Luka 23 - KITABU KITAKATIFU

Yeso yahilwa imbiri wa Pilato

¹ Kiduma choosi chasingira nivahira Yeso imbiri wa Pilato.

² Vatanga kumuyaara nivavoora, “Kwanyoora mundu uyu nagirung'anyia ihiiri yitu. Yagaya avandu vavuli kutunga uvusuru ku Mwami Munene wa Rumi kandi umwene yevoola ndi aveeye Kristo, umwami.”

³ Pilato yateeva Yeso “Ivi niyie Mwami wa Vayuda?” Yeso yativura, “Ivi ovooye!”

⁴ Pilato yavolera avasaalisi vanene nividuma via vandu, “Sindora kindu kidamanu ku mundu uyu mba.”

⁵ Navuzwa vanigiliza ligali nivavoora, “Mundu uyu agemehizaa avandu na amigizu geege mu Vuyuda mwosi. Yatangila Galilaya na kalunu uduuki hano.”

Yeso yahilwa ku Herodi

⁶ Lwa Pilato yahulira ndio, yateeva, “Mundu uyu aveeye Mugalilaya?”

⁷ Lwa Pilato yamanya ndi, Yeso yatura mu kivala chamifwa na Herodi, yamutuma ku Herodi, uwaali naveeye mu Jerusalemi ing'inga yene yeyo.

⁸ Herodi yayanza ligali lwa yalora Yeso, kigira yaali niyahulira amakuva geege kandi yegomba kolola Yeso kutura kale. Kolondekana na agayaali ni yahulira ku Yeso, Herodi yasuuviraa alalola Yeso nakora kelolekizu.

⁹ Kunangwa yateeva Yeso mateeva manyingi ligali navuzwa Yeso siyamutivulira kindu mba.

¹⁰ Avasaalisi vanene na avigizi vi Lilaga vasingira, nivamuyaala nu vululu.

¹¹ Herodi harara navasikari veve vachaya ni vaviika Yeso mu zisoni, nivamukolera kehenyahenye. Vaviika Yeso iganza indahi yuluyali ma nivamwiranyia wa Pilato.

¹² Ku lidiku liene yilio, Herodi na Pilato vahambana uvulina, kigira kutura hanyima vaali vasigu.

Yeso yakalagirwa likuza

¹³ Pilato yalanga harara avasaalisi vanene, na aviimiliri vosi va avandu.

¹⁴ Yavavolera, “Muleeti mundu uyu ku inzi nimuvooraa ndi agotizaa avandu, inzi mali kumuteeveleriza mateeva imbiri winyu, na sindora kindu kuye kali kilala ku aga mumuyaaliraa, ikiduukanaa ni likuza mba.

¹⁵ Anoho Herodi, siamunyooye nilihiolo, kigira umali kumwiranyia ku kunyi mba.

¹⁶ Kulwayago, ndaleka akuywi ma muvoholore.” [

¹⁷ Kunangwa vuli lidiku linene lie Lipasaka, Pilato yanigwa kovohololera avandu va Jerusalemi, muhambe mulala.]

¹⁸ Navuzwa avandu yavo vosi vahanzuka nu mwoyo mulala nivavoora, “Yita mundu uyu, okovohololere Baraba!”

¹⁹ Baraba yaali ni yavofwa kigira ligemehiza liakolwa mu lidaala kandi liita.

²⁰ Pilato yenya kuvoholola Yeso, kunangwa yagoonya kiduma cha vandu kandi.

²¹ Navuzwa vahanzuka numwoyo munene nivavoora, “Muvambe! Muvambe!”

²² Pilato yavavolera lwa kavaga, “Kigira ki? Mundu uyu akoli vudamanu ki? Inzi sindoli uvudamanu muye uvuduukanaa nilikuza mba. Kigira yaga, ndaleka akuywi ma muvoholore.”

²³ Navuzwa vazizagilira kuhanzuka vudinyu numwoyo gwosi nivenya kuzinguru, Yeso avambwe. Mu limalirika, lihanzuka liavo liaguuta.

²⁴ Kunangwa Pilato yakalaga ndi Lienya liavo livugiriywi.

²⁵ Yavoholora Baraba uwavofwa muvuhambe kigira ligemehiza vulwani nu vwiti. Uyu niyie wa yenya kuzinguru. Navuzwa yahaana Yeso kuvo vamukolere kuli venya.

Yeso yavambwa

²⁶ Lwa avasikari vaali nivahira Yeso, vaagana nu mundu mulala, uwalangwa Simoni kutura mu lidaala lia Kurene, uwaali natura mu mulimi. Avasikari yavo vamugumira nivamudwika musalaba. Vamuniga agugingi alonde Yeso inyima.

²⁷ Kiduma kenene cha vandu, vamulonda, vaali mu avakali valala vamusiomera nukumulilira ligali.

²⁸ Yeso yagirung'ana navavoolera, “Avakaana va Jerusalemi! Mutandilira mba, navuzwa mwiliriri aveene harara na avana vinyu.

