Luka 20 - KITABU KITAKATIFU

Amateeva kigira vunyali vwa Yeso

¹ Lidiku lilala, lwa Yeso yaali ni yigizaa avandu mu Litembeli kandi niyilwaza Ivangeri, avasaalisi vanene, na avigizi vi Lilaga harara na vakulundu vaza kuye.

² Ni vamuteeva, “Kovolere; okolaa vindu yivi na vunyali ki? Anoho, nivwaha wakuha vunyali yivu?”

³ Yeso yativura navavoolera, “Inzi ndamuteva liteeva kandi, na munyi mumbolere:

⁴ Libatiza lia Yohana, liatura ku Nyasaye anoho liatura ku avandu?”

⁵ Vateevana aveene ku liteeva yilio nivavoora kovoolaki? “Ni kovora, ‘Liatura mwigulu ku Nyasaye’ alakoteeva, ‘Kigira ki munyi si mwasuuvira Yohana?’

⁶ Navuzwa nikovoola, ‘Liatura ku avandu,’ avandu vosi valakulasa magina; kigira vosi vasuuvira ndi Yohana yaali muporofeti.”

⁷ Kunangwa vaativura nivavoora, “Sikukumanyi wa liatura mba.”

⁸ Yeso yavavolera, “Inzi kandi sindamuvolera ni ku vunyali ki vwa ngolera mu vindu yivi, mba.”

Lugano lwu mulimi gwi kizabibu na avalimi vadamanu

⁹ Maku Yeso yavolera avandu lugano yilu, “Yaali ho mundu wasimika kizabibu, naha avalimi vamulindili, maku yatura hango nazia ihale mu kivala kindi ku ing'inga indambi.

¹⁰ Lwi ing'inga yi livuna yaduuka, yatuma mutumikiri weve ku avalimi yavo vamuhe ku makuyu gi kizabibu. Navuzwa avalimi yavo vamukuya, nivamukunga umwere vugira kedonye chiche cha makuyu gi kizabibu.

¹¹ Yatuma kandi mutumikiri wundi. Navuzwa mwene oyo kandi vamukuya nivamukolera agi zisoni, ma nivamukunga makono mele.

¹² “Yatuma kandi mutumikiri wakavaga, kandi avalimi yavo, vamwata zing'oma ni vamukungi ichova.

¹³ Mwami mwene kizabibu yaganagana mwene navoora, ‘Ngola ki? Ndatuma mwana wange mwene uwandayaanza, mbula valamutia.’

¹⁴ Navuzwa lwa avalimi yavo vamulola, vavolerana aveene naveene, nivavoora ‘Uyu niyie mwana wu mwene kizabibu ulilia miandu jije. Gendi kumwiti na imiandu jilava jietu.’

¹⁵ Kunangwa vamukunga ichova wikizabibu nivamwita. “Kunangwa Mwami mwene kizabibu, alakola ki ku avalimi vadamanu yavo.”

¹⁶ “Alaza kandi aliita avalimi yava, nukuhaana kizabibu ku avalimi vandi.” Lwa avandu vahulira yaga, vavoola, “Yaga gatava ndio mba.”

¹⁷ Yeso yavuumika ma navateeva, “Amang'oda yaga gang'odwa ku kivuni ki? ‘Ligina liavumbaki vasuura kalunu likoleywe kuva ligina linene ligali liu musingi.’

¹⁸ Mundu woosi ugwa ku ligina yilio alavunanywa mu vidonye, navuzwa uyu wi ligina yili ligwira limuduvulanya agwi luguchi.”

Liteeva kigira litunga vusuuru ku Kaisari

¹⁹ Avigizi vi lilaga na vasaalisi vanene venya kumugumira ulwene yilwo, kigira vamanya Yeso yavavolera lugano yilu, navuzwa vaatia avandu.

²⁰ Kunangwa venyeleriza vwiyangu vatuma avatunyirizi nivekola kuva vasuuvirifu vaduuki kumugumira kigira gavoora kunangwa vamuhira ku avuvunyali kandi kumuviika mu zinguru ziu Mwami wu vwamihi vwavo Rumi.

²¹ Vamuteveleriza nivavoora, “Mwigizi, kumanyi vulahi ivi ovola kandi wigiza amakuva gaveeye guvulungi; kandi ivi si welizaa avandu kolondekana novonene vwavo mba. Navuzwa wigiza agiligali kolondekana nu vulaliri vwa Nyasaye ku Mundu.

