Luka 24 - KITABU KITAKATIFU

Lisimuguka lia Yeso

¹ Mugambazuri mumavwevwe, ku lidiku lia Jumapili, avakali vazia ha kilindwa nivahira ivindu viafunya mwayu ivia vaali nivakwetegekiza.

² Vanyoola ligina ni ligomagominyiywi kutura ku kilindwa.

³ Navuzwa lwa vingira mu kilindwa, sivanyoola mu muviri gwu Mwami Yeso mba.

⁴ Lwa vaali ni vagenya ku yaga, nonoho, avandu vaviri vasingira navo, aviviika zinguvu zing'ereng'anu kuli loheni.

⁵ Avakali yavo vizura uvuti vonene, nivinaminya mitwi jiavo hasi. Navuzwa avandu yavo vavavolera, “Kigira ki munyi mwenya uyu oveeye mwoyo mu avakuzu?

⁶ Siaveeye hano mba, navuzwa usimuguki! Mwizurizi kuli wa yamuvolera, lwa yaali nakikiri ni munyi mu Galilaya.

⁷ Yavoola ndi, ‘Gaduukiraa Mwana wa Adamu kuvikwa mu makono ga vandu avoni, nukumuvamba, navuzwa lidiku lia kavaga, alasimugukizwa kandi.’ ”

⁸ Avakali yavo vizuliza amakuva ga Yeso.

⁹ Lwa virana kutura ha kilindwa, vazia nivavolera avaari likomi na mulala na avandi vosi vindu yivi viosi.

¹⁰ Vaali Maria Magadalena, Joana na Maria mama wa Yakobo; yavo na avakali vandi harara vavoolera avatumwa vindu yivi

¹¹ Navuzwa avatumwa sivasuuvira amakuva ga vakali yava mba, vagavugula vuzwa kuli zimbaka. [

¹² Navuzwa Petero yasingira nanyagura nazia kuduuka ha kilindwa. Lwa yinama nahenza mu, yalora zinguvu ziekatani zilingiywi maku yirana yengo weve naagenyi kugaali nigekoleki.]

Ologendo lwu kuzia Emausi

¹³ Lidiku zana yilio, vaviri ku valondi va Yeso vaali nivazizaa mu kadaala akalangwa Emausi nivaturaa Jerusalemi, ologendo lwi zikilomita likomi nandala.

¹⁴ Vaali ni vavoolerana aveene kigira vindu viosi iviali nivimali kokoleka.

¹⁵ Lwa vaali nivavolerana kandi nivatevanaa, Yeso yaza niyisunda himbi kuvo nagenda harara navo.

¹⁶ Vamulola, navuzwa sivamumanyiriza mba.

¹⁷ Yeso, yavateva, “Makuva ki ga muvooleranaa ni mugendaa?” Navo vasingira makiriri muligenya nomuvovereri.

¹⁸ Kunangwa, mulala kuvo, uwalangwa Kiliopa, yamuteeva, “Ni ivi weng'ine oveeye mugeni mu Jerusalemi, kandi utamanyi ivindu viakoleki yo mu madiku makekeeke gaaviti yaga?”

¹⁹ Yeso yamuteeva, “Ni vindu ki?” Navo vativura, “Vindu viekoleka ku Yeso wa Nazareti, uwaali muporofeti, wizingulu ziu kokora nokovoora imbiri wa Nyasaye kandi imbiri wa vandu vosi.

²⁰ Avasaalisi vanene na vamiihi viitu vamuzaama mu makono gu mwami wa Varumi aduuki kumukalagira likuza, ma nukumuvamba.

²¹ Navuzwa kunyi kwaali ni kwasuuvira ndi, niyie ulihonyia Isiraeli. Kuvita goosi, kutura ing'inga yi vindu yivi viakolwa, kalunu ni lidiku lia kavaga.

²² Harara na agene yago, avalala ku vakali vu muganda gwitu vamali kokogenyia ligali. Vakiviiyi ha kilindwa mugambazuri ligali,

²³ navuzwa si vanyooye muviri gwigwe mba. Virani vwangu nivavoora ndi vamali kokora malola gi zingelosi vaavavooleye ndi aveeye mwoyo.

²⁴ Avalala kukunyi vazia ha kilindwa nivanyoora kuli avakali vaali nivavooye, navuzwa sivalola Yeso mba.”

²⁵ Yeso yavavolera, “Avandu avasiru munyi, avimioyo jiveeye midinyu kusuuvira viosi via vaporofeti vavoola!

