Lwimbu lwa Solomoni 4 - KITABU KITAKATIFU

Musaza

¹ muyanze wange, oveeye wiligondo lilahi ligali! O, Oveeye mulahi ligali! Zimoni zizio zing'ereng'ana nu vuyanzi musuuka yooyo. Liisu liilio livinaa kuli chayo chi zimburi zisulungutaa kutura ku vigulu via Gileadi.

² Amiinu googo gaveeye malavu kuli magondi gamali kovegwa vwoya kandi gamali kusingwa. Siliveeye ho ni lilala liagota mba, goosi gaveeye harara.

³ Munwa gugwo goveeye kuli luvusi lwakanyu, goveeye mulahi ligali lwo molomaa. Zisaya zizio zing'ereng'ana inyima wi suka yooyo.

⁴ Ligoti liilio liveeye kuli munara gwa Daudi, gwumbakwa kigira inyumba yi viugi viu vulwani, Hi zikuuti 1,000 zia sungwa, ziosi zinguva zia vandu vi liihi.

⁵ Zimbeere zizio ziveeye kuli zimbongo, visusu viamalongo viaya hagati hi vimuli.

⁶ Ndagunza ku kiguru cha manemane, kiguru chi kimuli kuduuka lwi liuva litongaa, kandi kuduuka lwi kisundi kegota.

⁷ Muyanze wange, oveeye mulahi ligali; oveeye musiyiku ligali.

⁸ Mwiha wange, hamba harara ninzi kutura ku kiguru cha Lebanoni. Hamba ninzi kutura kondongozi kwi kiguru cha Amana. Kutura ku kiguru cha Seniri, na Herimoni, havundu hizisimba nizingo zimenyaa.

⁹ Uyanziza mwoyo gwange mbozo wange, mwiha wange, uyanzizi mwoyo gwange ni lihenza liezimoni zizio. Kandi munyororo mulala gwi ligina liu vuguli ogoveeye mwigoti mumwo.

¹⁰ Mwiha wange, muyanze wange vuyanzi vwuvwo vunyaanzizaa; vuyanzi vuvwo vuveeye vulahi kuvita iwaini, kandi muhomo gwa maguta googo goveeye mulahi kuvita mudarasini.

¹¹ Muyanze wange, munwa gugwo gotonyatonya vonolu kuli, maveere nu vwuki viveeye kululimi lulwo. Lulimi lulwo loveeye kuli lizazama lia maveere kandi vwuki ku inzi. Nu muhomo gwi zinguvu zizio goveeye kuli gwa Lebanoni.

¹² Muyanze wange, mwiha wange, oveeye kuli mulimi gwivisi, mulimi goveeye ni lidigi kandi oveeye kuli kisinukiru cha mazi; chafumwa hi misaala jamelaa.

¹³ Vivero vivio viavilukaa kuli musaala goveeye mumilimi. Kandi gwama makuyu malahi ligali. Mulimi gwi misaala ju muhomo.

¹⁴ Misaala jiveeye ni vimuli vifunya muhomo, harara ni midalasini minene.

¹⁵ Oveeye kuli mulimi gwi kisinukiru chi kidaho cha mazi; gi livamwoyo gitulululukaa kutura mu vigulu via Lebanoni.

Mukali

¹⁶ Vuka ive imbuza yi Ivaale; imbuza yi Isavaalu hamba. Huuza ku mulimi gwange. Yizuliza havundu hano nu mwika gwu muhomo oleke muyanze wange yaaze mu mulimi gwigwe kandi alie amakuyu malahi gagwo.