Malaki 3 - KITABU KITAKATIFU

¹ Yahova Wuvunyali yativura navoora, “Ndakatumi mutumwa wange konombera inzira. Maku Mwami wa mulindiliraa alakaze mu Litembeli lilie vwangu lwa mutamanyi; mutumwa wa mwegomba kolola alakaze kulandiza lilago liange.”

² Navuzwa nivwaha unyala kwikuzira kulindilira ku lidiku yilio lwaliza? Nivwaha ulakahononoke lwa aliloleka? Alakaze ni zinguru kuli Isavuni, kandi kuli muliru gwu kutura kivia.

³ Alakaze kukalaga kuli mundu atulaa kandi aselezaa ifeza. Mutumwa wa Yahova alakatakase vasaalisi kuli muturi atulaa ifeza ni izahabu kunangwa vaduuki koletera Yahova vihaanwa viduukana.

⁴ Maku vihaanwa via vandu vi Ivuyuda na Jerusalemi valeta ku Yahova, vilakave viu kumuyanziza kuli vialaange mu madiku ga kale.

⁵ Yahova Wuvunyali avoora, “Ndakaaze hagati hinyu vwangu kukalagira yavo vakora vukumu, avaheyi, kandi avagaadi, kandi yavo vagada vayinziri vaavo ku mitungu jaavo, kandi yavo avatavelereraa vakunzakali, vavisandu na vageni kandi yavo vosi vatahaana luyali ku inzi.

Kwivila Nyasaye

⁶ “Inzi mbeeye Yahova kandi singirung'anaa mba, kunangwa munyi, visukululwi via Yakobo, simulagota vosi ligali mba.

⁷ Munyi mwaleka malago gange, kandi mwasuura kugagumira kuli vaguuga vienyu va kale. Mwirane ku inzi, na inzi ndamwiranira. Navuzwa muteeva, ‘Kokora ki kuduuki kwirana ku ivi?’

⁸ Inzi ndeva munyi ndi, voveeye vulahi mundu kugaada Nyasaye? Awa sigaveeye vulahi mba, navuzwa munyi mungadaa, kandi muteeva, ‘Kugaada kuli ndi?’ Mungadaa lwa muhaanaa kidieli chi likomi kandi mu vihaanwa.

⁹ Kilaamo keveeye ku munyi vosi kigira ihiiri yoosi yinziviraa.

¹⁰ Muleete kidieli chiinyu choosi chi likomi mu Litembeli, kunangwa litembeli live ni viukulia vinyingi. Mungerizi na inzi ndigula madirisha gu mwigulu kandi ndahaana vugasu vwi vindu vilahi vinyingi vie zing'ano ziosi kumunyi.

¹¹ Sindalekazingeza ziononye vitagwa vienyu mba, kandi ji mizabibu jinyu jilama makuyu manyingi.

¹² Maku avandu vi zihiiri ziosi valakamuguliki, ‘Vuyanzi’ kigira kivala chiinyu kilakave havundu halahi ho komenya.”

Nyasaye Yalaga zimbavasi

¹³ Yahova avoora, “Munyi mumali kovora vindu vidamanu ligali kigira Inzi navuzwa muteeva, ‘Kunyi kovooye kindiki kigira ivi?’

¹⁴ Munyi mumali kovora, ‘Ni vuzwa kutumikira Nyasaye. Ni vokonyi ki kokora ga Nyasaye Wuvunyali avoora anoho kugeliza kumumanyia ndi koveeye novovereri ku ga kumali kokora?

¹⁵ Kuli kololaa, vandu vaveeye ni lielola nivo vaveeye nu vugasu. Avandu vadamanu sivanyoola vuzwa vutugi mba, navuzwa vageriza liekuzira lia Nyasaye mu vikolwa viavo vidamanu ma vahononoka.’ ”

¹⁶ Maku avandu vaatia Yahova vavolerana, na Yahova yahuliriza ma naahulira cha vavola. Vang'oda imbiri weve mu kitabu chu kwizuliza yavo vosi avatia Yahova kandi avahaana luyali kuye.

¹⁷ Yahova Wuvunyali yavoola, “Valakave vandu vange. Ku lidiku yilio lwa ndikola kekolwa, valakave vandu vange ligali. Ndakavaveere zimbavasi kuli baba aveeraa mwana weve umutumikiraa.

¹⁸ Avandu vange valakalole kandi kindu kilakekoleke hagati ha vandu valungi na vandu vachamu, ku mundu undumikira kandi mundu utandumikilaa.”