Luka 19 - KITABU KITAKATIFU

¹ Yeso yingira kandi naavitira hagati ha Jeriko.

² Yaali yo munene wa vasololi vuvusuuru uwalangwa Zakayo, kandi yaali mutugi ligali.

³ Yaali nuvuha kolola Yeso, navuzwa kigira yaali mwimbi ligali, siyaali unyala kumulora mba, kigira uvunyingi vwi kiduma cha vandu.

⁴ Kunangwa yanyagula imbiri, wikiduma naniina ku musaala gwu mukuyu aduuki kolola Yeso uwaavitiraa kunzira yeyo.

⁵ Lwa Yeso yaduuka ahu musaala gwaali, yahenza igulu namuvolera, “Zakayo, yika hasi vwangu, kuduuka soose munyumba yooyo kalunu.”

⁶ Zakayo yakola vwangu ni yika, naahira Yeso hango hehe, naamugenihiza nuvusangali.

⁷ Lwa avandu vosi valora yaga, vatanga kokenya nokomonyana nivavoora, “Mundu uyu uziyi kuva mugeni hango hu mundu mwoni.”

⁸ Navuzwa Zakayo yasingira navolera Mwami, “Hulira, Mwami! Ndahaana inusu yi vindu viange ku avadaka, kandi niiva ndaavugura kindu choosi chu mundu kali mulala nuvugadi, ndamwiranyira haali kane.”

⁹ Yeso yamuvolera kandi, “Lidiku linu, ovohonyi vumali kuduuka kunyumba yiyi, kigira uyu aveeye kisukururwi wa Aburahamu.

¹⁰ Kigira Mwana wa Adamu yaza kwenya kandi kohonyia avaagota.”

Lugano lwi vigero likomi viefeza

¹¹ Lwa avandu vaali nivakihuliriza ku ivindu yivi Yeso yaazizagilira navavoolera lugano. Yaali naveeye ahimbi kuduuka Jerusalemi ligali kandi avandu vaganagana ndi uvwami vwa Nyasaye vuzizaa kololeka vwangu.

¹² Kunangwa yavoola, “Mundu mulala munene yazia mu kivala chi ihale aduuki kokolwa Mwami ma yirani.

¹³ Kunangwa, yalanga avatumikiri veve likomi, navaha zikilo likomi zie feza. Yavavolera, ‘Muviiki yizi ku miyinzi, kuduuka lwa nzirana.’

¹⁴ Navuzwa avandu veve vamudunyira mbitilira nivatuma avandu inyima weve kumulondelera ni vavoolera Mwami Munene: ‘Sikwenyi mundu uyu ave mwamihi wiitu mba.’

¹⁵ “Mundu oyo yakolwa mwamihi munene ma niyirana yengo kandi. Nonoho yalanga avatumikiri va yaaha efeza, aduuki kumanya uvukala vwa vaali nivanyooye.

¹⁶ Wukutanga yaza navoora, ‘Mwami, ndaanyoora zikilo zindi zie feza likomi kutura ku ya wamba.’

¹⁷ Mwami weve yamuvolera, ‘Mutugwa wange mulahi, okoli vulahi ligali. Kigira waali umusuuvirifu kuvikuzuzu, ndakokola ove nuvunyari ku madaala manene likomi.’

¹⁸ Wa kaviri yaza, navoora kandi, ‘Mwami, ifeza yooyo enyooleye vukala zindi zitano.’

¹⁹ Mwami weve yamutivulira, ‘Ivi ulava nuvunyari ku madaala manene gatano.’

²⁰ “Mutugwa wundi yaza navoora, ‘Mwami, ngiyi ikilo yifeza; ndagevohera mu kitambaya ningiviika.

²¹ Ndaatia ivi kigira oveeye mundu mululu. Uvugura icha utaviika kandi ogesaa ha utamiiza.’

²² Mwami weve yamutivulira, ‘Ivi mutumikiri mudamanu ndatumikira makuva googo ivi mwene kukukalagira. Ivi wamanya inzi mbeeye mundu mululu, mbugura chandavula kuviika kandi ngesaa aha ndaavura kumiza?

²³ Kigira ki nutaviika ifeza yange mu bengi na mu lirana linage ndaali ndakanyoo uvukala?’

²⁴ “Yavolera avasingira naye, ‘Mumunyage ifeza yeyo na muhe oyo wi zikilo likomi!’

