Luka 21 - KITABU KITAKATIFU

Sadaka yu mukunzakali

¹ Lwa Yeso yahenza vulahi, yalora avatugi nivaviika zisadaka ziavo mu livikiru lie Litembeli

² Kandi yalora mukali mulala mukunzakali mudaka ligali, naviika mu amang'ondo gaviri.

³ Yavoola, “Muvooleraa agiligali, mukunzakali mudaka uyu, uviiki mu izinyingi kuvita avandu vandi vosi.

⁴ Avandu yava vosi vaali kuhaana kutura ku vutugi vwavo, navuzwa mukali uyu, mu vudaka vwivwe, uviiki mu livikiru viosi via yaali navio.”

Yeso yamolomanga kigira lidivizwa lie Litembeli

⁵ Avalala ku aviigi vaali nivavolerana amakuva kigira Litembeli, kuli liumbakirwa amagina malahi kandi vihaanwa iviahaanwa ku Nyasaye. Navuzwa Yeso yavoola,

⁶ “Ku vindu via muloraa hano yivi, ing'inga ilakaduuki lwi ligina kali lilala, lilivula kutigala havundu halio goosi galakagwi hasi.”

Ikivi ni lidambizwa

⁷ Vigi va Yeso vamuteeva kandi, “Mwigizi, yivi vilava ng'inga ki? Kandi niki kiliekoleka kumanyia ndi ing'inga imali kuduuka vindu yivi viekoleke?”

⁸ Yeso yaavativula, “Mugerihi mutagadwa mba. Kigira avanyingi valaza mu lieta liange, nivavoora, ‘Inzi niyie,’ kandi, ‘Ing'inga eveeye ahimbi,’ Mutavalonda mba.

⁹ Kandi lwa mulihulira amakuva gu vulwani ni kivihiri mutadegera mba. Kigira vindu yivi vilatanga kokoleka, navuzwa sivimanyia ndi keheri keveeye himbi mba.”

¹⁰ Maku Yeso yaazizagilira ku vavoolera, “Ihiiri ni ihiiri, zivalavukirana; uvwami nu vwami vulavukirana.

¹¹ Lilava ho lidegera lie lirova, ninzara nizinguzu mu vivala viosi, nuvutihizi, nivilolekizu kutura mwigulu.

¹² Navuzwa imbiri wi vindu yivi nivikikiri kwekoleka, valamugumira nukumudambiza. Valamuzaama nukumuyaala ku vanene va masinagogi kandi muvofe mu vuhambe. Mulahilwa imbiri wa avami vanene na avamihi kigira lieta liange.

¹³ Yivu vulava vwiyangu vwinyu kulandiza Ivangeri.

¹⁴ Mwituliri mu zing'anagani zienyu, mutahendi mioyo ku agamulitivula muliekinga imbiri wavo mba.

¹⁵ Kigira ndakahaane ku munyi amakuva kandi ovogeri vwa avasigu vinyu valivula kuhangaliza anoho kuhing'ana na aga muvooraa.

¹⁶ Aviivuli vinyu na avamwavo vinyu naviiko vinyu, na avalina vinyu; valamuzaama, kandi valiita avalala ku munyi.

¹⁷ Avandu vosi valamudunyira kigira inzi.

¹⁸ Navuzwa liisu liu ku mitwi jinyu sililagota kali lilala mba.

¹⁹ Muliekuzira lienyu nu vusuuvirifu, mulanyola livamwoyo litahera mba.

Yeso yamoloma kigira lidivizwa lia Jerusalemi

²⁰ “Lwa mulilora Jerusalemi nilikumbiriziywi namahi, mulamanye ndi lidivizwa lialio liveeye ahimbi.

²¹ Maku yavo avaliva nivaveeye mu Vuyuda kuduuka virukiri mu vigulu; na yavo avaveeye mu lidaala linene kuduuka vatuli ichova na yavo avaveeye mu mumilimi, vatingira mu lidaala linene mba.

²² Kigira yago galakave ‘Madiku giliheevwa Amageri’; kokora viosi ivia Mang'oda Matakatifu gavoora viduuki kutwekizwa mu agiligali.

²³ O, vayaye, ikivi kilakave ho mu madiku yago ku avakali avaliva nivaaheriza kandi ku yavo avamama avaliva nivanyiunyia avana vadoto! Ikivi chukuhuga kilakaduuki ku kivala yiki, kandi amageri ga Nyasaye galakagwiri avandu yava.

²⁴ Avalala valakitwi nikivaavi, na avandi valagumirwa kuli avahambe nukuhirwa muvivala viosi. Lidaala linene lia Jerusalemi liladuvagwa na Avandu vizihiiri avatamanyi Nyasaye kuduuka lwi zing'inga ziavo ziliduukizwa.

Liza liu Mwana wa Adamu

²⁵ “Vilakave ho ivilolekizu viokogenyia ku liuva, ku mweli kandi ku zing'ereng'ani ku lirova; avandu muvivala viosi valakuza mioyo; nivatizaa umufumu gwi inyanza kandi vutima vwi viguvuli vinene vienyanza.

²⁶ Avandu valakakindi kigira uvuti lwa vavava nivalindira ikizaa kwekoleka lirova liosi; kigira zinguru ziu muvwerefu zilakalegerizwi.

²⁷ Ing'inga yeyo, valalola Mwana wa Adamu ni yaazira mu malesi ni zinguru zinene kandi nu vukumi ovonene ligali.

²⁸ Lwi vindu yivi vilitanga kokoleka, musingiri vudinyu na mudiguluri imitwi jinyu igulu, kigira ovohonyi vwinyu voveeye ahimbi.”

Amigizu kigira musaala gwu mukuyu

²⁹ Ahene yaho Yeso yavavolera lugano yilu: “Muganagane ku musaala gwu mukuyu kandi ku misaala jindi josi.

³⁰ Lwa muloraa amatu gajo nigatangi kusivuka mumanye ndi ing'inga yu umbasu eveeye ahimbi.

³¹ Munzira ndala nzere munyi lwa muloraa vindu yivi niviekoleka, mu manye uvwami vwa Nyasaye voveeye ahimbi.

³² “Ligali ligali muvooleraa, avandu vilikula yili vosi sivanyala kukuza vindu yivi viosi nivikikiri kwekoleka mba.

³³ Ligulu ni lirova vilavita, navuzwa amakuva gange sigalivita mba.

Keheri kiladuuka lwa mutamanyia

³⁴ “Mugerihi! Mutaleka mioyo jinyu jaza jaminikira mu vuhuvaali vwiliilia kandi mu vuhambiku kandi mu lihenda mwoyo lie livamwoyo yili mba; gase Lidiku yilio, liu Mwana wa Adamu aliiza, lilamunyolelera vwangu kuli umutego.

³⁵ Kigira liladuuka ku avandu vosi avamenyaa ku lirova liosi.

³⁶ Mulindi, musaale kazozo muluhi muduuki konyoora zinguru kuvitira mu vindu yivio viosi ni mirembe, ivizizaa kwekoleka kandi muve avanyala kusingira imbiri wu Mwana wa Adamu.”

³⁷ Yeso yatumikira madiku yago ni yigizaa avandu mu Litembeli, zing'inga zia mbasu; navuzwa lwu mugolova gwaduukaa, yazizaa kogona mu Kiguru cha Mizeituni.

³⁸ Vuli mugambazuri avandu vosi vazizaa mu Litembeli kumuhuliriza.