Lwimbu lwa Solomoni 6 - KITABU KITAKATIFU

Avakali

¹ Munyi vakali valahi ligali, muyanze winyu aziyi hayi? Mukovolere inzira yu muyanze winyu aziliyi ku, kunangwa kuduuki kumukonya kumwenya.

Mukali

² Muyanze wange aziyi mu mulimi gwigwe hi misaala ju mudalasini gimeraa. Yayizaa chayo chiche mu mulimi kandi avungiza kimuli mu mulimi.

³ Muyanze wange aveeye wange, kandi inzi mbeeye weve; yayizaa chayo chiche chamagondi hagati hi vimuli.

Lwimbu lwa Katano

⁴ Muyanze wange ivi oveeye mulahi ligali kuli Jerusalemi, 2 oveeye mulahi ligali kuli lidaala linene lia Tiriza. Ogendaa ni kivigu kuli muganda gwi liihi ne bendera yaavo imbiri.

⁵ Utambenza mba, kigira zimoni zizio zinyangizaa. Liisu liilio livinaa kuli chayo chi zimburi zisulungutaa kutura ku vigulu via Gileadi

⁶ Miinu googo gaveeye malavu kuli chayo cha magondi kimali kusingwa; sihaveeye ho kali lilala liagota mba goosi gaveeye harara.

⁷ Zisaya zizio zing'ereng'ana inyima we isuuka yooyo.

⁸ Leka mwami ave na vakali vuluyali 60, na vakali vaviika 80, vakali vasoleri vataveeye ni livaliza!

⁹ Navuzwa muyanze wange aveeye mulala yeng'ine vuzwa. Kandi aveeye muyanze kuli likuulu. Aveeye mukaana muderwa kumama weve, mwana muyanze wa mama weve. Avakali vosi vamuhenza ma vamwizominya. Avakali vu mwami na vakali vaviikwa vimba ni vamwizominya ligali.

¹⁰ Nivwaha uyu ololekaa kuli mumavwevwe? Aveeye mulavu kuli mweli, kandi wovulavu kuli liuva, agendaa kuli muganda gwi liihi nebendera yaavo imbiri?

¹¹ Ndasulunguta kutura mu mulimi gwa makuyu, ninzia mwivona kolola kimuli ni kisiahi; kolola niiva mizabibu gitangi kwama, kandi niiva mikuyu gitulizi kimuli.

¹² Mbeeye mu lidegera; umali konomba mbe niliegomba vuyanzi, kuli muhiri wi ligale liu vulwani yegombaa liihi.

Vakali

¹³ O, ivi mukaana wa Shulamu, yirana, yirana! Yirana nuvinaa kuduuki kokolola. Kigira ki ohenze mukaana wa Shulamu; kuli ohenzaa lisieva lie miganda giviri ji liihi?