Luka 8 - KITABU KITAKATIFU

¹ Inyima wa yaga, Yeso yagendagenda kuvitira mu madaala kandi mutudaala, niyilwaza Makuva Malahi kigira Vwami vwa Nyasaye. Aviigi veve likomi na vaviri vazia harara naye,

² kandi avakali valala avaari ni vahonyiywi kulula ku roho midamanu kandi zinguzu: Maria walangwa Magadalena uwa Yeso yaatuliza kuye amademoni saba,

³ na Joana mukali wa Chuza, uwaali mulindi munene wuvutugi vwi inyumba yoosi ya Herodi, Susana kandi vandi avanyingi. Avakali yava vatumikira linyola liavo okokoonya Yeso harara na aviigi veve ku viukulia.

Lugano lwu mumizi

⁴ Kiduma kenene cha avandu vaatura mu madaala goosi ni vivungiza harara ni vazia ku Yeso. Yeso yavakuba ulugano navoora:

⁵ “Mumizi yazia namiiza vuguza vwivwe. Lwa yaali namiiza, vulala vwagwa kunzira, ni vuduvagwa, kandi amanyonyi gigulu gavovoza.

⁶ Vuguza vundi vwagwa ku marova gukulwanda, na lwa vwamera, nonoho vwuma kigira sivwanyoola amazi gukuvuvirukiza mba.

⁷ Vuguza vundi vwagwa mumafwa, na amafwa gaviruka harara navwo, nigavukunika.

⁸ Vuguza vundi vwagwa mu marova amagunamu ni vomera, nivuviruka, nivwama mia ku vuli kitinya.” Yeso yamaliriza vindu yivi navoora, “Oveeye na amatu gukuhulira, ahuliri.”

Kivuni chokomoloma mu zing'ano

⁹ Aviigi veve vateva Yeso kivuni chuluganu yilu lovoolaa.

¹⁰ Yeso yativura, “Munyi muheveywi limanya lia gaviswa gu Vwami vwa Nyasaye, navuzwa ku vandi inzi molomera mu zing'ano, kunangwa kali nivahenza vudinyu, sivanyala kolola mba kali nivahuliriza, sivanyala kumanyiriza mba.”

Yeso yiivara lugano lwu mumizi

¹¹ Yiki nicho kivuni chu lugano yilu “Uvuguza ni likuva lia Nyasaye.

¹² Uvuguza vwagwa kunzira ni yavo avandu avamali kuhulira, navuzwa Setani yaazaa kandi atulizaa likuva zana mu mioyo jaavo, kunangwa avakole vavuli kusuuvira kandi vavuli kohonywa.

¹³ Uvuguza vwagwa ku marova guuku lwanda ni yavo avavuguraa likuva nuvuyanzi. Navuzwa sivaveeye nimiri mba; vasuuvira vuzwa ku ing'inga ngekeeke, navuzwa lwi ing'inga ya magerizu iduuka, vaatura ku lisuuvira.

¹⁴ Uvuguza vwagwa mumafwa ni yavo vahulira, navuzwa lwa vagenda mu zinzira ziavo, vakunikwa ni lihenda mwoyo lie kivala yiki, uvutugi kandi liiva lie vindu vie kivala; makuyu gaavo sigengaa mba.

¹⁵ Uvuguza vwagwa mu marova malahi na magunamu ni yavo avahulira likuva ma valigumira nu vusuuvirifu vwosi kandi numwoyo mulahi gwosi kandi vikuzira kuduuka lwa vaama amakuyu.

Itaya mu kihinda

¹⁶ “Sihaveeyeho numundu uhambizaa itaya ma agikunikira mu kihinda anoho agiviikaa mu lwaalo lwi kidali mba. Nitali agiviikaa igulu komesa, kunangwa avandu vingira vaduuki kolola uvulavu.

¹⁷ “Kigira sihaveeyeho ni kindu chaviswa ikilivula kulang'aminywa havulavu mba, kandi sihaveeyeho nichaviswa ikilivula kumanyikana, anoho koleetwa havulavu mba.

