Marko 10 - KITABU KITAKATIFU

Amigizu ga Yeso kigira kukunga mukali

¹ Maku Yeso yatura yo nazia mu losoma lwi Vuyuda, niyambuka engeleka wu Mugera gwa Jorodani. Ividuma via vandu viamukumberiza, naye yaviigiza kuli gwaali umwima gwigwe.

² Kunangwa valala ku Vafarisayo vazia kuye nivamugeriza na mateeva, “Gaduukanaa umundu akungi umukali weve?”

³ Yeso yavativulira, “Musa yahaana malago ki?”

⁴ Navo vavoola, “Musa yaaha umusaza umunwa kong'odera umukali ibarwa yokolekana.”

⁵ Yeso yavativulira, “Musa ya mung'oderaa lilago yili kigira uvudinyu vwi mioyo jinyu.

⁶ Navuzwa kutura mu litanga lie lilombwa lie lirova, Nyasaye yavalomba umusaza nu mukali.

⁷ Kigira yaga musaza alaleka baba weve na mama weve ahambane nu mukali weve.

⁸ Na yava vaviri valagwa umuviri mulala. Kulwayago, sivaveeye vaviri kandi, navuzwa umuviri mulala.

⁹ Kunangwa, cha Nyasaye amali kuhambanyia harara, umundu atachavukanyia mba.”

¹⁰ Lwa vingira munyumba, aviigi vateva Yeso ilikuva yili kandi.

¹¹ Yavavolera, “Ku vosi ukunga umukali weve naleta wundi akolaa ovoheyi naye.

¹² Na umukali olekaa umusaza weve nazia ku musaza wundi, akolaa ovoheyi.”

Yeso yagasiza avana vakekeeke

¹³ Avandu vaali nivaleeta avana vakekeeke ku Yeso avadiri, navuzwa aviigi vavagaya.

¹⁴ Lwa Yeso yalora yaga, yavihilirwa navavoolera, “ Leki avana vakekeeke vaze ku inzi. Mutavagaya mba, kigira Uvwami vwa Nyasaye voveeye vwa vandu vaveeye kuli avana yava.

¹⁵ Muvooleraa agiligali, umundu woosi utavugilira Uvwami vwa Nyasaye kuli umwana mukekeeke, sialingira muvwo mba.”

¹⁶ Inyima Yeso yavugula avana zana mu makono geege, naviika amakono kuvo kandi navagasiza.

Umundu umutugi

¹⁷ Lwa Yeso yaatanga logendo lwilwe, umundu mulala yanyagula nasigama imbiri weve, ma na muteeva, “Mwigizi mulahi, ngola ndi nduuki konyoora livamwoyo litahera mba?”

¹⁸ Yeso yamutivulira, “Kigira ki unanga umulahi? Sihaveeyeho nu mulahi kali mulala, navuzwa Nyasaye yenyine.

¹⁹ Wamanya amalago: ‘Utiita mba; utaheya mba; utiva mba; utagina mba; utagaanga mba; utaveeha mba, uhuliri baba woovo na mama woovo!’ ”

²⁰ Naye yamutivulira, “Mwigizi, yaga goosi ndaagalinda kutura vwana vwange.”

²¹ Yeso yamuhenza nu vuyanzi namuvolera, “Udaki vuzwa kindu kilala. Zia ugulizi viosi via oveeye navio na uhaane ku avadaka, na ivi ulava ni livikiru mwigulu; ma uzi ononde.”

²² Lwa yahulira agene yago, mumoni mwimwe mwaverera ligali; ma nazia nadunyi kigira yaali nu vutugi uvunyingi ligali.

²³ Yeso yahenza zimbega ziosi navolera aviigi veve, “Vulakave uvudinyu kuvatugi kwingira mu vwami vwa Nyasaye!”

²⁴ Aviigi vagenya ku makuva yaga. Yeso yavavolera kandi, “Vana vange, voveeye vudinyu umutugi kwingira mu Vwami vwa Nyasaye!”

²⁵ Ni vodoto ligali ing'amia kwingira mu muluhu gwi sindani kuvita umutugi kwingira mu vwami vwa Nyasaye.

²⁶ Aviigi veve vagenya ligali nivamuteeva, “Nivwaha unyala kohonywa?”

²⁷ Yeso yavahenza, navavoolera, “Siganyala kunyalika ku avandu mba, navuzwa ku Nyasaye sigaveeye ndio, kigira ku Nyasaye vindu viosi vinyalikaa.”

²⁸ Petero yaatanga kumuvolera, “Henza, kunyi kooleki viosi na kokolondi.”

²⁹ Yeso yavoola, “Yee kandi muvooleraa agiligali ndi, ku vosi mundu oleka hango anoho avamwavo kinga vavoozo, anoho mama weve, anoho baba weve, anoho avana veve, anoho umulimi kigira inzi, kandi kigira Ivangeri,

³⁰ alanyoola haali kanyingi ligali mu ing'inga ya kalunu yiyi. Alakanyoole haali mia izinyumba, avamwavo, avavozo, avamama, kandi avana ni milimi kandi ni lidambizwa; ma kandi mu ing'inga yiza, alakanyoole livamwoyo litahera mba.

