Luka 4 - KITABU KITAKATIFU

Ligerizwa lia Yeso

¹ Yeso yirana kutura mu mugera gwa Jorodani niyizuuyi Roho Mutakatifu, yimilirwa na Roho kuzia mwigendanyama,

² wa yagerizwa na Setani ku madiku arubaini. Ku madiku yago goosi si yaalia kindu mba. Inyima wa madiku yago yaali ninzara.

³ Setani yamuvolera, “Niiva oveeye Mwana wa Nyasaye laga ligina yili ligwi mugadi.”

⁴ Yeso yamutivulira, “Gang'odwa mu Mang'oda Matakatifu, ‘Mundu sianyala kuva mwoyo kigira mugadi gweng'ine mba.’ ”

⁵ Setani yamuhira igulu ku kiguru kitambi ligali na mumanyia vwami vwosi vwilirova ku ing'inga engekeeke. Setani yamuvolera,

⁶ “Ndakuha vunyali ku vwami yivu vwosi nu vukumi vwavwo kigira ndaheevwa yivi viosi nyara kuhaana ku mundu woosi wanyenyi.

⁷ Niiva ulasigamira, yivi viosi vilava vindu vivio.”

⁸ Yeso yamutivulira, “Gang'odwa mu Mang'oda Matakatifu, ‘Ulasigamira Mwami Nyasaye woovo kandi utumikiri oyo yeng'ine!’ ”

⁹ Setani yamuhira Jerusalemi ku kesegese chi Litembeli namuvolera, “Niiva oveeye Mwana wa Nyasaye, tuma hasi.

¹⁰ Kigira gang'odwa mu Mang'oda Matakatifu, ‘Nyasaye alalaga zingelosi veve vakulindi.’

¹¹ Gavoora kandi, ‘Valakuginga mu makono gaavo gase ulikigitala kerenge kwigina.’ ”

¹² Navuzwa Yeso yamutivulira, “Gang'odwa mu Mang'oda Matakatifu, ‘Utageriza Mwami Nyasaye woovo mba.’ ”

¹³ Lwa Setani yamala kugeriza Yeso muzinzira ziosi, yamuleka ku ing'inga engekeeke.

Yeso yaatanga miyinzi jije mu Galilaya

¹⁴ Yeso yirana Galilaya niyizuuyi zinguru zia Roho Mutakatifu, kandi amakuva geege galaanda muzimbega ziosi zia vodong'ana kivala yicho.

¹⁵ Naye yigiza avandu mumasinagogi gaavo kandi avandu vosi vamwizominya.

Yeso Yasuulwa ha Nazareti

¹⁶ Kunangwa Yeso yazia Nazareti wa yavirukira ku lidiku lie Lisabato, yingira mu Lisinagogi kuli gwaali mwima gwigwe. 17 Yasingira Kosooma Mang'oda Matakatifu.

¹⁷ Yahevwa kitabu chu muporofeti Isaya. Yakunula nanyoora aha gang'odwa ndi;

¹⁸ “Roho wu Mwami aveeye ku inzi, kigira umbaki maguta kwilwazira avadaka Makuva Malahi ga Nyasaye. Yaanduma kulandizira avavofa ndi valanyora livoholorwa liavo, avavoku valanyora lilora kandi kovoholora yavo avadambizwa.

¹⁹ Kandi kulandiza muhiga mulahi lwu Mwami alihonyia avandu veve.”

²⁰ Yeso ni yakamala kosooma, yakunika kitabu niyilanyira mutumikiri ma niyikara. Avandu vosi avaari mu Lisinagogi vamuhenza.

²¹ Naye yaatanga kuvavoolera, “Kalunu Mang'oda Matakatifu yaga gaduukiziywi ku munyi kuli muhuliyi ni gasomwa.”

²² Avandu vosi vayanzizwa naye ni vagenya kigira makuva malahi gayavoola. Vavoola, “Uyu siaveeye muyaayi wa Josefu?”

²³ Yavavolera, “Mbeeye na agiligali ndi mulambolera lugano yilu; ‘Wizinyasi, wehonyie mwene.’ Mulambolera kandi, ‘Amakuva goosi gakwahulira wakola Kaperinaumi ugakole hano kandi mu lidaala liilio mwene.’ ”

²⁴ Yaazizagilira kovora, “Agiligali muvooleraa, muporofeti siavugilirwaa mu lidaala lilie mba.

