Malaki 4 - KITABU KITAKATIFU

Lidiku lia Yahova

¹ Yahova Wuvunyali avoora, “Lidiku lizaa lia vandu veloli kandi vadamanu valisambwa kuli vulimu vwumu. Ku lidiku yilio, valakadodoke kandi kindu si kilakatigale kuvo mba.

² Navuzwa kumunyi avatizaa inzi, zinguru ziange zio vohonyi zilatonga ku munyi kuli liuva. Ndaleta vohonyi ku munyi kuli vwaku vwi liuva. Mulakave avavoholore kandi nu vusangali kuli vimoli vituliziywi mu kego.

³ Ku lidiku lia ndikola yaga mulakaguuti avandu vachamu kandi valakave kuli luguchi isi wi vilenge vienyu.

⁴ “Mwizurizi amigizu kandi amalago gu mutumikiri wange Musa, ga ndahaana kuye ha kiguru cha Sinai ku vandu vosi va Isiraeli vaduuki kugatia.

⁵ “Navuzwa lidiku linene kandi liukutihiza liange nilikikiri kuduuka, ndakamutumiri muporofeti Elija.

⁶ Alakaleete lihambana ni mirembe hagati ha vababa na vana; nigataveeye ndio, ngano ndayiza kudiviza kivala chiinyu.”