³¹ Navuzwa avanyingi avaveeye avi imbiri valava avinyima, navo avaveeye avinyima valava avimbiri.”

Yeso yamoloma lwa kavaga kigira ilikuza lilie

³² Yeso harara na aviigi veve vaali kunzira nivazizaa Jerusalemi. Yeso yagendaa imbiri wavo. Aviigi veve vaali ni ligenya, na avandu vamulonda vaali nu vuti ligali. Yeso yavugula avaari likomi na vaviri natanga kuvavoolera ivindu vizizaa kwekoleka kuye.

³³ Yeso yavavolera, “Huliri! Kuziiza Jerusalemi wu Umwana wa Adamu azizaa kuzamwa ku vasaalisi vanene na avigizi vi Lilaga. Navo valamukalagira aduuki kwitwa, na valamuhaana ku avandu vi zihiiri zindi.

³⁴ Navo valamukolera kehenyahenye, valamutuzira amate, valamukuya no lokova, ma vamwiti; na inyima wa madiku gavaga, alasimuguka.”

Liteeva lia Yakobo na Yohana

³⁵ Maku Yakobo na Yohana, avana va Zebedayo, vazia ku Yeso nivamuvoolera, “Mwigizi, kwenyaa okokolere kindu cha kwenyaa kukoteeva.”

³⁶ Yeso yavateva, “Mwenya mukolere ki?”

³⁷ Vamuvolera, “Ukuvugiliri mulala ku kunyi yikare ku mukono gugwo umulungi nu wundi ku mukono mumosi lwa ulikala ku endeve yu vwami mu vukumi vwu uvwami vuvwo.”

³⁸ Yeso yavavolera, “Si mumanyi icha muteeva mba! Munyi munyala kunwa ekekombe chu vusaliri cha gaduukanaa inzi nwi? Munyi munyala kubatizwa munzira ndala nzere ya gandukira mbatizwi muyo?”

³⁹ Va mutivulira “ Kunyala.” Yeso yavavolera, “Kekombe cha nwezaa mulanwa ligali, na mulabatizwa libatizwa liu vusaliri kuli ndibatizwa.

⁴⁰ Navuzwa avaliikala ku mukono gwange mulungi anoho mumosi simbeeye nuvunyari kotovola nivwaha ulikala ku mukono gwange mulungi anoho mumosi mba. Ni Nyasaye ulihaana uvwiyangu yivu ku yavo ava yamala kwetegekizira.”

⁴¹ Aviigi vandi likomi lwa vahulira yaga, vaasinyikira Yakobo na Yohana.

⁴² Kunangwa Yeso yavalanga, navavoolera, “Mumanyi vulahi avalolangwa kuva avamihi vi zihiiri vamiiha avandu vaavo ni zinguru, na vanene vaavo vamiiha nu vunyali ku avandu vaa vo.

⁴³ Navuzwa gatava ndio ku munyi; umundu woosi wenyaa kuva umunene ku munyi gamudukira ave umutumikiri winyu.

⁴⁴ Na uyu wenyaa kuva umwimiliri gamudukira ave umutumikiri wa vosi.

⁴⁵ Kigira Mwana wa Adamu si yaza kutumikirwa, navuzwa kutumikira avandu nukuhaana ilivamwoyo lilie live umutungu gwa vandu avanyingi.”

Yeso yahonyia umboku ulangwa Baritimayo

⁴⁶ Vaduuka Jeriko; lwa Yeso na aviigi veve, ni kiduma kenene vaali nivaturaa, umboku musavasavi walangwa, Baritimayo, muyaayi wa Timao yaali niyikaye kunyasi kwinzira.

⁴⁷ Lwa yahulira ndi ni Yeso wa Nazareti uwaali navitaa, yaatanga kuhanzuka vwangu navoora, “Yeso Mwana wa Daudi, ombere zimbavasi!”

⁴⁸ Avandu vanyingi vamugondokera ni vamuvolera akiling'ane, navuzwa yameda kuhanzuka vudinyu ligali, “Mwana wa Daudi, ombere zimbavasi!”

⁴⁹ Yeso yasingira navoora, “Mulangi.” Na valanga umboku oyo ni vamuvolera, “Lema umwoyo! Singira, Yeso akulangaa.”

⁵⁰ Naye yaatuliza inguvu yeeye nasiuuva, nasingira, nazia vwangu wa Yeso yaali.

⁵¹ Yeso yamuteeva, “Wenyaa ngokolere ki?” Umboku oyo yamuvolera, “Mwigizi, nyenya ndore ka ndi.”

⁵² Yeso yamuvolera, “Zia, Ilisuuvira liilio limali kokohonyia.” Nonoho umboku oyo yalora, ma nalonda Yeso mu logendo lwilwe.