Marko 11 - KITABU KITAKATIFU

Yeso yingiraa mu Jerusalemi nisango enene yiliguuta

¹ Lwa Yeso harara na aviigi veve vaali ni vakaduuka ahimbi na Jerusalemi, vaduuka Bezifage na Bezani, ahimbi ni kiguru cha Mizeituni. Yatuma vaviri ku aviigi veve navoora,

² “Muzie mu lidaala liveeye imbiri winyu. Nonoho lwa mwingira mu, mulanyola ekemoli chisukiri ne kevoheywi, ichu mundu akikiri kwikala ku. Mu kevoholore, ma mu keleete.

³ Umundu namuteeva, ikigiraki nimukora ndio, mumuvolere ndi ‘Mwami achenyaa, na alamanya achilanyie hano vwangu.’ ”

⁴ Kunangwa vazia, ni vanyoola kemoli chi sukiri ni kevoheywi ha kiliango havulavu kunzira, ni vakevoholora.

⁵ Valala ku avandu vaali ni vasingiyi ho vavateeva, “Kigira ki mu voholoraa ekemoli yicho?”

⁶ Aviigi navo vavativulira kuli Yeso yaali na avavoo leye. Maku vavaleka nivakivugura;

⁷ Valetera Yeso ekemoli zana. Vaala ku izinguvu ziavo, naye yikala kucho.

⁸ Avandu avanyingi vaala izinguvu ziavo kunzira; avandi vaala iziisia zie misaala zia vatema mu milimi.

⁹ Avandu vosi aviimira imbiri na avamulonda inyima, vahanzuka ni vavoola, “Nyasaye yizominywi! Agasizwi uyu uza mu lieta liu Mwami!

¹⁰ Nyasaye agaasizi uvwami vwa Baba wiitu Daudi uvuzaa. Yizominywi Nyasaye, igulu mwigulu!”

¹¹ Yeso yingira mu lidaala lia Jerusalemi, nazia kali mu Litembeli, nahenza ku vindu viosi. Navuzwa kigira isi yaali ni yakamwama, yazia Bezani harara na avaari aviigi likomi na vaviri.

Yeso yalaama musaala gwu mukuyu

¹² Lidiku lialonda ku, lwa vaali ni vaatura Bezani, Yeso yaali ninzara.

¹³ Maku yalora umukuyu na aveeye ihale, ugwali na matu amanyingi. Yazia nahenza ku mbula anyoore ku kindu. Lwa yaduuka kugwo si yanyoora ku ikindu cha alia mba, navuzwa amatu geng'ine kigira si yaali ing'inga ya makuyu kwama mba.

¹⁴ Yavolera umukuyu zana “Mundu atalia kandi amakuyu googo imihiga josi mba.” Aviigi veve vahulira amakuva yago.

Yeso yingira mu Litembeli

¹⁵ Lwa Yeso harara na aviigi veve vaduuka Jerusalemi, Yeso yingira mu Litembeli, natanga kukunga avandu vaali ni vagulanyia ivindu mu Litembeli. Yaatung'aminya izimesa zia yavo avaari nivakiranyira ku mabese, ni zindeve zia yavo avaari ni vaguliza amakuulu,

¹⁶ siyavugilira umundu woosi kuvita mu mugizi gwi Litembeli nagingi ikindu mba.

¹⁷ Lwinyima yaviigiza navoora, “Gang'odwa, ‘Litembeli liange lilalangwa inyumba yu kusaala ku zihiiri ziosi!’ Navuzwa munyi mugekoli kuva luhangaywa lwa vanuuri.”

¹⁸ Lwa avasaalisi vanene na avigizi vi Lilaga va gahulira, vatanga kwenya inzira yu kumwita, navuzwa, vaamutia kigira ikiduma cha vandu vosi chagenya ku amingizu geege.

¹⁹ Lwa mugolova gwaduukaa, Yeso na aviigi veve vaturaa mu lidaala linene lia Jerusalemi.

Amigizu ku mukuyu gwuma

²⁰ Mugambazuri ku lidiku lialonda ku, lwa vaali ni vavitaa, valora umukuyu ni guniaye gwosi, kali ni miri jagwo ndio.

²¹ Petero yagwizuliza, navolera Yeso, “Mwigizi, henza! Umukuyu gwa walaama gula guniaye!”

²² Yeso yavavolera, “Muve ni lisuuvira mu Nyasaye.

²³ Muvooleraa agiligali niiva mundu woosi alavolera ikigulu yiki chigingi ichene kigwi munyanza vugira kuhayahayiza mu mwoyo gwigwe, navuzwa asuuviri ndi agaavoola galakolwa, alakolerwa agene yago.

²⁴ Kulwayago muvooleraa, ku kindu choosi cha muteeva mu lisaala, musuuviri ligali mukenyooye, na mulahevwa.

²⁵ Lwa musaala, musamiihi umundu woosi uva niyaamukolera uvudamanu, kunangwa Baba winyu oveeye mwigulu aduuki kumusamiiha uvwoni vwinyu.” [

²⁶ Navuzwa munyi ni mutasamiiha avandu, Baba winyu oveeye mwigulu, si alasamiiha uvwoni vwinyu mba.]

Liteeva kigira vunyali vwa Yeso

²⁷ Vaduuka Jerusalemi kandi. Lwa Yeso yaali nagenda mu Litembeli, avasaalisi vanene, avigizi vi Lilaga navakulundu vaza kuye

²⁸ ni vamuteeva “Ivi okolaa ivindu yivi ku vunyali vwa vwaha? Nivwaha wakuha uvunyali vwokokola ivindu yivi?”

²⁹ Yeso yavavolera, “Inzi ndamuteva iliteeva lilala; ni mundivulira, inzi kandi ndamuvolera uvunyali vwa ngolera mu vindu yivi.

³⁰ Libatiza lia Yohana liatura ku Nyasaye anoho ku avandu? Mu ndivuliri.”

³¹ Vatanga kuhangalizana aveene kuvene ni vavoola, “Ni kovora, ‘Vwatula ku Nyasaye,’ alakoteeva, ‘Kigira ki si mwamusuuvira?’

³² Navuzwa niiva kulavoola ‘Vwatula ku vandu...’ ” Vaatia ikiduma cha vandu, kigira vosi vasuuvira ndi Yohana yaali muporofeti.

³³ Kunangwa, vativulira Yeso ni vavoola, “Kunyi kumanyi mba.” Yeso naye ya vavoolera, “Inzi si ndamuvolera ni vunyali ki vwa ngolera mu ivindu yivi.”