¹⁸ “Kigira yaga, mwilindi vulahi kuli muhulira; kigira oyo oveeye nacho, alahevwa vindi, na oyo utaveeye nacho alanyagwa kali kekekeeke cha aganagana aveeye nacho.”

Mama wa Yeso na avamwavo veve

¹⁹ Kunangwa mama wa Yeso na avamwavo veve vaza ku muloraa, navuzwa sivali vanyara kuduuka ahimbi kuye mba, kigirakiduma kenene cha avandu.

²⁰ Mundu mulala yazia ku Yeso na amuvoleraa, “Mama woovo na avamwavo vovo vasingiyi ichova, venya vakolole.”

²¹ Navuzwa Yeso yavavolera, “Mama wange na avamwavo vange, ni yavo avahulira likuva lia Nyasaye nivalilonda.”

Yeso yakiring'anyia viguvuli

²² Lidiku lilala Yeso yavolera aviigi veve, “Hambi kuzie engeleka, ku lovega lundi lwinyanza.” Ma vanina mu liato nivatanga kuzia.

²³ Lwa vaali nivambuka inyanza Yeso yagona. Nonoho imbuza yahuuza ku inyanza, ni iliato liatanga kwizura amazi nukwiyina, kandi vaali muvudinyu vonene.

²⁴ Aviigi vazia kuvukiza Yeso nivamuvoolera, “Mwami, Mwami, kudivaa!” Yeso yavuka kandi nagondekera imbuza ni viguvuli via amazi; viakiring'ana kandi gwaali mulengera.

²⁵ Maku yateeva aviigi veve, “Lisuuvira lienyu liveeye haliha?” Navuzwa vaatia kandi vagenya ligali nivatevanaa aveene naveene, “Ivwaha uyu? Agondokeraa kali imbuza ni viguvuli via amazi, kukiring'ana ma vimuhulira?”

Yeso yahonyia mundu waali na mademoni

²⁶ Yeso harara na aviigi veve vamanya nivambuka inyanza nivaduuka ku lujinga lwi kivala cha vandu va Gerasene, lidaala liveeye ku lwangereka lwi inyanza kutura Galilaya.

²⁷ Lwa Yeso yika kuzia ku lujinga, mundu mulala uwaali na mademoni, yaza namwaganira kutura mu lidaala yilio. Mundu uyu si yiviika zinguvu ku ing'inga indambi mba kandi si yamenya munyumba mba navuzwa yamenya muvilindwa.

²⁸ Lwa yalora Yeso, yahanzuka nu mwoyo munene, naagwa havirenge, imbiri weve, navoora, “Mbeeye naki niivi, Yeso, Mwana wa Nyasaye, oveeye igulu ligali? Ngogonya, utangubiza kivi mba.”

²⁹ Yavoola yaga kigira Yeso yaali nakungi mademoni kutura muye. Mademoni gaali ni gamugumira ku madiku manyingi. Kali niiva vandu vamuvoha virenge na amakono niminyororo ji vivia kandi vamulinda vudinyu, yakalanyia iminyororo zana. Lidemoni liamukunga nukumuhira muchangalangwe.

³⁰ Yeso yamuteeva, “Lieta liilio nivwaha?” Naye yativura, “Lieta liange ni ‘Legiona,’ ” kigira amademoni manyingi gaali ni gingira muye.

³¹ Gamugoonya atagakunga gazie mbogo mba.

³² Hazana yaho, haali ho ni chayo kenene chi zinguruvi niziaya ku kiguru. Kunangwa amademoni gagoonya Yeso agakungi gazie kwingira mu zinguruvi. Yagaha munwa.

³³ Amademoni gaturaa mu mundu oyo, ni gingira mu zinguruvi. Ichayo chi zinguruvi choosi chasulunguta zimbiru kuduuka munyanza; nizikuzira mu mazi.

³⁴ Lwa avayi valora vindu viali ni viekoleki viiruka zimbiru nivazia kulandiza amakuva yaga mu lidaala kandi mu kivala choosi.