²⁵ “Mumbulirizi: gaveeye agiligali ndi vaali ho avakunzakali avanyingi mu kivala cha Isiraeli mu madiku ga Elija. Lwi imbura yavula kukuba ku mihiga jivaga ni mieli sita, inzara enene yaduuka mu kivala choosi.

²⁶ Navuzwa Elija, si yatumwa ku mundu wundi woosi, nitali ku mukali mulala mukunzakali wi lidaala lia Zerefazi, mu kivala cha Sidoni.

²⁷ Mu kivala cha Isiraeli mu madiku gu muporofeti Elisha vaali ho avagere vanyingi. Navuzwa siyaali ho watakaswa natali Naamani mundu wa Siria.”

²⁸ Lwa vahulira yaga, vosi avaari mu lisinagogi vizura uvutima.

²⁹ Vasingira ni vamulumba ichova wi lidaala liavo iliali ni liumbakwa ku kiguru, ni vamuhira ku lohongo lwe kiguru yicho Venya kumuluguta mulohongo yilwo.

³⁰ Navuzwa Yeso yaavitira hagatl haavo, nazia.

Mundu waali ni lidemoni

³¹ Kunangwa Yeso yasulunguta kuduuka Kaperinaumi, lidaala liveeye mu kivala cha Galilaya, yigiza avandu ku lidiku lie Lisabato.

³² Vagenya kigira zinguru zia yaali nazio mu miigizu geege. Kigira yamoloma nuvunyari.

³³ Mu lisinagogi yimwo yaali mu mundu mulala uwaali ni yagumirwa ni lidemoni, yakuba zikwiri nu mwoyo munene,

³⁴ “Ai! Yeso wa Nazareti! Kigira ki ukwingilira? Uzi kukudiviza? Inzi ngumanyi, ivi oveeye vwaha. Ivi oveeye mutumwa Mutakatifu wa Nyasaye!”

³⁵ Navuzwa Yeso yaligondokera navoora, “Kiring'ana! Tula mu mundu uyu!” Kunangwa lidemoni lwa liamala kutuura mundu oyo hasi, liatura muye vugira kumusaliriza kali hakuzu.

³⁶ Avandu vosi vagenya ligali ni vavolerana, “Ni likuva lugano ki yili; kigira kuzingulu nuvunyari, akunga roho midamanu kutura najo jitula!”

³⁷ Lusuma lwa makuva geege lwalanda mu kivala yicho choosi.

Yeso Yahonyia avandu vanyingi

³⁸ Yeso yatura mu lisinagogi niyingira munyumba ya Simoni. Navizara Simoni yaali na agumiliywi nuvulwaye vonene. Vamuteeva amuhonyie.

³⁹ Yeso yazia nasingira ahimbi naye na gondokeraa vulwaye, kandi yahona nonoho kutura ku vulwaye. Na ahene yaho mukeere oyo yasingira, na avatumikiraa.

⁴⁰ Lwa liuvaliali niliyeraa, vosi avaari nivalwaye vaavo lugano nalugano vavaleeta kuye, yavika makono geege kuvo vosi navahonyia.

⁴¹ Mademoni gaturaa kuvandu vanyingi nigahanzuka, nigavoora, “lvi oveeye Mwana wa Nyasaye!” Navuzwa Yeso yagagondokera, siyagavugilira gamolome mba, kigira gaamanya aveeye Kristo.

Yeso yilwaza mu masinagogi

⁴² Lwa vwacha, Yeso yatura nazia aha avandu vatali. Avandu vaali nivamwenyaa ligali. Lwa vaduuka aha yaali, vageriza kumwigalira avuli kutura kuvo.

⁴³ Navuzwa yavavolera, “Gaduukanaa inzi nzilwaze Amakuva Malahi gu Vwami vwa Nyasaye mu madaala goosi kandi, kigira ndatumwa ku kivuni chene yiki.”

⁴⁴ Kunangwa Yeso yilwaza mu masinagogi mu Vuyuda mwosi.