Luka 2 - KITABU KITAKATIFU

Liivulwa lia Yeso

¹ Mumadiku yago lilago liatura ku Kaisaria Agosto ndi avandu vosi vang'odwi amita mu kivala choosi chamiifa na Varumi.

² Yili liali livalizwa liu kutanga lwa Kwirinio yaali mwami wa Siria.

³ Kunangwa avandu vosi vazia kong'odwa sa mulala mu lidaala lilie liene.

⁴ Josefu yalomba logendo kandi kutura Galilaya mu lidaala lia Nazareti. Yazia mu lidaala lia Bezelehemu lie Vuyuda. Kigira yaali uwinyumba kandi viko va Daudi.

⁵ Yazia kuvalizwa harara na Maria, mukaana wa yaali niyaakwa, uwaali naveeye ni inda.

⁶ Lwa vaali ni vaveeye yo, ing'inga yu mwana kwivulwa yaduuka.

⁷ Maria yivula mwana weve muyaayi wimbiri naamulingira mu zinguvu ziu mwana, namwaliriza ku mulinga gwi zing'ombe ziliiraa ku, kigira sivanyoola ovogono munyumba yavageni mba.

Avayi ni engelosi

⁸ Mu kivala zana yicho, vaali ho avayi nivalinda ichayo cha magondi gaavo mu chayiru vudiku.

⁹ Engelosi wu Mwami yaloleka kuvo kandi uvukumi vwu Mwami vwa ng'ereng'ana kuvo zimbega ziosi. Vaatia ligali,

¹⁰ navuzwa engelosi yavavolera, “Mutatia mba! Henza muleeteraa amakuva amalahi ligali guvuyaanzi vonene uvuliduuka ku avandu vosi.

¹¹ Ku lidiku liene yili mu lidaala lia Daudi, Muhonyi winyu wivuliiywi naye ni Kristo Mwami.

¹² Yiki kilava kelolero ku munyi: mulanyola akaana nikalingiywi mu zinguvu ziu mwana, ni kaliriziywi mu mulinga gwi zing'ombe ziliiraa ku.”

¹³ Nonoho, vaaloreka harara ne engelosi kiduma kenene chi zingelosi vu mwigulu nivizominya Nyasaye nivavoora,

¹⁴ “Uvukumi voveeye igulu mwigulu ku Nyasaye, ni mirembe mu kivala ku avandu ava ya yaanza!”

¹⁵ Lwi zingelosi vaatura kuvo kwirana mwigulu, avayi vavolerana, “Gendi kuzie kuduuka Bezelehemu kolole likuva liekoleki yili, liu Mwami amali kokovoolera.”

¹⁶ Maku vazia vwangu, nivanyoora Maria na Josefu, kandi nivalora akaana ni kagoni mu mulinga.

¹⁷ Lwa valora akaana, vavoolera amakuva ga vaali nivahuliyi kigira kaana yaka.

¹⁸ Avandu vosi avagahuliraa vagenya ku amakuva ga avayi vavoola.

¹⁹ Navuzwa Maria yizuliza vindu yivi viosi, naganagana amakuva yaga goosi mu mwoyo gwigwe.

²⁰ Avayi virana wavo ni vakuminya kandi ni vizominyaa Nyasaye ku goosi aga vaali ni vaahuliyi kandi nivaloli, goosi gaali kuli vaali ni vavooleywi.

Yeso Yagulikwa lieta

²¹ Inyima wa madiku munane, ing'inga yokokevwa kwu mwana yaduuka, yagulikwa Yeso kuli engelosi yamugulika lieta nakiri koverekwa.

Yeso Yahilwa mu Litembeli

²² Lwa amadiku gaduukaa agi lietakasa lia Josefu na Maria, kuli lilaga lia Musa lienya, aviivuli yavo vaavugura mwana nivazia Jerusalemi nivamuviika imbiri wu Mwami.

²³ Kuli gang'odwa mulilaga liu Mwami; “Wikisaza woosi wigula inda ya mama weve alalaangwa Mutakatifu wu Mwami.”

²⁴ Vazia vaduuki kuhaana kihanwa chukusaalisa: amakuulu gaviri gumbulimu, anoho vidudi viviri kolondekana ni lilago liu Mwami.

²⁵ Kunangwa yaali ho mundu mu Jerusalemi walangwa Simioni; yaali mundu mulungi kandi uwatia Nyasaye niliehozeliza. Mundu uyu yalindilira vohonyi vwa Isiraeli kandi Roho Mutakatifu yaali kuye.

