu zing'ano, navoora, “Mundu mulala yasimika mizabibu, naviika kujo ulugaga, nayava kiminilu chiwaini, ni yumbaka umunaara gwu mulindi kohenzera avasigu. Maku yahaana kizabibu ku nazia ologendo mu kivala kindi.

² Lwi ing'inga yu kuvuna mazabibu yaduuka, yatuma umutumikiri ku valimi amuvuguliri ku makuyu gimizabibu.

³ Avalimi yavo va mugumira ni vamukuya, ni vamukunga vugira ikindu.

⁴ Yatuma kandi umutumikiri wundi kuvo; umwene oyo vamwata izing'oma kandi ni va mukolera agizisoni.

⁵ Yatuma umutumikiri wundi kandi, na mwene oyo vamwita. Avandi avanyingi vaatumwa, valala kuvo vaakuywa, na vandi ni viitwa.

⁶ “Yaatigara umundu mulala wukutuma naye nu muyaayi weve umuyanze. Lwu kumaliriza, yatuma umwene oyo navoora, ‘Valatia, kigira nu muyaayi wange.’

⁷ Navuzwa avalimi yavo vavolerana aveene ku aveene, ‘Uyu niyie ulinyoola imiandu; gendi kumwiti kunangwa imiandu josi jilave ijietu!’

⁸ Maku vamugumira ni vamwita, kandi nivamusiuva ichova wi kizabibu.

⁹ “Kigira yaga, umwene mulimi alakakole ki? Alakaze kwita avalimi yavo nu kuhaana ku avandi umulimi gwi mizabibu.

¹⁰ Munyi mu kikiri kosooma Mang'oda Matakatifu yaga? ‘Ligina liavumbaki vasuura, liakolwa ligina linene liu mukoona.

¹¹ Mwami niyie wakola yaga, na gaveeye gokogenyia mu zimoni zia vandu!’ ”

¹² Avasaalisi vanene, avigizi vi Lilaga na vakulundu vageriza kugumira Yeso kigira vamanya yaali navooye ulugano yilu kigira yavo. Navuzwa vaatia ikiduma cha vandu; ku vamanya nivatura ho.

Liteeva kigira litunga uvusuru ku Kaisari

¹³ Valala ku Vafarisayo na valala ku valondi va Herodi vaatumwa ku Yeso vamugerizi na mateeva.

¹⁴ Vazia kuye ni vamuvolera, “Mwigizi, kumanya ivi oveeye umundu wiligali vugira kodegerizwa na goosi ga vandu vavoola. Si ohenza ku vuduukiru vwu mundu mba, navuzwa wigiza agiligali ginzira ya Nyasaye. Ni vulahi kutunga uvusuru ku Kaisari, anoho kuvuli kutunga?”

¹⁵ Navuzwa Yeso yamanya uvugadi vwavo, navavoolera, “Kigira ki mungerizaa? Ndeteri isiringi mbenze ku.”

¹⁶ Vamuleetera silingi ndala, naye yavateva, “Kifananyi yiki harara ni ling'oda yili ni via vwaha?” Vaamutivulira, “Ni via Kaisari.”

¹⁷ Yeso yavavolera, “Muhaane ku Kaisari ivindu via Kaisari, na Nyasaye ivindu via Nyasaye.” Navo vaamugenyela muno.

Liteeva kigira lisimuguka

¹⁸ Valala ku Avasadukayo, avavolaa sihaveeyeho ni lisimuguka lia vakuzu, vaza ku Yeso ni va muteeva,

¹⁹ “Mwigizi, Musa ya kong'odera mu lilaga ndi: ‘Umundu nakuza naleke mukali weve vugira umwana, amwavo weve anyala kwilanyia umukunzakali oyo yivuliri amwavo weve wakuza avana.’

²⁰ Ku, vaali ho avamwavo saba. Wukutanga yaleeta umukali, ma nakuza vugira koleka umwana.

²¹ Amwavo weve wakaviri yiranyia umukunzakali oyo; naye kandi nakuza vugira koleka umwana; kandi amwavo weve wa kavaga yaali ndio.

²² Ma kandi ku vosi, avamwavo vosi saba valeta mukali zana oyo, kandi vaakuza vugira koloka mwana. Lwukumaliriza umukunzakali mwene naye yakuza.

²³ Kalunu, lwa avakuzu vosi valisimuguka ku lidiku lie lisimuguka, mukali uyu aliva wa vwaha? Kigira avamwavo yavo saba vosi vaali naye kuli umukali wavo.”

²⁴ Yeso yavavolera, “Munyi mugotwa ligali, kigira si mumanyi Amang'oda Matakatifu, anoho izingulu zia Nyasaye mba.

