Malaki 1 - KITABU KITAKATIFU

Vuyanzi vwa Yahova ku Vandu va Isiraeli

¹ Yaga na makuva ga Yahova yahaana ku Malaki kovoolera vandu va Isiraeli.

² Yahova avooreraa vandu veve, “Inzi ndamuyaanza zing'inga ziosi.” Navuzwa vandu vaativura, “Ivi ukuyaanza kuli ndi?” Yahova yativura, “Esau na Yakobo vaali avamwavo, navuzwa ndayaanza Yakobo.

³ Inzi mali kusura Esau, mali kokora kivala chiche chi kiguru kuva hazwa kandi vivwi viu muchangalangwe komenya mu.”

⁴ Niiva visukululwi via Esau, avandu va Edomu vavoola, “Madaala giitu gamali kudivizwa, navuzwa kulagumbaka vuhia,” maku Yahova alakativuli, “Leka vagumbake vuhia, ndagasambula kandi. Avandu valalanga vandu va Edomu, ‘Kivala kichamu kandi ihiiri ya Yahova aveeye nayo nu vutima mihiga ni mihiga.’ ”

⁵ Avandu va Isiraeli vazizaa kolola yaga ni zimoni ziavo, kandi valakavoole, “Yahova aveeye nu vunyali kali chova wi kivala cha Isiraeli!”

Yahova Yagondokera Avasaalisi

⁶ Yahova Wuvunyali avooreraa avasaalisi, “Muyaayi ahaanaa luyali ku baba weve, kandi mutumikiri ahaanaa luyali ku munene veve. Inzi mbeeye baba winyu, kigira ki muvura kuhaana luyali ku inzi? Munyi munjayaa, navuzwa muteeva, ‘Kunyi kukuchayaa ndi?’

⁷ Munyi munjayaa kuli ndi; muhaana ku vwali vwange viukulia vioneka. Maku muteeva, ‘Kunyi sikuhaana ndi kuhaana luyali ku ivi?’ Inzi ndamuvolera, mukoraa ndio mu lichaya vwali vwange.

⁸ Lwa muletaa zinyama ziavakula anoho zialwala anaho zialema kuhaana kuli visiuviliru kuinzi, muganaganaa viveeye vilahi? Gelizi kuhaana inyama kuli yene yeyo ku Mwamihi! Alayanzizwa ni munyi anaho amuvugiliraa?”

⁹ Kalunu, munyi avasaalisi, gelizi koteeva Nyasaye ave mulahi ku kunyi. Sialahaana mativuli ku lisaala lienyu mba, kandi vulakave vudamanu vwinyu.

¹⁰ Yahova Wuvunyali avoora, “Nzegomba mundu mulala ku munyi ahane viliango vie Litembeli kunangwa muvuli kuhambiza muliru gutaduukanaa ku vwali vwange. Inzi simbeeye nuvuyanzi ni munyi mba, si ndavugilira vihaanwa via muletaa ku inzi mba.

¹¹ Avandu kutura kundulu kwi kivala kuduuka kundulu vahaana luyali ku inzi. Vasambira vuli havundu hoosi kimuli, kandi vahaana visiuviliru vivugilikaa ku inzi. Vosi vahaana luyali ku inzi!

¹² Navuzwa munyi simuhaanaa luyali ku inzi lwa muvooraa ndi vwali vwange sivoveeye kindu, kandi lwa muhaaniraaku viukulia vioneka.

¹³ Muvooraa, ‘Kunyi kuluhi ni vindu yivi viosi!’ Na mugilung'anaa ni mumbezaa. Lwa muhaanaa ku inzi muletaa vihaanwa vie zinyama zia mumali kwiva, anaho inyama yalema anoho ilwalaa, muganaganaa ndazivugilira?

¹⁴ Kilaamo keveeye ku oyo mugaadi uhaanaa kisiuviriru chu mutugu mudamanu ku inzi, lwaveeye nu mutugu mulahi muchayo chiche gwayalaga kuhaana ku Inzi! Kigira mbeeye mwami munene, navandu vi zihiiri ziosi vaatia Inzi.”