Marko 1 - KITABU KITAKATIFU

Lilwaza lia Yohana Mubatizi

¹ Yaga na makuva malahi ga Yeso Kristo, Mwana wa Nyasaye.

² Yaatanga kuli gang'odwa mu kitabu chu muporofeti Isaya: “Nyasaye yavoola, ‘Henza, ndatuma mutumwa wange Imbiri woovo; naye aletegekiza inzira yooyo.’

³ Umwoyo gwu mundu mulala guhanzukaa mwigendanyama. ‘Mwetegekize inzira yu Mwami, Lungikizi zinzira zizie.’ ”

⁴ Yohana Mubatizi yaloleka mwigendanyama, nabatizaa kandi niyilwaza. Yavavolera, “Mwiganiri kandi mubatizwi, Nyasaye aduuki kumusamiiha uvwoni vwinyu.”

⁵ Avandu vanyingi vaatura mu kivala choosi chi Vuyuda nu mu lidaala linene lia Jerusalemi nivazia kuhulira aga Yohana yavoola. Viyama uvwoni vwavo kuye, naye yaavabatiza mu Mugera gwa Jorodani.

⁶ Yohana yiviika zinguvu zianavwa ku vwoya vwi ing'amia, niyevoha musibi gwe kesero mu kekenge chiche. Ichukulia chiche chaali izisigi nu vwuki vwu mumulitu.

⁷ Naye yilwaazira avandu navoora, “Mundu uzaa inyima wange, aveeye ni zinguru kuvita inzi. Inzi sindukana kwinama nokovoholola ivilato vivie mba.

⁸ Inzi mbatizaa munyi na mazi, navuzwa oyo alamubatiza na Roho Mutakatifu.”

Libatizwa ni ligerizwa lia Yeso

⁹ Mu madiku yago, Yeso yaza kutura Nazareti, mu kivala cha Galilaya, na Yohana yaamubatiza mu Mugera gwa Jorodani.

¹⁰ Lwa Yeso yatura mu mazi, nonoho yalora iligulu ni ligulwa, ma Roho yika kuye kuli ilikuulu.

¹¹ Umwoyo gwatura mwigulu nigovoora, “Ivi oveeye Mwana wange umuyanze, nyanzizwaa niiviligali.”

¹² Nonoho, Roho yamuhira mwigendanyama;

¹³ naye yaali mwigendanyama ku lwa madiku arubaini, Setani namugerizaa. Yaali harara nizinyama ziu mu vulimu, navuzwa zingelosi vaza nivamutumikira.

Yeso yalanga avaluvi vane

¹⁴ Kunangwa, lwa Yohana yaali namali kovofwa mu vuhambe, Yeso yazia Galilaya ni yilwaza Ivangeri ya Nyasaye.

¹⁵ Yavoola, “Ing'inga indahi iduuki, nu Uvwami vwa Nyasaye voveeye ahimbi! Mwiganiri kandi musuuviri Ivangeri.”

¹⁶ Lwa yaali navitaa ku lujinga lwi inyanza ya Galilaya, yalora avaluvi vaviri, Simoni na Andereya amwavo weve, ni valuvaa izisuzi munyanza.

¹⁷ Yeso yavavolera, “Nondi, nainzi ndamukora mugwi avaluvi va vandu.”

¹⁸ Nonoho valeka imiluvu jaavo ni va mulonda.

¹⁹ Lwa yisunda hambiri hakekeke, yalora Yakobo na Yohana amwavo weve, avayaayi va Zebedayo. Navo kandi vaali mu liato liavo ni vanavaamu imiluvu jaavo jaali nijatanduka.

²⁰ Lwa Yeso yavalola, yavalanga; valeka baba wavo Zebedayo harara na vayinziri vatungwa mu liato, ni vamulonda.

Umundu waali ni Lidemoni

²¹ Yeso harara na aviigi veve vazia Kaperinaumi na lwi Lisabato liaduuka, Yeso yingira mulisinagogi ni yigiza.