²² Kovolere, ‘Ni vulahi kolondekana na malago ga Musa, kunyi kutungi uvusuru ku Kaisari?’ ”

²³ Navuzwa Yeso yalora mutego gwaavo gwu vugadi ma navavoolera,

²⁴ “Mu manyie isiringi. Eveeye ku nu mutwi na mang'oda ga vwaha?” Vavoola, “Gwu Mwami munene wa Rumi.”

²⁵ Kunangwa Yeso yavavolera, “Ni vulahi, munyi mutungi ku Kaisari vindu viveeye via Kaisari, kandi mutungi ku Nyasaye vindu viveeye via Nyasaye.”

²⁶ Navo sivanyala kugumira Yeso mu limoloma lilie imbiri wa avandu mba. Vagenya ligali ku litivula lilie ma nivakiring'ana.

Liteeva kigira Lisimuguka

²⁷ Maku avalala ku Avasadukayo, avavoora ndi avandu sivalisimuguka kutura mu vakuzu, vaza ku Yeso nivavoora,

²⁸ “Mwigizi, Musa yakong'odera lilago yili ndi, ‘Amwavo wu mundu nakuza naleka mukali, navuzwa vugira avana, kuduuka amwavo musaza oyo yiranyie namulekwa oyo umwandu, kunangwa aduuki kwivulira amwavo weve avana.

²⁹ Vaali ho avamwavo saba, wukutanga yaleeta mukali ma nakuza nakikiri kwivura umwana.

³⁰ Amwavo wakaviri yavugula mukali oyo,

³¹ kandi ndio wakavaga yaahira mukali, na vosi vaakuza vugira koleka avana. Malala mere gekoleka ku avamwavo vosi saba, vaakuza vugira koleka avana.

³² Mu lii malirika mukali naye yakuza kandi.

³³ Kunangwa, mu lisimuguka, aliva mukali wa uliha ku avamwavo saba avaari naye kuli mukali wavo?’ ”

³⁴ Yeso yavativulira, “Avasaza na vakali vi likula yili valetana.

³⁵ Navuzwa avasaza na vakali vaduukana kusimuguka kutura mu vakuzu kandi vamenye mu likula lizaa, sivaliletanaa mba.

³⁶ Kigira sivanyala kukuza kandi mba. Valava kuli zingelosi kandi vaveeye avana va Nyasaye, kigira vamali kusimuguka kutura mu vakuzu.

³⁷ Musa amanyia havulavu ndi avakuzu vasimugukizangwa. Mu zimbaso zivoolaa amakuva kigirakisaka chaadukaa muliru, Musa amolomaa ku Mwami kuli aveeye, ‘Nyasaye wa Aburahamu Nyasaye wa Isaka, kandi Nyasaye wa Yakobo.’

³⁸ Aveeye Nyasaye wa avaveeye mwoyo, siaveeye Nyasaye wa vakuzu, kigira kuye, vosi vaveeye mwoyo.”

³⁹ Avalala ku avigizi vi Lilaga vativura, “Mwigizi, utivuuyi vulahi.”

⁴⁰ Sihaliho kandi nomulala uwaluvilira kumuteeva amateeva gandi mba.

Liteeva kigira Kristo

⁴¹ Yeso yavateva kandi, “Ganyala kovoolwa ndi Kristo, aveeye mwana wa Daudi?

⁴² Kigira Daudi mwene avoora mu Kitabu cha Zaburi: ‘Mwami yavolera Mwami wange, Yikala hano ku mukono gwange mulungi.

⁴³ Kuduuka lwa ngola avasigu vovo vave kuli endeve yukuviika ku virenge vivio.’

⁴⁴ Daudi yamulanga, ‘Mwami.’ Kunangwa Kristo anyala kuva ndi kisukururwi cha Daudi?”

Yeso yiganihizaa avigizi vi Lilaga

⁴⁵ Lwa avandu vosi vaali nivahulirizaa, Yeso yavolera aviigi veve,

⁴⁶ “Mugerihi ku avigizi vi Lilaga; avayaanzaa kogendagenda ni viviiki ziganza ziavo zindambi; kandi avayaanzaa kuchelizwa nu luyali mu viitu. Viikara ku zindeve zinene mu masinagogi kandi ku zindeve ziu luyali mu masavo;

⁴⁷ vavugura vindu viosi via vakunzakali kandi vavihira mu zinyumba ziavo, kigira venya kufumilira agavakolaa, vasaala amasaala matambi. Yava valanyora mageri manene ligali kuvita!”