Luka 5 - KITABU KITAKATIFU

Yeso yalanga aviigi vukutanga

¹ Lidiku lilala Yeso yaali nasingiyi kulujinga lwinyanza ya Genesareti, kiduma cha avandu vanyingi vamukumbiriza, kandi nivahulirizaa likuva lia Nyasaye.

² Yalora amato gaviri nigasingiyi ku lujinga zana. Valuvi vaali nivatuli mu, nivogizaa miluvo jaavo.

³ Lwa Yeso yanina mu liato lilala iliali lia Simoni, yavolera Simoni alisundi mumazi hakekeke lituli kulujinga. Yikala, mu niyigiza kiduma.

⁴ Lwa yaali niyakamara kwigiza, yavolera Simoni, “Hila liato kuduuka mululiva lwa mazi ma muviiki miluvo jinyu mu mazi muluvi zisuzi.”

⁵ Simoni yamutivulira, “Mwami kokoli miyinzi ju kuluva vudiku vwosi vugira konyoora kindu choosi. Navuzwa kigira ivi ovooye ndaviika miluvo mumazi.”

⁶ Lwa vaali nivakakola ndio, vaaluva zisuzi zinyingi kali miluvu jaavo jatanga kutanduka.

⁷ Vasima avaluvi vache vaavo avaari mu liato lindi vaze kuvakonya. Vaza nivizuliza zisuzi mu maato goosi gaviri kuduuka nigava ahimbi kwiyina.

⁸ Lwa Simoni Petero yalora ndio, yagwa hasi mam'mama imbiri wa Yeso navoora, “Tula ku inzi, kigira inzi mbeeye umwoni, O, Mwami!”

⁹ Simoni harara na avache veve vosi vagenya konyoora zisuzi zinyingi kuli ndio.

¹⁰ Yakobo na Yohana avana va Zebedayo vaali avasangi mu vuluvi harara na Simoni. Yeso yavolera Simoni, “Utatia mba, kutura kalunu ulava muluvi wukuluva avandu.”

¹¹ Lwa vaali nivakamara koleta amato gaavo kulujinga lwinyanza, vaagaleka goosi nivamulonda.

Yeso Yahonyia Mugere

¹² Lwa Yeso yaali mu lidaala lilala, mundu musaza mulala yaali mu wovogere vwali nivwamala umuviri. Lwa yalora Yeso, yagwa mam'mama imbiri weve nasaara navoora; “Mwami nuyanza unyala kundakasa!”

¹³ Yeso yanyira mukono gwigwe, namudiira navoora, “Nyanza! Takaswa!” Ahene yaho ovogere vwatula ku mundu oyo

¹⁴ Maku Yeso yaamwiganihiza navoora, “Utavoolera mundu kali mulala mba, navuzwa uzie ku musaalisi akohenze, ma uhaane isadaka yilitakaswa liilio kuli Musa yalaga, kumanyia avandu ndi umali kohona.”

¹⁵ Navuzwa amakuva ga Yeso gameeda kulanda havundu hoosi. Viduma vinyingi via vandu viza kuye kumuhuliriza nokohonywa vulwaye vwavo.

¹⁶ Navuzwa Yeso yiyahulaa nazia ahivisu kusaala.

Yeso yahonyia mundu wafogoya

¹⁷ Lwa Yeso yaali niyigizaa, Avafarisayo na avigizi vi Lilaga kutura mutudaala twosi twa Galilaya, Ivuyuda na Jerusalemi, vaali nivikaye ho. Zinguru ziu Mwami ziali harara na Yeso kohonyia valwaye.

¹⁸ Henza, avandu vaza nivagingiyi mundu wafogoya ku vogono. Vageriza kumwingiriza vamuviki imbiri wa Yeso,

¹⁹ navuzwa kigira avandu vaali vanyingi, sivalola inzira yukwingirizira mu mba. Kunangwa vanina kunyumba igulu ni vagifudula mani vikizira ho uwafogoya ku vogono vwivwe, nivamuviika imbiri wa Yeso.

²⁰ Lwa Yeso yalora lisuuvira liavo linene, yavolera mundu oyo, “Mulina wange, vwoni vuvwo vusamiihiywi.”

²¹ Avigizi vi Lilaga na Vafarisayo vatanga kotevana nivavoora, “Ni mundu ki uyu ovola manyego? Ivwaha unyala kusamiiha uvwoni natali Nyasaye yenyine?”

²² Lwa Yeso yamanya zing'anagani ziavo yateeva, “Muganaganaa ki mu mioyo jinyu?

²³ Ekeveeye kedoto ligali ni kiliha; kovora, ‘Usamihiywi vwoni vuvwo’ anoho kovora ‘Singira ogeende?’

²⁴ Navuzwa nyenya mumanye ndi Mwana wa Adamu aveeye ni zinguru kusamiiha uvwoni mu lirova” Kunangwa yavolera mundu wafogoya oyo, “Ngovolera! Singira vugula vogono vuvwo uzie yengo.”

²⁵ Nonoho mundu wafogoya oyo yasingira imbiri wavo vosi, navugura vogono vwivwe, nazia yengo, niyizominya Nyasaye.

²⁶ Vosi vagenya niviizura uvuti, nivakuminya Nyasaye nivavoora, “Kumali kolola vindu viokogenyia lero!”

Yeso Yalanga Matayo amulonde

²⁷ Inyima wayaga Yeso yatura ichova nalora musololi wu vusuuru uwalangwa Levi niyikaye mu ofisi. Yeso yamuvolera, “Nonda”

²⁸ Levi yaleka viosi naamulonda.

²⁹ Levi yalombera Yeso lilia linene munyumba yeeye. Kiduma kenene cha vasololi vuvusuuru na avandu vandi avaari nivikaye harara navo.

³⁰ Mu lilia, Avafarisayo valala na avigizi vi Lilaga valala vihambihiza Yeso nivavoora, “Kigira ki mulizaa nukunwa harara na vasololi vuvusuuru kandi na avoni?”

³¹ Yeso yavativulira, “Vandu vaveeye avalamu sivenyaa mwahi wi zinyasi mba; navuzwa avamwenyaa nivaveeye avalwaye.

³² Sindaaza kulanga avalungi, navuzwa avoni vaduuki kwiganira.”

Amateeva kigira lihonga lilia

³³ Avandu vavoolera Yeso, “Aviigi va Yohana Mubatizi vahonga lilia haali kanyingi nivasaara, kandi aviigi va Avafarisayo vakora ndio; navuzwa aviigi vovo valiza vuzwa nivanwa.”

³⁴ Yeso yavavolera, “Munyala kokora avalangiywi mukeselero vahonge lilia lwa mwene keserero aveeye harara navo?

³⁵ Navuzwa amadiku galaduuka lwu mwami osereraa alitulizwa kuvo. Lwene yilwo nilwo lwa valihonga lilia.”

³⁶ Yeso yavavolera lugano yilu: “Avandu sivakalaa kilavi chinguvu imbia nukukinavira kunguvu ingulu mba. Niiva vakora ndio valava nivatanduyi inguvu, kandi ikilavi kihia sikilaleng'ana ninguvu ingulu mba.

³⁷ Avandu sivazukaa iwaini imbia mu zimuya zie visero vikulu mba; kigira iwaini imbia ilatandula zimuya zie visero yizio, na iwaini ilasunduka, ni zimuya zie visero zilononywa.

³⁸ Lwaini imbia izukwaa mu zimuya zievisero zimbia!

³⁹ Si haali kandi numundu ukayilangwa iwaini imbia namali kunwa iwaini ingulu mba, kigira avoora, ingulu nindahi.”