²² Avandu vosi avamuhuliriza vagenya ku amigizu geege kigira si yigiza kuli avigizi vaavo vi Lilaga mba; oyo yigiza nu vunyali.

²³ Nonoho, umundu waali ni lidemoni yaza mu lisinagogi liavo nakuba lukwiri navoora,

²⁴ “Ukwenya ki, Yeso wa Nazareti? Wenyaa kukudiviza? Inzi ngumanyi vulahi vwene. Ivi oveeye mutumwa mutakatifu wa Nyasaye!”

²⁵ Navuzwa Yeso yamugondokera namuvolera, “Kiring'ana, kandi utuli mu mundu uyu!”

²⁶ Ilidemoni zana liamusang'usula vudinyu, nilikuba ulukwiri olonene, ma nilitura muye.

²⁷ Avandu vosi vagenya ligali. Vateevana aveene naveene nivavoora, “Kindiki yiki? Ni amigizu amahia! Umundu uyu aveeye ni zinguru ku mademoni, kali kuduuka gamuhulira!”

²⁸ Na ndio ulusuma lwi ilizominywa lia Yeso lwalanda vwangu havundu hoosi ahaali ahimbi ni kivala cha Galilaya.

Yeso yahonyia avandu avanyingi

²⁹ Lwa vaatura mu lisinagogi, Yeso, Yakobo na Yohana vingira munyumba ya Simoni na Andereya.

³⁰ Navizara Simoni yaali naagoni na alwalaa olodegera. Nonoho lwa Yeso yaduuka vamuvolera amakuva gene yaga nonoho.

³¹ Yeso yazia namugumira umukono, naamuvukiza. Yahona kutura mu lodegera, kandi yavadenda.

³² Lwi iliuva liayera, valetera Yeso avalwaye vosi, harara na vaali na mademoni.

³³ Avandu vosi avi lidaala yilio vavunga imbiri winyumba yeyo.

³⁴ Yeso yahonyia avalwaye avanyingi avi zinguzu lugano lugano kandi nakunga amademoni amanyingi. Yagaya amademoni gatamoloma mba, kigira gaali nigamumanya.

Yeso yilwaza mu Galilaya

³⁵ Yeso yavuka mugambazuri chova nikikiri imwamu, natura munyumba. Yatura ichova wi lidaala nazia havundu ha avandu vaali nivataveeye nasalira ho.

³⁶ Navuzwa Simoni na valina veve vazia kumwenya,

³⁷ lwa vamunyoola, vamuvolera, “Avandu vosi vakwenyaa.”

³⁸ Navuzwa Yeso yavavolera, “Gendi kuzie mu madaala gaveeye ahimbi hano. Kuduuka nzilwaze mugo kandi, kigira yiki nicho kivuni chagira ninziza.”

³⁹ Kunangwa Yeso yagenda mu Galilaya mwosi, ni yilwaza mu masinagogi gaavo, kandi nakunga amademoni.

Yeso yahonyia umugere

⁴⁰ Umundu mulala uwalwalaa ovogere yaza ku Yeso, nasigama namugoonya amukonye. Yavoola “Niiva ganyalika unyala kundakasa!”

⁴¹ Yeso yiizurwa novovereri, nanyiira umukono namudiira, namuvolera, “Nyenya utakaswe!”

⁴² Nonoho ovogere vwatula kuye, naahona.

⁴³ Maku Yeso yaamwiganihiza vululu navoora, “Hulira, utavoolera umundu kali mulala amakuva yaga mba.

⁴⁴ Navuzwa tula vwangu uzie vulungi ku musaalisi na oleke akohenzerize; ahene yaho alamanyia avandu ndi ivi umali kohonywa ligali, gakuduukiraa uhaane lisiuviliru lia Musa yalaga.”

⁴⁵ Navuzwa umundu oyo yazia na atangaa kulandiza havundu hoosi. Yamoloma kigira ilihonywa lilie, kali Yeso yaali anyala kwingira mu lidaala liosi havulavu mba. Nitali yamenya ichova wi lidaala aha vandu vatali, na avandu vaza kuye kutura mu zimbega ziosi.