³⁵ Avandu vazia kolola agaali ni gekoleki. Lwa vaduuka ku Yeso, vanyoola mundu wa mademoni gaali nigatuliziywi muye niyikaye ha virenge via Yeso; niyiviiki zinguvu, kandi niyituliyi. Vaatia ligali.

³⁶ Avandu avaari nivaloli ichekolekaa, vavavolera kuli uwaali na mademoni yahonywa.

³⁷ Maku avandu vosi, avivivala viali ahimbi via Gerasene vagoonya Yeso atuli kuvo; kigira vaali nu vuti vonene ligali. Yeso yingira mu liato nazia.

³⁸ Mundu wa mademoni gaali nigatuli kuye, yagoonya Yeso ayaanze aleke vazie naye. Navuzwa Yeso namuvolera,

³⁹ “Wirane yengo woovo kandi ulandizi aga Nyasaye akokoleeye.” Kunangwa mundu oyo yazia yengo nalandiza agokogenyia ga Yeso yaali naamukoleye.

Mukaana wa Yairo nu mukali wadira kunguvu ya Yeso

⁴⁰ Lwa Yeso yirana kolovega lundi lwinyanza, kiduma cha avandu chamwaganira nuvuyanzi, kigira vosi vaali nivamulindiliraa.

⁴¹ Maku mundu mulala, munene wi lisinagogi uwalangwa Yairo, yaza naagwa ha virenge via Yeso, namugoonya ayaanze yingiri munyumba yeeye,

⁴² kigira mukaana weve muderwa, uwaali ahimbi ni mihiga likomi nagiviri yaali nakinda. Lwa Yeso yaali nazizaa, viduma via avandu viamukumberiza zimbega ziosi, ahimbi vamuduvage.

⁴³ Mukali waali niyalwala vulwaye vwukutaza masahi ku mihiga likomi na mbiri yaali mu kiduma. Mukali oyo yamala ivindu vivie viosi ku avaahi vi zinyasi; navuzwa kali mulala siyaali anyala kumuhonyia mba.

⁴⁴ Yaza inyima wa Yeso, nadiira ku lukigiti lwi inguvu yeeye; nonoho litaza lilie liakalizira.

⁴⁵ Yeso yateeva, “Nivwaha undiiyi?” Lwa avandu vosi vambakana, Petero yavoola, “Mwami, avandu vakukumbirizi kandi vakumina.”

⁴⁶ Navuzwa Yeso yavoola, “Mundu yaali kundira, ndakumanya kigira nzihulira zinguru ni ziituli ku inzi.”

⁴⁷ Kigira mukali yalora ndi sianyala kwivisa, yaza nadegeraa, naagwa hasi ha virenge via Yeso. Ahene yaho, imbiri wa avandu vosi, yavoola kivuni kigiri nadiira Yeso kandi kuli yaali nahonyiywi.

⁴⁸ Yeso yamuvolera, “Mukaana wange, lisuuvira liilio likohonyi; zia ni mirembe.”

⁴⁹ Lwa Yeso yaali nakevoola yaga, mundu mulala yatumwa kutura munyumba ya Yairo, Munene wi lisinagogi, navoora, “Mukaana woovo ukuzi. Utanyangiza mwigizi mba.”

⁵⁰ Navuzwa lwa Yeso yahulira ndio, yavolera Jairo, “Utatia mba. Usuuviri vuzwa, na alahona.”

⁵¹ Lwa yaduuka hanyumba, siyavugilira mundu wundi kwingira harara naye, navuzwa Petero, Yohana na Yakobo, kandi baba na mama wu mukaana.

⁵² Avandu vosi valira nivasioma. Navuzwa yavavolera, “Mutalira mba. Siakuzi mba, agonaa.”

⁵³ Vosi vamuseka kigira vamanya ukuzi.

⁵⁴ Navuzwa Yeso yamugumira mukono nalanga navoora, “Mwana wange, vuka.”

⁵⁵ Mwoyo gwigwe gwirana vwangu, nasingira. Yeso yavolera aviivuli veve vamuhe chukulia alie.

⁵⁶ Aviivuli veve vagenya ligali, navuzwa Yeso yavalaga vatavoolera mundu kali mulala, agekoleki mba.