²⁹ Kigira ing'inga yiza ya avandu valivoola, ‘Vaveeye nu vugasu avakali vagumba, kandi zinda ziavula kwivura avana, ni izimbeere ziavula kunyunyia.’

³⁰ Ing'inga yeyo niyio ya avandu valitanga kovoolera vigulu, ‘Mukugwiri!’ Na ku tugulu, ‘Mukukuniki!’

³¹ Ligali, niiva avandu vakora vindu yivi ku musaala muvisi, na galava ki ku musaala mwumu?”

³² Avandu vandi vaviri, avaakoraa vudamanu, vaahirwa, vazie kwitwa harara na Yeso.

³³ Lwa vaduuka ahalangwa “Gologoza” - iliveeye kovora “Ha Kihaanga”, vavaambira Yeso ahene yaho, kandi vaviika vandu vaali vakoli vudamanu yavo, mulala ku mukono mulungi nu wundi ku mukono mumosi.

³⁴ Kandi Yeso yavoola, “Baba, uvasamihi, kigira sivamanyi icha vakora mba.” Vagavulana zinguvu zizie ku likuba ikura.

³⁵ Avandu vasingira ho nivahenza, lwa aviimiliri va Vayuda vamukolera kehenyahenye. Vavoola, “Yahonyia avandi, leki yehonyie umwene niiva aveeye Kristo wa Nyasaye amali kotovola.”

³⁶ Avasikari kandi navo vamukolera kehenyahenye. Vaza ku Yeso nivamuha isiki induru anwi.

³⁷ Nivavoora, “Ivi niiva oveeye mwami wa Vayuda, wehonyie umwene.”

³⁸ Amang'oda yaga gaali higulu: “UYU NI YIE MWAMI WAVAYUDA.”

³⁹ Mulala ku vandu vaali vakoli vudamanu waali navambiywi naye yaamunyega navoora, “Ivi sioveeye Kristo? Wehonyie mwene harara ni kunyi.”

⁴⁰ Navuzwa wundi yamugondokera, navoora, “Ivi siunyala kutia Nyasaye kali hakuzu? Kigira, ivi oveeye mu likalagirwa lilala liere kuli uyu.

⁴¹ Kunyi ligali koheveeywe amaduywa gaduukanaa ni kunyi; kigira kunyi konyoora amadanyi gi miyinzi jietu midamanu. Navuzwa mundu uyu si yakola kindu kidamanu mba.”

⁴² Yavoola, “Yeso! Unzizulizi lwu uduuka mu Vwami vuvwo.”

⁴³ Yeso yamuvolera, “Ligali ligali ngovolera, kalunu ulava ninzi mu Paradiso.”

Likuza lia Yeso

⁴⁴ Yaali ahimbi saa sita zia mbasu, kisundi kenene chaduuka mu kivala choosi, kuduuka saa tisa.

⁴⁵ Inguvu yikitambaya iyakunikaa hatakatifu hu vutakatifu mu Litembeli yatandulwa mu kaviri.

⁴⁶ Yeso yalira nu mwoyo munene, navoora, “Baba, mbikaa mwoyo gwange mu makono googo.” Lwa yamala kovora yaga, yakuza.

⁴⁷ Ahene yaho, lwu munene wa vasikari mia yalora gaali nigekoleki, yizominya Nyasaye navoora, “Ligali uyu yaali mundu mulungi.”

⁴⁸ Lwi viduma via avandu vosi, avaari nivavungi ukwelolera agekolekaa valora vindu yivi, vosi virana yengo nividuyaa viritu viavo mu vovereri.

⁴⁹ Avandu vosi avaari nivamanya Yeso, kandi kiduma cha vakali avamulonda kutura Galilaya, vasingira hahale, nivelolera ivindu yivi.

Liyavirwa lia Yeso

⁵⁰ Yaali ho mundu mulala uwalangwa Josefu, kutura mu lidaala lie Vuyuda ilialangwa Arimazia. Yaali mundu mulahi kandi umulungi, yaali mulala ku vanene vi kiyaalo cha Vayuda.

⁵¹ Siyavugilira amakuva gaavo ni minyinzi jaavo mba, kandi yalindiliraa Uvwami vwa Nyasaye.

⁵² Kunangwa Josefu yazia ku Pilato naamusava muviri gwa Yeso.

⁵³ Yaagwikiza hasi kutura ku musalaba, na agulingira mu inguvu yikatani. Yaaguviika mu kilindwa ichavakwa mu ligina ichu mundu akikiri kuvikwa mu.

⁵⁴ Liali lidiku liu mulwa katano, lidiku lie Lietegekera. Lisabato.

⁵⁵ Avakali avalonda Yeso kutura Galilaya, vazia na Josefu, ni valora kilindwa kandi kuli muviri gwigwe gwaviikwa mu.

⁵⁶ Kunangwa virana yengo, nivalomba vindu viafunya umwayu kandi maguta gu mwayu kigira muviri gwa Yeso. Ku lidiku lie Lisabato, vahonga kuli Lilaga lialaga.