²⁵ Lwa vakuzu valisimuguka, sivaliserera, anoho koselerwa mba, navuzwa valakave kuli zingelosi mwigulu.

²⁶ Na kigira amakuva gi lisimuguka lia vakuzu: mukikiri kosoma mu kitabu cha Musa mu zimbaso zivoolaa amakuva gi kisaka ichaduka umuliru? Kuli Nyasaye yamoloma na Musa namuvolera, ‘Inzi ni Nyasaye wa Aburahamu, Nyasaye wa Isaka na Nyasaye wa Yakobo?’

²⁷ Siaveeye Nyasaye wa vakuzu, navuzwa ni Nyasaye wa vaveeye mwoyo. Munyi simumanyi mba!”

Lilago linene

²⁸ Mulala ku vigizi vi Lilaga yaza naahulira ni nivahangalizanaa. Lwa yaamanyiriza ndi Yeso uvativuliyi vulahi, yamuteeva, “Ku malago goosi, liu kutanga ni liliha?”

²⁹ Yeso yamutivulira, “Liukutanga ni yili: ‘Muhuliri, munyi avandu va Isiraeli! Mwami Nyasaye wiitu niyie Nyasaye yeng'ine.

³⁰ Uyaanze Mwami Nyasaye woovo nu mwoyo gugwo gwosi, ni liiva liilio liosi, ni zing'anagani zizio ziosi, kandi ni zinguru zizio ziosi.’

³¹ Na lilago lia kaviri ni yili: ‘Uyaanze umutende woovo kuli wiyanza umwene.’ Sihaveeyeho nililago lindi iliveeye ilinene kuvita gaviri yaga mba.”

³² Umwigizi wi Lilaga oyo yamuvolera, “Vulahi Mwigizi! Ovooye agiligali ndi Nyasaye aveeye mulala vuzwa; sihaveeyeho nu wundi, nataveeye oyo.

³³ Kuduuka umundu ayaanze Nyasaye nu mwoyo gwigwe gwosi, ni zing'anagani zizie ziosi, ni zinguru zizie ziosi; kandi kuduuka ayaanze umutende weve kuli yiyanzaa mwene. Likuva yili liveeye ilinene kuvita kuhaana visiuviliru vindi viosi ku Nyasaye.”

³⁴ Lwa Yeso yalora umundu oyo naamutivuliyi no vogeri, yamovoolera, “ Ivi si oveeye ihale nu Vwami vwa Nyasaye mba.” Inyima wa yago, sihaaliho nu mundu waluvilira kandi koteeva Yeso iliteeva lindi mba.

Liateeva kigira Kristo

³⁵ Lwa Yeso yaali ni yigiza mu Litembeli, yateeva, “Kigira ki avigizi vi Lilaga vavoola ndi Kristo nu wi kisukururwi cha Daudi?

³⁶ Daudi mwene yavoola mu zinguru zia Roho Mutakatifu: ‘Mwami yavolera Mwami wange: Yikala hano ku mukono gwange mulungi kuduuka lwambika avasigu vovo hasi hi virenge vivio.’

³⁷ Daudi mwene yamulanga ‘Umwami’; ku, Kristo anyala ndi kuva Mwana wa Daudi?” Kiduma cha vandu cha muhulirizaa nu vuyanzi.

Yeso yiganihiza avigizi vi Lilaga

³⁸ Mu miigizu geege Yeso yavoola, “Mwilindi ku avigizi vi Lilaga, avayaanzaa kogendagenda niviviiki izinguvu zindambi, nu kuchelizwa nu luyali mu viitu;

³⁹ avayaanzaa kwikala ku zindeve zindahi mu masinagogi, kandi havundu hu luyali mu lilia.

⁴⁰ Vanuraa nukudambiza zinyumba zia vakunzakali ni vasaala masaala matambi nu vugadi! Mu lidiku lie likalaga, yavo valakanyore amaduywa manene kuvita.”

Isadaka yu mukunzakali

⁴¹ Lwa Yeso yaali niyikaye ahimbi ni livikiru lie Litembeli, yahenza kuli avandu vaviika isadaka mu livikiru. Avatugi avanyingi vahaana mabese manyingi;

⁴² maku umukali mukunzakali uwaali mudaka, yaza nahaana amang'ondo gaviri.

⁴³ Yeso yalanga aviigi veve navavoolera, “Muvooleraa agiligali mukunzakali mudaka uyu uhaani isadaka iviti ya vandi vosi avaari kutunga mu livikiru lie Litembeli.

⁴⁴ Vosi vahaanangi kolondekana ku vutugi vwavo, navuzwa umukunzakali uyu, kali naava naveeye umudaka, oyo uhaani viosi viayaalinavio.”