Lwimbu lwa Solomoni 2 - KITABU KITAKATIFU

¹ Inzi mbeeye kuli kimuli chakanyu cha Sharoni, kandi mbeeye kuli kimuli kilavu chu mulivona liu mukigulu.

Musaza

² Kuli kimuli hagati ha mafwa, nindio muyanze wange aveeye hagati ha vakali.

Mukali

³ Nindio aveveeye muyanze wange hagati ha vasaza vandi, oveeye kuli musaala gwa makuyu hagati hi misaala ju mulitu. Ndayaanza kwikala mu chiriri chagwo, kandi makuyu gagwo gaveeye amanolu ligali.

⁴ Yambira munyumba yeeye yu kulilamu lisavo, kandi yaginga ebendera yeeye yu vuyanzi ku inzi.

⁵ Omedi zinguru mu inzi na makuyu mumu, kandi undihizi amakuyu! Mbeeye mudedekere kigira uvuyanzi.

⁶ Mukono gwigwe mumosi goveeye isi wumutwi gwange, kandi yangumberera numukono gwigwe mulungi.

⁷ Mundage, O, avakali va Jerusalemi mwisuuhi, kulieta lie visusu kandi ku lieta lie zimbongo ziu muvulimu, ndi si mulagoyanyia vuyanzi vwitu mba.

Lwimbu lwa Kaviri Mukali

⁸ Mbulira mwoyo gwu muyanze wange. Yaazaa nanyagura kutura ku vigulu, atumatuma ku tugulu kuza kuinzi.

⁹ Muyanze wange aveeye kuli kisusu, kandi kuli embongo esoleri. Henza asingiyi ichova wi lidigi lietu, ahezereraa mu madirisha kandi alolekeraa muvibaho via madirisha.

¹⁰ Muyanze wange amolomaa ku inzi. Muyanze wange, hamba; muyanze wange mulahi ligali, hamba harara ninzi.

Musaza

¹¹ Ing'inga yu vukindu iviti; imbura imali kolekera kukuba,

¹² Amawa gatulizaa vimuli kukivala; ing'inga yu kwimba iduuki, lwimbu lwa makuulu luhulirikiraa mu milimi jitu.

¹³ Misaala ja makuyu gitangi kwengiza makuyu, mizabibu gilavizaa vimuli, giveeye nu muhomo mulahi. Muyanze wange, hamba; muyanze wange mulahi ligali, hamba harara ninzi.

¹⁴ Ivi oveeye kuli likuulu lievisaa mu zimbangaywa zia magina. Leka ndore mumoni mumwo kandi mbuliri mwoyo gugwo; Kigira mwoyo gugwo goveeye mulahi ligali, kandi mumoni mumwo muveeye mwuvuyaanzi.

¹⁵ Gumira vivwi vikekeke, nivikikiri kwononyia milimi jitu ji mizabibu.

Mukali

¹⁶ Muyanze wange aveeye wange, kandi inzi mbeeye weve. Yayizaa chayo chiche cha magondi hagati hi vimuli,

¹⁷ kuduuka lwi liuva litongaa, kandi kisundi kegota. Muyanze wange, wirane, kuli kisusu kandi kuli embongo esoleri ku vigulu via Bezeri.