²⁶ Si vwali vulahi Kristo asalirizwi mu vindu yivi viosi mukwingira mu vukumi vwivwe mwigulu harara na Nyasaye?”

²⁷ Yaatanga kuvavuulira kutangira mu vitabu via Musa nu mu mang'oda ga vaporofeti vosi kuli gang'odwa mu, kigira oyo.

²⁸ Kunangwa lwa vaduuka ahimbi ku kadaala ka vazizaa mu, Yeso yaloleka kuli uzizagilira nologendo.

²⁹ Navuzwa vamugoonya ligali nivavoora, “Ogone nikunyi kigira ing'inga iviti nuvudiku vuduuki.” Kunangwa Yeso yazia niyingira mu kadaala yako, nasoosa navo.

³⁰ Lwa yikala kulia viukulia harara navo, yavugula mugadi, nasandiza Nyasaye, nagomeganyia kandi natanga kuvaha.

³¹ Zimoni ziavo ziakunulwa ni vamumanyiriza, navuzwa yamanya natura kuvo.

³² Vateevana mulala nu wundi, “Mioyo jitu, sijali nuvusangali vonene lwa komolomangi naye nikogenda kunzira, nakwivaliraa mang'oda matakatifu?”

³³ Vaatura vwangu nivirana Jerusalemi; nivanyoolayo aviigi va Yeso avaari likomi na mulala harara na vandi vavaali navo.

³⁴ Vavoola, “Gaveeye agiligali, Mwami umali kusimuguka kandi umali kololeka ku Simoni.”

³⁵ Avaari vaviri yavo, vavivaalira vindu viakoleka kunzira, kandi kuli vamanyiriza Yeso lwa yameganyia mugadi.

Yeso yaloleka ku aviigi veve

³⁶ Lwa vaali nivakevoola yaga, Yeso mwene yasingira hagati haavo navavoolera, “Mirembe ku munyi.”

³⁷ Veegosa ligali nivatia nivaganagana ndi valora kigiingi.

³⁸ Navuzwa Yeso yavavolera, “Kigira ki mwegosaa kandi kigira ki muhayahayiza mu mioyo jinyu?

³⁹ Heenzi ku makono gange nivirenge viange. Ninzi mwene! Mundiri nalalola ndi kigingi sikeveeye nizinyama kandi vigumba mba, kuli muloraa inzi nimbeeye navio da.” [

⁴⁰ Lwa yaali niyakamara kovora yaga, yavamanyia makono geege ni virenge vivie.]

⁴¹ Lwa vavura kusuuvira kigira vuyanzi ni ligenya liavo, ya vavoolera, “Muveeye ku hano nikindu choosi chamulia?”

⁴² Vamuha kedonye chi isuzi inyuminyi.

⁴³ Yeso yakivugula naakilia imbiri wavo vosi nivalora.

⁴⁴ Yavavolera, “Yaga namakuva ga ndamuvolera ulwa ndaali ningikiri ni munyi: Vindu viosi viang'odwa mu Lilaga lia Musa kandi mu mang'oda ga vaporofeti nu muzaburi kigira inzi, nivulahi viduukizwi.”

⁴⁵ Maku Yeso yakunura zing'anagani ziavo vaduuki kumanya mang'oda matakatifu.

⁴⁶ Yavavolera “Yaga nigo agang'odwa, ‘Kristo aliitwa na asimuguki kutura mu vakuzu ku lidiku lia kavaga,’

⁴⁷ kandi lieganira nilisamiifwa liu vwoni lililwazwa mu zihiiri ziosi mu lieta lilie kutangira mu Jerusalemi.

⁴⁸ Munyi muveeye avalolekizi vi vindu yivi.

⁴⁹ Henza, inzi mwene ndamutumira Roho Mutakatifu wa Baba yandaga, navuzwa kuduuka munyi mulindi mu lidaala kuduuka lwi zinguru yizi kutura mwigulu, ziika ku munyi.”

Yeso Avugulwa kuzia mwigulu

⁵⁰ Maku yaavimilira kutura ichova wi lidaala linene kuduuka Bezani, yaginga makono geege yigulu navagasiza.

⁵¹ Lwa yaali navagasiza, yatura kuvo kandi yahilwa mwigulu.

⁵² Vaamusigamira ma nivirana Jerusalemi, nivizuuyi uvusangari vonene;

⁵³ kandi vatumikira vwiyangu vwavo vwosi mu Litembeli nivahaana lisandiza ku Nyasaye.