²⁵ Navo vavoola, ‘Mwami, aveeye nazio likomi!’

²⁶ Yavativulira, ‘Muvooleraa agiligali, ku vosi oveeye nacho, alahevwa vinyingi, navuzwa ku oyo utaveeye nacho alanyagwa kali icha aveeye nacho kikuzuzu.

²⁷ Navuzwa avasigu vange avatayaanzaa inzi nzamiihi kuvo, mu valeete hano, muviitiri imbiri wange.’ ”

Yeso yingira Jerusalemi nisango enene yiliguuta

²⁸ Lwa Yeso yamala kovora yaga, yaavimilira Jerusalemi.

²⁹ Lwa yaali niyakaduuka ahimbi Bezifage na Bezani, ha Kiguru cha Mizeituni, yatuma vaviri ku aviigi veve, navavoolera:

³⁰ “Muzie mu lidaala liveeye imbiri winyu, na lwa muva ni mwingira mu, mulanyola kemoli chisukiri nikevoheywi yo, ichu mundu kali mulala akikiri kuniina ku. Mukevoholole na mukeleete hano.

³¹ Niiva mundu ku vosi amuteeva, ‘Kigira ki mukevoholoraa?’ Mumuvolere, ‘Mwami achenyaa!’ ”

³² Kunangwa avatumwa yavo, vazia ma nivanyoora kuli yavavolera.

³³ Lwa vaali ni vavoholora kemoli chisukiri, aveene cho vavateeva, “Kigira ki muvoholora kemoli cha isukiri yicho?”

³⁴ Navo vaativura, “ Mwami achenyaa.”

³⁵ Vakeleeta ku Yeso, nivaala zinguvu ziavo ku cho ma nivikaliza ku Yeso.

³⁶ Lwa yaali muligenda avandu vamwalira zinguvu ziavo kunzira.

³⁷ Lwa yaali ahimbi kuduuka hinzira isulungutaa nizia hasi hi Kiguru cha Mizeituni, kiduma choosi cha aviigi chatanga kusangara ni vizominya Nyasaye ni isango enene kigira miyinzi josi jokogenyia ja vaali nivaloli.

³⁸ Vavoola, “Nyasaye agaasizi Mwami Munene uza mu lieta liu Mwami. Mirembe jive mwigulu, nu uvukumi vove mwigulu igulu ku Nyasaye!”

³⁹ Valala ku Avafarisayo mu kiduma vavoolera Yeso, “Mwigizi, ogondokere aviigi vovo vakiring'ane!”

⁴⁰ Yeso yavativulira, “Inzi muvooleraa ndi, kali niiva yava valakiring'ana, amagina yaga galahanzuka.”

Yeso yalilira lidaala lia Jerusalemi

⁴¹ Lwa yaduuka ahimbi Jerusalemi yalora lidaala zana, nalililira,

⁴² navoora, “Ndakayanzi ligali niiva munyi mwakamanyi ku lidiku linu vindu via mwenyeka muve navio, ku muve ni mirembe. Navuzwa kalunu vivisiywi kutura mu zimoni zienyu.

⁴³ Ing'inga ilaaza ku munyi lwa vasigu vinyu valimukumbiriza nulugaga, kandi valamwigalira nukumwingilira kutura muzimbega ziosi.

⁴⁴ Valamudiviza ligali harara na vana vinyu avaveeye mu madigi ginyu. Sivalileka ligina kali lilala ku lindi mba kigira simwamanyiriza ing'inga yiliiza lia Nyasaye ku munyi mba!”

Yeso yingira mu Litembeli

⁴⁵ Maku Yeso yingira mu Litembeli natanga kukunga vakiranyi kutura mu Litembeli.

⁴⁶ Yavavolera, “Gang'odwa, mu Mang'oda Matakatifu ndi, Nyasaye yavoola, ‘Inyumba yange ilava Litembeli liu kusaala.’ Navuzwa munyi mumali kogekola uluhangaywa lwa aviivi”

⁴⁷ Amadiku goosi yigizaa mu Litembeli. Navuzwa avasaalisi vanene na Avigizi vi Lilaga na vimiliri vavandu venya kogeriza kumwita.

⁴⁸ Navuzwa sivanyoola inzira yoosi yokokola ndio mba, kigira avandu vosi vadinya kuye nivahulirizaa amakuva geege.