Luka 22 - KITABU KITAKATIFU

Lilohiza mu vwivisu ukwita Yeso

¹ Ing'inga yi Lisavo liu Mugadi gutali mu na mamera, ililangwa Lipasaka, liali ahimbi kuduuka.

² Avasaalisi vanene kandi avigizi vi Lilaga vaali nivagerizaa konyoora inzira yu kwiita Yeso muvwivisu, kigira vaatia avandu.

Yuda yavugilira kuzaama Yeso

³ Maku, Setani yingira mu Yuda, uwalangwa Esikarioti, mulala ku aviigi likomi na vaviri.

⁴ Kunangwa Yuda yatura ho nazia kovolerana na Vasaalisi vanene kandi na valindi vi Litembeli kuli yaali anyala kuzaama Yeso kuvo.

⁵ Vayaanza ligali kandi valagana kumutunga mabese.

⁶ Yuda yavugilira kugo, ma natanga kwenya uvwiyangu vulahi vwu kuzaama Yeso kuvo, vugira avandu kumanya.

Yeso yalohiza kulia Lipasaka

⁷ Lidiku lie lilia Mugadi gutali mu na mamera liaduuka lwa magondi gi Lipasaka gaduukanaa gitwi.

⁸ Yeso yatuma Petero na Yohana, namalago yaga, “Muzie mukolombere lisavo lie Lipasaka nakunyi kuduuki kulia.”

⁹ Vamuteeva, “Wenyaa kokolombere Lisavo yili haliha?”

¹⁰ Yavativulira, “Lwa namuve niwingiraa mu lidaala linene, mulavugana numundu nagingi isiongo ya mazi. Mu mulonde kuduuka munyumba ya nayingiri mu,

¹¹ Muvoolere mwene inyumba, ‘Mwigizi akoteeva, inyumba ya vageni eveeye hayi, ya inzi ndiraa mu Lisavo lie Lipasaka harara na aviigi vange?’

¹² Naye alamumanyia inyumba enene ye gorofa nayo yetegekiziywi vulahi. Mulombe lisavo live mwene yimwo.”

¹³ Vaatura ni vazia kandi nivanyoora ivindu viosi niviveeye kuli Yeso yavavolera. Valombera mu Lipasaka.

Lipasaka liu Mwami

¹⁴ Lwi ing'inga yaduuka, Yeso harara na aviigi veve, viikara kulia chukulia.

¹⁵ Yavavolera, “Ndayegomba ligali kulia ni munyi Lipasaka yili ningikiri kwitwa!

¹⁶ Kigira inzi muvooleraa, Sindalia kandi Lipasaka yili kuduuka lwa liliheevwa kivuni chalio kuduukiru mu Vwami vwa Nyasaye.”

¹⁷ Maku Yeso yahevwa kekombe nikizuyi iwaini, nahaana lisandiza ku Nyasaye, navoora, “Muvuguli kekombe yiki, na musange hagati hinyu.

¹⁸ Muvooleraa, kutura kalunu inzi sindanwa kandi iwaini yiyi kuduuka lwu Vwami vwa Nyasaye vuzaa.”

¹⁹ Maku yavugula kedonye chu mugadi nahaana lisandiza ku Nyasaye, nameganyia kandi navaha, navoora, “Yigu goveeye muviri gwange, [uguhaanwa kuli isadaka ku Nyasaye kigira munyi. Mukore ndio mu linzizuliza.”

²⁰ Munzira ndala nzere, nivakamara lilia mugadi, Yeso yavugula kekombe chi iwaini navoora, “Kekombe yiki keveeye Lilaga Lihia lia Nyasaye mu masahi gange, agasundulwa kigira munyi.]”

²¹ “Navuzwa, Heenzi! Uyu unzamaa aveeye hano komesa harara ninzi!

²² Mwana wa Adamu azizaa kwitwa kuli Nyasaye yasavira kuye. Navuzwa, O, vayaye, kilaamo keveeye ku uyu umuzamaa!”

²³ Ahene yaho, vatanga kotevana aveene naveene, ni uliha kuvo uzizaa kokora yaga.

Aviigi vahangalizana kigira ovonene

²⁴ Lihangalizana liatulira hagati ha aviigi ndi ni uliha kuvo unyala kuganaganwa aveeye munene ligali hagati haavo.

²⁵ Yeso yavavolera, “Avami vi zihiiri vamiiha avandu vaavo kuzinguru; kandi avamihi avaveeye nuvunyari yavo venya avandu vavalange, ‘Avalina vahaani na vovokonyi.’