²⁶ Roho Mutakatifu yamuvuulira ndi sialakuza nakikiri kolola Kristo wu Mwami.

²⁷ Kunangwa Simioni yimilirwa na Roho Mutakatifu, nazia mu Litembeli. Aviivuli valeta mu mwana wavo Yeso vaduuki kumukolera kuli mwima gwi Lilaga,

²⁸ Simioni yavugula mwana Yeso mu makono geege niyizominya Nyasaye navoora:

²⁹ “Kalunu, Mwami, umali kuduukiza lilagana liilio, unyala kuvugilira mutumikiri woovo azie ni mirembe.

³⁰ Kigira zimoni ziange zimali kolola vohonyi vuvwo,

³¹ uvwa umali kolomba,

³² imbiri wa avandu vosi, uvulavu kuvuula uvulariri vuvwo ku avandu vi zihiiri kandi koleta uvukumi ku avandu vovo Isiraeli.”

³³ Josefu, baba na Maria mama wu mwana, vagenya ku amakuva ga Simioni yavoola ku mwana wavo.

³⁴ Simioni yavagasiza navolera Maria, mama weve, “Henza mwana uyu otovoleywi na Nyasaye, kigira lidivizwa kandi lihonywa lia vandu avanyingi mu Isiraeli. Naye alava kilolero kutura ku Nyasaye, cha vandu valakasuuli,

³⁵ kuvuula zing'anagani ziavo ziaviswa, kandi vovereri vonene, kuli kivavi chugi, vulatumita mwoyo gugwo ivi mwene.”

³⁶ Haali ho nu muporofeti mukali mulala, uwalangwa Hana, mukaana wa Fanueli, wihiiri ya Asheri. Yaali mukeere ligali. Yamenya numusaza weve mihiga saba kutura naleetwa.

³⁷ Yaali mukunzakali ku ing'inga yi mihiga samanini na ine. Ing'inga yeyo yoosi yaali niyamenya mulihonga lilia kandi kusaala mu Litembeli vudiku numbasu.

³⁸ Ing'inga yene yeyo, yingira mu Litembeli nasandiza Nyasaye, navoora agu mwana oyo ku avandu vosi, avaari nivalindilira ovohonyi vwa Jerusalemi.

Lirana Nazareti

³⁹ Lwa Josefu na Maria vamala kokora vindu viosi ivialagwa kolondekana ni Lilaga liu Mwami, virana Galilaya mu lidaala liavo, Nazareti.

⁴⁰ Mwana yaviruka nameeda konyoora zinguru, niyizula ovogeri, kandi vugasu vwa Nyasaye vwali harara naye.

Mwana Yeso mu Litembeli

⁴¹ Aviivuli veve vazizaa Jerusalemi mu lisavo lie Lipasaka vuli muhiga.

⁴² Lwa Yeso yaduuka mihiga likomi naviviri vazia mu lisavo lie Lipasaka yilio kuli kazozo.

⁴³ Lwa vamala madiku gi lisavo, vatanga logendo kwirana yengo, navuzwa muyaayi Yeso yaatigara Jerusalemi. Aviivuli veve sivamanya yaga mba.

⁴⁴ Vaganagana ndi hawundi aveeye mu muganda. Lwa vaali nivakazia logendo lwi lidiku lilala, vatanga kumwenya hagati ha aviiko na valina vaavo.

⁴⁵ Lwa vavura kumunyoola virana Jerusalemi nivamwenyaa.

⁴⁶ Inyima wa madiku gavaga vamunyoola mu Litembeli, niyikaye hagati ha avigizi va Vayuda, navahulirizaa nukuvateeva mateeva.

⁴⁷ Vosi avahulira amakuva geege vagenya ku vogeri vwivwe kandi amativuli geege.

⁴⁸ Lwa aviivuli vamulola vagenya ligali. Maria mama weve yamuteeva, “Mwana wange, kigira ki okokoli kuli ndi? Baba woovo ninzi kukwenyi ni mioyo gietu giosi.”

⁴⁹ Naye yavativulira, “Kigira ki ni munyenya? Simumanyi ndi gaduukanaa inzi mbe munyumba ya Baba wange?”

⁵⁰ Navuzwa aviivuli veve sivahulira ilivoola lia amakuva gayavavoolera mba.

⁵¹ Kunangwa yirana harara naviivuli kuduuka Nazareti, ni yegehiza kuvo. Mama weve yavika amakuva yaga goosi mu mwoyo gwigwe.

⁵² Yeso yameda kuviruka mu vogeri kandi mu muviri; nameeda kuyanzwa na Nyasaye kandi na avandu.