²⁶ Navuzwa yaga sigaveeye ndio ku munyi mba. Nitali munene ku munyi gamudukira ave kuli mwana mukekeeke, na uyu mwimiliri gamudukira ave kuli mutumiki.

²⁷ Nivwaha oveeye munene, uyu wikaye komesa kulia viukulia anoho ni uyu umutumikiraa? Ni uyu wikala komesa kulia viukulia! Navuzwa, kali nigaveeye ndio inzi mbeeye hagati hinyu kuli uyu utumikaa.

²⁸ “Navuzwa munyi nivo avazizagilira kusingira vudinyu ku lovega lwange mu ing'inga yi ligerizwa liange.

²⁹ Kuli Baba wange yamba zinguru ukwamiiha avandu yava, kandi inzi ndio, muheezaa zinguru zindala nzere mwamihi.

³⁰ Munyi mulalia nukunwa komesa yange mu Vwami vwange. Mulikala ku zindeve ziu Vwami ukwamiiha zihiiri likomi na ziviri zia Isiraeli.

Yeso yaporofeta ndi Petero alamwambakane

³¹ “Simoni, Simoni! Hulira, Setani ateevi munwa ku Nyasaye agerizi munyi vosi kwavukanyia vandu valala kutura ku vandu vadamanu, mulimi asesaa ingano.

³² Navuzwa inzi mali kukusaalira ku Nyasaye, Simoni, ndi lisuuvira liilio litageha mba. Lwa ivi wirana ku inzi, uladinyiriza mioyo ja avamwavo vovo.”

³³ Navuzwa Petero yamutivulira, “Mwami, inzi, nzetegeki kuzia niivi mu vuhambe, kandi mu likuza.”

³⁴ Yeso yamutivulira, “Ngovolera agiligali, Petero, uvudiku vwa lero, idaywa nitalagula, ulanyambakana haali kavaga ndi, si umanyi inzi mba.”

Yeso yiganihizaa aviigi veve

³⁵ Maku Yeso yateeva aviigi veve, “Lwa ndamutuma ing'inga yila kuzia vugira kebeti, musigo, nivilato, mwaadaka kindu?” Navo vamuvolera, “Awa.”

³⁶ Yeso yavavolera, “Navuzwa kalunu, ku vosi oveeye ne kebeti cha mabese, akivuguli, kandi oveeye nu musigo akole ndio. Oyo utaveeye ni kivavi, agulize likoti lilie, na aguli kivavi.

³⁷ Kigira muvooleraa ndi Amang'oda Matakatifu agaavoola ndi, ‘Yavalizwa harara na avoni.’ Kuduuka gatwekizwe kuva agiligali ku inzi. Yee agang'odwa ku inzi gaaza kuva agiligali.”

³⁸ Aviigi veve vamuvolera, “Mwami, henza, koveeye ni vivavi viviri hano.” Yeso yavativulira, “Yivio viduuki.”

Yeso yasaala mu Kiguru cha Mizeituni

³⁹ Yeso harara na aviigi veve, vaatura mu lidaala lia Jerusalemi, nivazia kuli mwima gwaavo mu Kiguru cha Mizeituni.

⁴⁰ Lwa yaduuka havenyaa, yavolera aviigi veve, “Musaale, Mutingira mu ligerizwa mba.”

⁴¹ Yavaleka nazia kuli hanyala kulasa ligina, nasigama, nasaara.

⁴² “Baba, nuyanza, tuliza kekombe chu vusaliri yiki ku inzi. Gatava kuvulaliri vwange, navuzwa gave kuvulaliri vuvwo.” [

⁴³ Engelosi yaloleka kuye kutura mwigulu, naamuha zinguru.

⁴⁴ Mu vusaliri vonene, yasaala numwoyo gwosi ligali kandi ulogeri lwilwe lwali kuli zingerageriza zia masahi gatonyatonyaa hasi.]

⁴⁵ Lwa yamala lisaala lilie, yazia ku aviigi veve, nanyoora vagona, nivaluhi kigira ovovereri.

⁴⁶ Yavateva, “Kigira ki mugonaa? Vuki musaale, ndi, muvuli kwingira mu ligerizwa mba.”

Ligumirwa lia Yeso

⁴⁷ Lwa Yeso yaali nakevoola ndio, kiduma kenene chaduuka nichimiliywi na Yuda, uwaali mulala ku aviigi likomi na vaviri. Yuda yisunda ahimbi ku Yeso naamuvusa.

⁴⁸ Navuzwa Yeso yamuvolera, “Yuda, uzamaa Mwana wa Adamu ni livuusa?”

⁴⁹ Lwa aviigi va Yeso, avaari harara naye, valora agaali nigazizaa kwekoleka, vateva, “Mwami kutumikiri vivavi vietu?”

⁵⁰ Mulala kuvo yatema mutugwa wu Musaalisi Munene na amukala ugutu, gwu mukono mulungi.

⁵¹ Navuzwa Yeso yativura navoora, “Agene yago: gaduuki. Leki!” Kandi yadira ugutu gwu mutugwa oyo, namuhonyia.

⁵² Maku Yeso yavolera avasaalisi vanene, avanene va valindi vi Litembeli, navakulundu, avaari ni vazi kumugumira ndi, “Munyingiliraa ni vivavi kandi nizimbimbu kuli mwingiliraa umunuuri?

⁵³ Lwa ndaali harara ni munyi kazozo mu Litembeli si mwanyiira amakono ginyu kung'umira mba. Navuzwa yiyi ni isa yinyu, kokora agamwenyaa, lwa zinguru zie kisundi ziamiihaa.”

Petero Yambakana Yeso

⁵⁴ Kunangwa Vagumira Yeso, nivamuhila muinyumba yu Musaalisi Munene, Petero yavalonderera inyima.

⁵⁵ Lwa vaali nivakafwana muliru hagati hu mujizi, Petero yaza niyikara harara na yavo avaari nivakumbirizi muliru.

⁵⁶ Mukaana mutumikiri mulala yalora Petero niyikaye ahimbi ku muliru. Yamwumika navoora, “Mundu uyu kandi yaali harara na Yeso!”

⁵⁷ Navuzwa Petero yambakana navoora, “Mukali ivi, kali inzi simumanyi mba!”

⁵⁸ Lwinyima hakekeke, Mundu wundi yamulola navoora, “Ivi kandi oveeye mulala kuvo!” Navuzwa Petero yativura, “Mundu ivi, ninzi mba!”

⁵⁹ Inyima wi isa ndala, mundu wundi yadinyiriza kovora nuvuluviliri, “ Ligali siunyala kuhayahayiza ndi mundu uyu yaali harara na Yeso; kigira aveeye Mugalilaya!”

⁶⁰ Navuzwa Petero yativura, “Mundu ivi, simanyi kali icha omoloma mba!” Nonoho lwa Petero yaali nakemoloma, idaywa yalagula.

⁶¹ Mwami yikivuka, niyumika Petero. Petero yizuliza likuva liu Mwami kuli wa yamuvolera, “Lero idaywa nikikiri kulagula, ulanyambakana haali kavaga.”

⁶² Ahene yaho Petero yatura ichova nalira novovereri vunene.

Yeso yakolelwa kehenyahenye nukukuywa

⁶³ Avandu vaali nivagumiyi Yeso vamukolera kehenyahenye, kandi vamukuya.

⁶⁴ Vamufuma muzimoni nikitambaya, nivamuteeva, “Vuula! Nivwaha ukuduyi?”

⁶⁵ Vavoola kuye vindu vinyingi viu kumunyega.

Yeso yahilwa imbiri wi kiyaalo cha avakulundu

⁶⁶ Lwa vwacha, avakulundu, avasaalisi vanene kandi avigizi vi Lilaga vavugana harara Yeso yaleetwa imbiri wi kiyaalo chavo kuyaalwa.

⁶⁷ Vamuvolera, kovolere, “Ivi niyie Kristo?” Yeso yavativulira, “Kali nimuvoolera, simunyala kusuuvira inzi mba.

⁶⁸ Kali niiva ndeva munyi liteeva, simunyala kundivulira mba.

⁶⁹ Navuzwa kutura kalunu Mwana wa Adamu alikalizwa ku mukono mulungi gwa Nyasaye Wuvunyali!”

⁷⁰ Ahene yaho, vosi vateva, “Ivi oveeye Mwana wa Nyasaye?” Yeso yavativulira, “Munyi muvooraa, inzi Mbeeye.”

⁷¹ Navo vavoola, “Kigira ki kwenyaa avaloli vandi? Kunyi aveene kumali kuhulira agavooye nu munwa gwigwe umwene.”